ବିଜେପିର ଲୋକସଭା ପ୍ରାର୍ଥୀ ସୂଚୀରେ ୧୬% ମହିଳା, ସେଥିରୁ ବି ଅଧା ରାଜ ପରିବାରର

ନୂଆଦିଲ୍ଲୀ: ବଂଶବାଦର ରାଜନୀତି ଏବଂ ନାରୀ ଶକ୍ତିକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଅନ୍ୟ ପ୍ରମୁଖ ନେତାଙ୍କ ପ୍ରତିବଦ୍ଧତା ସତ୍ତ୍ୱେ, ବିଜେପି ୨୦୨୪ ଲୋକସଭା ପାଇଁ ମହିଳା ପ୍ରାର୍ଥୀଙ୍କ ଚୟନରେ ଭିନ୍ନ ରୂପ ଦେଖିବାକୁ ମିଳୁଛି । ବିଜେପିର ମହିଳା ପ୍ରାର୍ଥୀଙ୍କ ସୂଚୀ ଉପରେ ନଜର ପକାଇଲେ ଜଣାପଡ଼ୁଛି ଯେ ଅତି କମରେ ୪୦ ମହିଳା ପ୍ରାର୍ଥୀ ରାଜନୈତିକ ଏବଂ ରାଜ ପରିବାର ପୃଷ୍ଠଭୂମିରୁ ଆସୁଥିବା ପରିବାର ସହ ଜଡ଼ିତ ଅଛନ୍ତି ।

ଏବେ ସୁଦ୍ଧା ବିଜେପି ୪୧୭ ସଂସଦୀୟ କ୍ଷେତ୍ର ପାଇଁ ପ୍ରାର୍ଥୀଙ୍କ ନାଁ ଘୋଷଣା କରିଛି । ଏଥିରୁ ୬୮ (୧୬ ପ୍ରତିଶତରୁ ଅଧିକ) ମହିଳା ଅଛନ୍ତି । ପାର୍ଟି ୨୦୦୯ରେ ୪୫, ୨୦୧୪ରେ ୩୮ ଏବଂ ୨୦୧୯ରେ ୫୫ ମହିଳା ପ୍ରାର୍ଥୀଙ୍କୁ ମୈଦାନକୁ ଓହ୍ଲାଇଥିଲା ।

ପରନୀତ କୌର, ବାଂସୁରୀ ସ୍ୱରାଜ, ସୀତା ସୋରେନ, ଗୀତା କୋଡ଼ା, ଜ୍ୟୋତି ମିର୍ଧା, ଗାୟତ୍ରୀ ସିଦ୍ଧେଶ୍ୱରା, ନବନୀତ ରାଣ, ମାଲଭିକା ଦେବୀ, କୃତି ସିଂହ ଦେବବର୍ମା, ସଙ୍ଗୀତା ସିଂ ଦେଓ ବିଜେପିର ଏବେ ଯାଏର ପ୍ରମୁଖ ମହିଳା ପ୍ରାର୍ଥୀଙ୍କ ମଧ୍ୟରେ ଅଛନ୍ତି । 

ପୂର୍ବତନ କେନ୍ଦ୍ରମନ୍ତ୍ରୀ ଏବଂ ଆନ୍ଧ୍ର ପ୍ରଦେଶର ବିଜେପି ଅଧ୍ୟକ୍ଷ ଡି.ପୁରନ୍ଦେଶ୍ୱରୀ, ରାଜମୁନ୍ଦରୀରୁ ବିଜେପି ପ୍ରାର୍ଥୀ ହୋଇଛନ୍ତି । ମହାରାଷ୍ଟ୍ରରେ ଛଅ ମହିଳା ପ୍ରାର୍ଥୀଙ୍କୁ ମୈଦାନକୁ ଓହ୍ଲାଇଛି । ଏନସିପି ସହ ନିର୍ବାଚନ ଯାତ୍ରା ଆରମ୍ଭ କରିଥିବା ବର୍ତ୍ତମାନର ସାଂସଦ ଭାରତୀ ପୱାର ଡିଣ୍ଡୋରୀରୁ ପୁଣି ଥରେ ନିର୍ବାଚନ ଲଢିବେ । ଛଅ ଥରର ବିଧାୟକ ଏବଂ ଆଦିବାସୀ ନେତା ବିଜୟ ଗାଭତିଙ୍କ ଝିଅ ବିଜେପି ସାଂସଦ ହୀନା ଗଭାତ ନନ୍ଦୁରବାର ଆସନରୁ ତୃତୀୟ ଥର ପାଇଁ ଓହ୍ଲାଇଛନ୍ତି । ବିଜେପିର ଦିବଗନ୍ତ ନେତା ଗୋପୀନାଥ ମୁଣ୍ଡେଙ୍କ ଝିଅ ଏବଂ ବରିଷ୍ଠ ନେତା ପଙ୍କଜା ମୁଣ୍ଡେ ବିଡ଼ ଆସନରୁ ନିର୍ବାଚନ ଲଢିବେ । 

ବର୍ତ୍ତମାନର ସାଂସଦ ରକ୍ଷା ଖଡସେ ପୁଣି ଥରେ ରାଭେରରୁ ନିର୍ବାଚନ ଲଢିବାକୁ ଯାଉଛନ୍ତି । ସେହିପରି ଜଳଗାଓଁ ଆସନରୁ ସ୍ମିତା ୱାଗଙ୍କୁ ଏବଂ ଅମରାବତୀ ଆସନରୁ ସାଂସଦ ନଭନୀତ ରାଣାଙ୍କୁ ଦଳ ପ୍ରାର୍ଥୀ କରିଛି ।

ସେହିପରି ମଧ୍ୟପ୍ରଦେଶରେ ଛଅ ମହିଳାଙ୍କୁ ପ୍ରାର୍ଥୀ କରିଛି- ହିମାନ୍ଦ୍ରି ସିଂ (ସହଡୋଲ), ସଂଧ୍ୟା ରାୟ (ଭିଣ୍ଡ), ଲତା ୱାଖେଡେ (ସାଗର), ଅନୀତା ଚୌହ୍ୱାନ (ରତଲାମ), ଭାରତୀ ପାରଧୀ (ବାଲାଘାଟ) ଏବଂ ସାବିତ୍ରୀ ଠାକୁର (ଧାର) ।

କିଛି ରାଜ୍ୟରେ ରାଜପରିବାରୁ ଆସୁଥିବା ପ୍ରାର୍ଥୀ

୨୦୧୯ରେ ତିନିରୁ ବିଜେପି ଏବେ ଯାଏ ରାଜସ୍ଥାନରେ ପାଞ୍ଚ ମହିଳା ପ୍ରାର୍ଥୀଙ୍କୁ ଟିକଟ ଦେଇଛି । ଇନ୍ଦୁ ଦେବୀ ଜାଟଭ, ପ୍ରିୟଙ୍କା ବାଲାନ, ମଞ୍ଜୁ ଶର୍ମା, ଜ୍ୟୋତି ମିର୍ଧା ଏବଂ ମହିମା ବିଶ୍ୱରାଜ ସିଂ । ମହିମା ବିଶ୍ୱରାଜ ସିଂଙ୍କ ସମ୍ପର୍କ ମେଭାଡର ପୂର୍ବତନ ରାଜ ପରିବାର ସହ ଅଛି । ଜୟପୁରର ପ୍ରାର୍ଥୀ ମନୁ ଶର୍ମା ବିଜେପିର ବରିଷ୍ଠ ନେତା ଏବଂ ପୂର୍ବତନ ପ୍ରଦେଶ ଅଧ୍ୟକ୍ଷ ଭଉଁର ଲାଲ ଶର୍ମାଙ୍କ ଝିଅ ।

ଓଡ଼ିଶାର ଏବେ ସୁଦ୍ଧା ଘୋଷଣା ହୋଇଥିବା ଚାରି ମହିଳା ପ୍ରାର୍ଥୀଙ୍କ ମଧ୍ୟରୁ ତିନି ଜଣ ସମ୍ପନ୍ନ ପୃଷ୍ଠଭୂମିରୁ ଆସୁଛନ୍ତି । ବଲାଙ୍ଗୀର ସାଂସଦ ସଙ୍ଗୀତା ସିଂ ଦେଓ, ପାଟଣାଗଡ଼ ରାଜ ପରିବାରରୁ ଆସୁଛନ୍ତି । ସେହିପରି ମାଲଭିକା କେଶରୀ ଦେଓ କଳାହାଣ୍ଡିର ରାଜ ପରିବାରରୁ ଆସୁଛନ୍ତି । ଅନୀତା ଶୁଭଦର୍ଶିନୀ ୨୦୧୯ରେ ଆସିକା ଲୋକସଭାରୁ ବିଫଳ ହୋଇଥିଲେ । ଏବେ ପୁଣି ଥରେ ତାଙ୍କୁ ସେହି ଆସନରେ ଦଳ ପ୍ରାର୍ଥୀ କରିଛି । ଅନୀତାଙ୍କ ମାଆ ପୂର୍ବତନ ସାଂସଦ ଥିବା ବେଳେ ତାଙ୍କ ବାପା ରାମକୃଷ୍ଣ ପଟ୍ଟନାୟକ ଛଅ ଥର ବିଧାୟକ ଥିଲେ । ୨୦୧୯ରେ ଆଇଏଏସ ଛାଡ଼ିଥିବା ଭୁବନେଶ୍ୱରରୁ ବର୍ତ୍ତମାନର ସାଂସଦ ଅପରାଜିତା ଷଡଙ୍ଗୀକୁ ପାର୍ଟି ପୁଣି ଥରେ ପ୍ରାର୍ଥୀ କରିଛି ।

ଝାଡଖଣ୍ଡରେ ଦେଇଥିବା ତିନି ମହିଳା ପ୍ରାର୍ଥୀ ରାଜନୈତିକ ପୃଷ୍ଠଭୂମିରୁ ଆସିଛନ୍ତି । ତେବେ ବିହାରରେ ବିଜେପି ବର୍ତ୍ତମାନ ସୁଦ୍ଧା କୌଣସି ମହିଳା ପ୍ରାର୍ଥୀଙ୍କୁ ଟିକଟ ଦେଇ ନାହିଁ । ଉତ୍ତର ପ୍ରଦେଶରେ ରେଖା ବର୍ମା ଏବଂ ମେନକା ଗାନ୍ଧୀ ପ୍ରାର୍ଥୀ ହୋଇଛନ୍ତି ।