ପେଟ୍ରୋଲିୟ ଓ କଟ୍ ଡାଇମଣ୍ଡକୁ ପଛରେ ପକାଇ ଭାରତର ସର୍ବାଧିକ ରପ୍ତାନୀକାରୀ ସାମଗ୍ରୀ ହେଲା ସ୍ମାର୍ଟଫୋନ୍

ନୂଆଦିଲ୍ଲୀ: ପେଟ୍ରୋଲିୟମ୍ ଉତ୍ପାଦ ଏବଂ ହୀରା ଭଳି ପାରମ୍ପରିକ ସାମଗ୍ରୀକୁ ପଛରେ ପକାଇ ଭାରତର ସର୍ବାଧିକ ରପ୍ତାନୀକାରୀ ସାମଗ୍ରୀ ହେଲା ସ୍ମାର୍ଟଫୋନ୍‌। ସରକାରୀ ରିପୋର୍ଟ ଅନୁଯାୟୀ, ସ୍ମାର୍ଟଫୋନ୍‌ଗୁଡ଼ିକ ଆନୁଷ୍ଠାନିକ ଭାବରେ ଆର୍ଥିକ ବର୍ଷ ୨୫ରେ ଭାରତର ସର୍ବାଧିକ ରପ୍ତାନି ସାମଗ୍ରୀ ହେବାର ରେକର୍ଡ କରିଛି। 

ସରକାରୀ ସମର୍ଥନ ସହ ଆପଲ୍ ଓ ସାମସଙ୍ଗ ଭଳି ଟେକ୍ କମ୍ପାନୀଗୁଡ଼ିକର  ବହୁ ସଂଖ୍ୟାରେ ସ୍ଥାନୀୟ ଉତ୍ପାଦନ ଯୋଗୁ ଏହା ସମ୍ଭବ ହୋଇପାରିଛି। ଫଳରେ୨୦୨୪-୨୫ରେ ସ୍ମାର୍ଟଫୋନ୍ ରପ୍ତାନୀ ୫୫ ପ୍ରତିଶତ ବୃଦ୍ଧି ପାଇ ୨୪.୧୪ ବିଲିୟନ ଡଲାରରେ ପହଞ୍ଚିଛି। ଯାହା ପୂର୍ବ ଆର୍ଥିକ ବର୍ଷରେ ୧୫.୫୭ ବିଲିୟନ ଡଲାର ଏବଂ ୨୦୨୨-୨୩ ରେ ୧୦.୯୬ ବିଲିୟନ ଡଲାର ଥିଲା।

ତଥ୍ୟ ଅନୁଯାୟୀ, ଗତ ତିନି ବର୍ଷ ମଧ୍ୟରେ ଆମେରିକା ଏବଂ ଜାପାନକୁ ଭାରତ ନିର୍ମିତ ସ୍ମାର୍ଟଫୋନ୍‌ ରପ୍ତାନୀରେ ସର୍ବାଧିକ ବୃଦ୍ଧି ଘଟିଛି। ଆମେରିକାକୁ ରପ୍ତାନୀ ପ୍ରାୟ ପାଞ୍ଚ ଗୁଣ ବୃଦ୍ଧି ପାଇଛି। ଆର୍ଥିକ ବର୍ଷ ୨୩ରେ ୨.୧୬ ବିଲିୟନ ଡଲାରରୁ ବୃଦ୍ଧି ପାଇ ଆର୍ଥିକ ବର୍ଷ ୨୫ରେ ୧୦.୬ ବିଲିୟନ ଡଲାର ହୋଇଛି। ସେହିପରି, ଜାପାନକୁ ରପ୍ତାନୀ ଚାରି ଗୁଣ ବୃଦ୍ଧି ପାଇସମାନ ସମୟ ଅବଧିରେ ସ୍ମାର୍ଟଫୋନ ରପ୍ତାନୀ ମାତ୍ର ୧୨୦ ନିୟୁତ ଡଲାରରୁ ୫୨୦ ନିୟୁତ ଡଲାର ହୋଇଛି।

ସ୍ମାର୍ଟଫୋନ୍‌ ରପ୍ତାନୀରେ ତୀବ୍ର ବୃଦ୍ଧି ମୁଖ୍ୟତଃ ସରକାରଙ୍କ ଉତ୍ପାଦନ-ସମ୍ପର୍କିତ ପ୍ରୋତ୍ସାହନ (ପିଏଲଆଇ) ଯୋଜନା ଯୋଗୁ ବଳ ପାଇଛି। ଯାହା ବିଶ୍ୱ ନିବେଶକୁ ଆକର୍ଷିତ କରିବାରେ, ଘରୋଇ ଉତ୍ପାଦନକୁ ବୃଦ୍ଧି କରିବାରେ ଏବଂ ଭାରତୀୟ ଉତ୍ପାଦନକୁ ବିଶ୍ୱ ମୂଲ୍ୟ ଶୃଙ୍ଖଳାରେ ଯୋଡ଼ିବାରେ ସାହାଯ୍ୟ କରିଛି। 

କାଉଣ୍ଟରପଏଣ୍ଟ ରିସର୍ଚ୍ଚର ରିପୋର୍ଟ ଅନୁଯାୟୀ, ୨୦୨୪ ମସିହାରେ ଭାରତର ସ୍ମାର୍ଟଫୋନ୍ ରପ୍ତାନିର ୯୪ ପ୍ରତିଶତ ଆପଲ୍ ଏବଂ ସାମସଙ୍ଗ ମିଳିତ ଭାବରେ କରିଥିଲେ। ସ୍ଥାନୀୟ ଉତ୍ପାଦନରେ ସେମାନଙ୍କର ନିରନ୍ତର ନିବେଶ ସ୍ମାର୍ଟଫୋନକୁ ଦେଶର ଶ୍ରେଷ୍ଠ ରପ୍ତାନି ସାମଗ୍ରୀ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛି।

ରିପୋର୍ଟରେ ଆହୁରି କୁହାଯାଇଛି ଯେ ୨୦୨୪ ମସିହାରେ ଭାରତରେ ନିର୍ମିତ ସ୍ମାର୍ଟଫୋନ୍ ପଠାଣ ୬ ପ୍ରତିଶତ ବୃଦ୍ଧି ପାଇଛି। ଆର୍ଥିକ ବର୍ଷ ୨୫ରେ, ଭାରତରେ ପ୍ରିମିୟମ୍ ସ୍ମାର୍ଟଫୋନ୍ ଚାହିଦା ବୃଦ୍ଧି ପାଇଛି, ବିଶେଷକରି ଆପଲର ଚାହିଦା ବଢ଼ିଛି। 

ପଢନ୍ତୁ- ଫେସନ ଇଣ୍ଡଷ୍ଟ୍ରୀରେ ବି ବୟକଟ ତୁର୍କୀଏ: ନିଜ ପ୍ଲାଟ୍‌ଫର୍ମରୁ ପ୍ରଡକ୍ଟ ହଟାଇଲେ ମିନ୍ତ୍ରା ଓ ଆଜିଓ

ସୋମବାର ପ୍ରକାଶିତ ଆଇଡିସି ରିପୋର୍ଟ ଅନୁଯାୟୀ, ଆପଲ୍ ଜାନୁଆରୀ-ମାର୍ଚ୍ଚ ୨୦୨୫ ତ୍ରୈମାସିକରେ ସମସ୍ତ ବ୍ରାଣ୍ଡ୍ ମଧ୍ୟରେ ସର୍ବାଧିକ ଅଭିବୃଦ୍ଧି ହାସଲ କରିଥିଲା, ଯେଉଁଥିରେ ରେକର୍ଡ ୩୦ ଲକ୍ଷ ଆଇଫୋନ୍ ରପ୍ତାନୀ କରାଯାଇଥିଲା। ୨୦୨୫ ତ୍ରୈମାସିକରେ କେବଳ iPhone 16 ହିଁ ସର୍ବାଧିକ ବିକ୍ରି ହୋଇଥିବା ମଡେଲ ହୋଇଥିଲା, ଯାହା ଏହି ତ୍ରୈମାସିକରେ ସମସ୍ତ ସ୍ମାର୍ଟଫୋନ ବିକ୍ରୟର ଏକାକୀ ୪ ପ୍ରତିଶତ ଥିଲା।

ତେବେ ଭାରତର ସ୍ମାର୍ଟଫୋନ୍ ବଜାର ମଧ୍ୟ ଅଧିକ ମହଙ୍ଗା ମଡେଲ୍ ଆଡକୁ ମୁହାଁଇଛି। ୨୦୨୫ ମସିହାର ପ୍ରଥମ ତ୍ରୟମାସରେ ହାରାହାରି ବିକ୍ରୟ ମୂଲ୍ୟ (ASP) ରେକର୍ଡ ୨୭୪ ଡଲାର ଛୁଇଁଥିଲା। ପ୍ରିମିୟମ୍ ସେଗମେଣ୍ଟ (୬୦୦–୮୦୦ ଡାଲର) ପ୍ରାୟ ୭୯ ପ୍ରତିଶତ ବୃଦ୍ଧି ପାଇଥିଲା। ଆପଲର iPhone 13 ଏବଂ ୧୬ ଏହି ସ୍ଥାନରେ ପ୍ରାଧାନ୍ୟ ବିସ୍ତାର କରିଥିଲା। ଫଳରେ ଆପଲ ମାର୍କେଟ ଶେୟାର ବଢ଼ିଥିଲା।