ବିଜେଡି ଘୋଷଣାକୁ ଭାଜପାର ଅପେକ୍ଷା

ରସୁଲପୁର,୮ା୪(ରଞ୍ଜିତ ରାଉତ):ଯାଜପୁର ଜିଲାର ୭ ବିଧାନସଭା ନିର୍ବାଚନମଣ୍ଡଳୀ ମଧ୍ୟରୁ ୬ଟିରେ ଭାଜପା ପ୍ରାର୍ଥୀ ଘୋଷଣା କରିସାରିଛି। କେବଳ ବରୀ ନିର୍ବାଚନମଣ୍ଡଳୀର ପ୍ରାର୍ଥୀ ଘୋଷଣା ବାକି ରହିଛି। ଏଠି ଦଳ ଜିତିବା ସମ୍ଭାବନା ଥିବା ପ୍ରାର୍ଥତ୍ତ୍ୱକୁ ଅପେକ୍ଷା କରିଛି। ବିଜେଡି ଟିକେଟ ବଣ୍ଟନ ପରେ ଦଳରେ ଯେଉଁ ଅସନ୍ତୋଷ ଓ ଗୋଷ୍ଠୀ କନ୍ଦଳ ଉପୁଜିବ ସେଥିରୁ ଦଳ ଫାଇଦା ମାରିବାକୁ ଅପେକ୍ଷା କରି ପ୍ରାର୍ଥୀ ଘୋଷଣା କରିନାହିଁ ବୋଲି ଆଲୋଚନା ହେଉଛି। ବିଜେଡି ନେତା ତଥା ପୂର୍ବତନ ମନ୍ତ୍ରୀ ଦେବାଶିଷ ନାୟକଙ୍କ ଭାଜପାରେ ସାମିଲ ପରେ ବି ଟିକେଟ ବଣ୍ଟନକୁ ଝୁଲାଇ ରଖିବା ଘଟଣାକୁ ଭିନ୍ନ ଦୃଷ୍ଟିରେ ଦେଖୁଛନ୍ତି ରାଜନୈତିକ ସମୀକ୍ଷକ। ଅନ୍ୟପକ୍ଷରେ ଦଳରୁ ଟିକେଟ ନ ମିଳିଲେ ବିଜେଡି ବିଧାୟିକା ସୁନନ୍ଦା ଦାସ ଦଳ ପରିବର୍ତ୍ତନ କରିପାରନ୍ତି। ବିଧାୟିକା ଟିକେଟ ପ୍ରକ୍ରିୟାରୁ ବାଦ୍‌ ପଡ଼ିଲେ ସେ ଭାଜପାରେ ସାମିଲ ହୋଇ ଦଳରୁ ପ୍ରାର୍ଥୀ ହୋଇପାରନ୍ତି। ଏମିତି କି ଏନେଇ ବିଧାୟିକା ଓ ଭାଜପାର ରାଜ୍ୟ ନେତୃତ୍ୱଙ୍କ ମଧ୍ୟରେ ଭିତିରି ବୁଝାମଣା ହୋଇସାରିଛି ବୋଲି ସାଧାରଣରେ ଆଲୋଚାନ ହେଉଛି।
ଯାଜପୁର ଜିଲାର ୪ ନିର୍ବାଚନମଣ୍ଡଳୀରେ ବିଜେଡି ପ୍ରାର୍ଥୀ ଘୋଷଣା କରିଥିବାବେଳେ ବରୀ, କୋରେଇ ଓ ବଡ଼ଚଣାରେ ପ୍ରାର୍ଥୀ ଘୋଷଣା କରିନାହିଁ। ଏହି ୩ ନିର୍ବାଚନମଣ୍ଡଳୀରେ ଦଳ ପ୍ରାର୍ଥୀ ବଦଳାଇ ନୂଆ ଚେହେରାଙ୍କୁ ନିର୍ବାଚନ ମଇଦାନକୁ ଓହ୍ଲାଇବାକୁ ଚିନ୍ତା କରୁଛି। ତେବେ ଜିଲାର ପ୍ରତ୍ୟେକ ନିର୍ବାଚନମଣ୍ଡଳୀରେ ଭାଜପା ପ୍ରମୁଖ ବିରୋଧୀ ଦଳର ଭୂମିକା ନିର୍ବାହ କରୁଛି। ବରୀରେ ଭାଜପା ୨୦୧୯ରେ ପ୍ରାୟ ୪ ହଜାର ଭୋଟରେ ପରାଜିତ ହୋଇଥିଲା। ତେଣୁ ଏଠାରେ ଏଥର ବିଜୟୀ ହେବା ଦଳର ଲକ୍ଷ୍ୟ ରହିଛି। ହେଲେ କଂଗ୍ରେସ ଛାଡ଼ି ଦଳର ମଙ୍ଗୁଆଳ ସାଜିଥିବା ଉମେଶ ଜେନା, ବିଜେଡି ନେତା ଦେବାଶିଷ ନାୟକ, ଯୁବନେତା ବିବେକାନନ୍ଦ ଜେନାଙ୍କ ଉପରେ ଦଳ ଭରସା କରି ପାରୁନାହିଁ। ତେଣୁ ଭାଜପା ଯୋଗ୍ୟ ପ୍ରାର୍ଥୀ ଖୋଜୁଛି, ଯାହାଙ୍କୁ ଟିକେଟ ଦେଲେ ବରୀରେ ଦଳ ସଫଳ ହୋଇପାରିବ। ଚର୍ଚ୍ଚା ଅନୁସାରେ ବିଜେଡି ବରୀରେ ନୂଆ ମୁହଁ ଉପରେ ଭରସା ଜୁଟାଇଲେ ସେଥିରୁ ଫାଇଦା ନେଇ ଭାଜପା ବିଧାୟିକା ସୁନନ୍ଦାଙ୍କୁ ପ୍ରାର୍ଥୀ କରାଇ ଲକ୍ଷ୍ୟସ୍ଥଳରେ ପହଞ୍ଚତ୍ ପାରିବ ବୋଲି ଚିନ୍ତା କରୁଛି। ତେବେ ଆଗକୁ ବିଜେଡି ବରୀରେ ଟିକେଟ ବଣ୍ଟନରେ କି ପ୍ରକାର ନିଷ୍ପତ୍ତି ନେଉଛି, ଆଉ ଭାଜପାକୁ କେତେ ଫାଇଦା ମିଳୁଛି ତାହା ଦିନ କେଇଟାରେ ସ୍ପଷ୍ଟ ହୋଇଯିବ ବୋଲି କୁହାଯାଉଛି।

The post ବିଜେଡି ଘୋଷଣାକୁ ଭାଜପାର ଅପେକ୍ଷା appeared first on Dharitri Odia News.