ପ୍ରେମ ସମ୍ପର୍କକୁ ନେଇ ଜିଆରଏସ୍‌ଙ୍କୁ ହତ୍ୟା

ଖୋର୍ଦ୍ଧା,୧୯ା୧୨(ପ୍ରଭାତ ପାଣିଗ୍ରାହୀ): ଖୋର୍ଦ୍ଧା ଟାଉନ ଥାନା ଅନ୍ତର୍ଗତ ନବୀନବାଗ ସ୍ଥିତ ଏକ ଘରୋଇ ସଂସ୍ଥା ଘରୁ ରବିବାର ପୋଲିସ ଜଣେ ଗ୍ରାମ ରୋଜଗାର ସେବକ(ଜିଆର୍‌ଏସ୍‌) ଝୁଲନ୍ତା ମୃତଦେହ ଜବତ କରିଥିଲା। ମୃତକ ହେଲେ ପୁରୀ ଜିଲା କଣାସ ବ୍ଲକ ଅନ୍ତର୍ଗତ ଅଁଳାଯୋଡି ଗ୍ରାମର ସୌମ୍ୟରଞ୍ଜନ ମାହାନା। ଅନ୍ୟପଟେ ପ୍ରେମ ସମ୍ପର୍କକୁ କେନ୍ଦ୍ରକରି ସୌମ୍ୟରଞ୍ଜନଙ୍କୁ ହତ୍ୟା କରାଯାଇଛି ବୋଲି ବାପା ସୁରେଶ ମାହାନା ଟାଉନ ଥାନାରେ ଅଭିଯୋଗ କରିଛନ୍ତି। ଏ ସମ୍ପର୍କରେ ପୋଲିସ ଦଫା ୩୦୨, ୧୦୨(ବି)ରେ ଏକ ହତ୍ୟା ମାମଲା(ନଂ.୭୯୯/୨୩) ରୁଜୁ କରିଛି। ସୋମବାର ସାଇଣ୍ଟିଫିକ ଟିମ୍‌ ସହ ପୋଲିସ ଘଟଣାସ୍ଥଳ ଅନୁଧ୍ୟାନ କରିବା ସହ ସ୍କୁଟି, ମୋବାଇଲ ଫୋନ, ଘର ଚାବି ସହ ଅନ୍ୟାନ୍ୟ ସାମଗ୍ରୀ ଜବତ କରିଛି। ସୁରେଶ ଦେଇଥିବା ଏତଲାରେ ଜଣେ ଯୁବତୀଙ୍କ ସହ ଅନ୍ୟ ୩ଜଣଙ୍କ ନାମ ଉଲ୍ଲେଖ କରିଛନ୍ତି। ଏ ସମ୍ପର୍କରେ ସଦର ଏସ୍‌ଡିପିଓ ଦିଲୀପ ଦାସ କହିଛନ୍ତି, ଘଟଣାର ତଦନ୍ତ ଜାରି ରହିଛି। ସୌମ୍ୟରଞ୍ଜନଙ୍କୁ ହତ୍ୟା କରାଯାଇଛି ନା ସେ ଆତ୍ମହତ୍ୟା କରିଛନ୍ତି ତଦନ୍ତ ପରେ ସ୍ପଷ୍ଟ ହେବ।
ଅଭିଯୋଗ ମୁତାବକ, କଣାସ ବ୍ଲକ ଅଞ୍ଚଳରେ ସୌମ୍ୟରଞ୍ଜନ ଜିଆର୍‌ଏସ୍‌ ଭାବେ କାର୍ଯ୍ୟ କରୁଥିଲେ। ସେ କୌଣସି କାରଣ ପାଇଁ ଖୋର୍ଦ୍ଧା ନବୀନାବାଗ ସ୍ଥିତ ଏକ ଘରୋଇ ସଂସ୍ଥାକୁ ନିୟମିତ ବ୍ୟବଧାନରେ ଆସୁଥିଲେ। ରବିବାର ସକାଳ ୯ଟାରେ ଜଣେ ଯୁବକ ସୌମ୍ୟରଞ୍ଜନଙ୍କୁ ଫୋନ କରି ଭୋଜି ପାଇଁ ଉକ୍ତ ସଂସ୍ଥାକୁ ଡାକିଥିଲେ। ଏହା ପରେ ସୌମ୍ୟରଞ୍ଜନ ସେଠାରେ ପହଞ୍ଚିଥିଲେ। ତେବେ ସୌମ୍ୟରଞ୍ଜନ ଉକ୍ତ ସଂସ୍ଥାର ଗୃହରେ ଆତ୍ମହତ୍ୟା କରିଥିବା ନେଇ ଖବରପାଇ ସନ୍ଧ୍ୟାରେ ପରିବାରଲୋକ ପହଞ୍ଚିଥିଲେ। ଏକ ଖୋଲା କୋଠରୀରେ ସିଲିଂ ଫ୍ୟାନରୁ ଏକ ଟେବୁଲ କ୍ଲଥରେ ସୌମ୍ୟରଞ୍ଜନଙ୍କ ବେକ ବନ୍ଧା ହୋଇଥିବା ପରିବାରଲୋକ ଦେଖିବାକୁ ପାଇଥିଲେ। ଯୋଜନାବଦ୍ଧ ଭାବେ ଏକାଧିକ ବ୍ୟକ୍ତି ମିଳିମିଶି ହତ୍ୟା କରିବା ପରେ ଆତ୍ମହତ୍ୟାର ରୂପ ଦେଇଛନ୍ତି ବୋଲି ସୁରେଶ ଅଭିଯୋଗରେ ଉଲ୍ଲେଖ କରିଛନ୍ତି। ପ୍ରେମ ବ୍ୟାପାରକୁ କେନ୍ଦ୍ରକରି ହତ୍ୟା କରାଯାଇଥିବା ଅଭିଯୋଗ ଆଣିବା ସହ ଏଥିରେ ଜଣେ ଯୁବତୀ ଓ ଦୁଇଜଣ ଯୁବକଙ୍କ ନାମ ଅଭିଯୋଗଫର୍ଦ୍ଦରେ ଦର୍ଶାଇଛନ୍ତି। ଏନେଇ ମୃତକଙ୍କ ମାମୁ ସବ୍ୟସାଚୀ ମଙ୍ଗରାଜ କହିଛନ୍ତି, ଏହା ଏକ ସୁଚିନ୍ତିତ ହତ୍ୟାକାଣ୍ଡ। ହତ୍ୟା କରିବା ପରେ ଫ୍ୟାନରେ ଝୁଲାଇ ଆତ୍ମହତ୍ୟାର ରୂପ ଦିଆଯାଇଛି। ଏଥିରେ ଏକାଧିକଙ୍କ ହାତ ରହିଛି। ନିରପେକ୍ଷ ତଦନ୍ତ କରାଯାଇ ଦୋଷୀଙ୍କୁ ଦଣ୍ଡ ଦିଆଯାଉ। ମୃତକଙ୍କ ଭଉଣୀ କହିଛନ୍ତି, ଗତ କିଛି ବର୍ଷ ହେବ ଜଣେ ଯୁବତୀଙ୍କ ସହ ଭାଇଙ୍କ ସମ୍ପର୍କ ଥିଲା। ତେବେ କୌଣସି କାରଣରୁ ସେମାନଙ୍କର ସମ୍ପର୍କ ଛିନ୍ନ ହୋଇଥିଲା। ଯୁବତୀ ଜଣଙ୍କ ସହଯୋଗୀଙ୍କୁ ଲଗାଇ ହତ୍ୟା କରିଛନ୍ତି। ସେହିପରି ମୃତକଙ୍କ ଭାଇ ରତିକାନ୍ତ କହିଛନ୍ତି, ଏହାର ଉଚ୍ଚସ୍ତରୀୟ ତଦନ୍ତ କରାଯାଉ। ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସେ ଦାବି କରିଛନ୍ତି।

The post ପ୍ରେମ ସମ୍ପର୍କକୁ ନେଇ ଜିଆରଏସ୍‌ଙ୍କୁ ହତ୍ୟା appeared first on Dharitri Odia News.