ବିନା ପୋଷାକରେ ଓସ୍କାର ଆଓ୍ୱାର୍ଡରେ ପହଞ୍ଚିଲେ ଜନ୍ ସିନା, ଷ୍ଟେଜ୍‌ରେ ହେଲା ହଙ୍ଗାମା

ନୂଆଦିଲ୍ଲୀ ୧୧/୦୩: ବିନା ପୋଷାକରେ ଓସ୍କାର ପୁରସ୍କାର ୨୦୨୪ ରେ ପହଞ୍ଚିଲେ ଜନ ସିନା । ତାଙ୍କୁ ଏପରି ଅବସ୍ଥାରେ ଦେଖି ସୃଷ୍ଟି ହୋଇଥିଲା ଉତ୍ତେଜନା ମୂଳକ ପରିସ୍ଥିତି । ଏମିତିକି ସେଠାରେ ଉପସ୍ଥିତ ଦର୍ଶକ ଜନ ସିନାଙ୍କୁ ଏପରି ଦେଖି ଚକିତ ହୋଇପଡିଥିଲେ । ସୂଚନା ଥାଉକି, ଲସ୍ ଆଞ୍ଜେଲ୍ସର ଡଲବି ଥିଏଟରରେ ଓସ୍କାର ପୁରସ୍କାର ବିଜେତା ସୋ ଚାଲିଥିଲା । 

ସେଠାରେ ଏପରି କିଛି ଘଟିଗଲା ଯାହା ସମସ୍ତଙ୍କୁ ଚକିତ କରି ଦେଇଥିଲା । ବାସ୍ତବରେ ରେସଲର ତଥା ଅଭିନେତା ଜନ୍ ସିନା ବିନା ପୋଷାକରେ ମଞ୍ଚରେ ପହଞ୍ଚିଥିଲେ ।  ସେହି ସମୟ ମଧ୍ୟରେ ସେ ଶ୍ରେଷ୍ଠ ପୋଷାକ ଡିଜାଇନର ବିଜେତାଙ୍କ ନାମ ମଧ୍ୟ ଘୋଷଣା କରିଥିଲେ । ଭାରତୀୟ ସମୟ ମାର୍ଚ୍ଚ ୧୧ତାରିଖ ସକାଳେ ଓସ୍କାର ପୁରସ୍କାର ୨୦୨୪ର ବିଜେତା ଘୋଷିତ ହୋଇଥିଲା । 

ଅନେକ ଚଳଚ୍ଚିତ୍ରକୁ ବିଭିନ୍ନ ବର୍ଗରେ ଏକାଡେମୀ ପୁରସ୍କାର ପ୍ରଦାନ କରାଯାଇଥିଲା । ଏହି ଘଟଣା ଘଟୁଥିବାବେଳେ ସେଠାରେ ଏକ ଆଶ୍ଚର୍ଯ୍ୟଜନକ ଘଟଣା ଘଟିଥିଲା । ପ୍ରକୃତରେ, ଏହି କାର୍ଯ୍ୟକ୍ରମର ଆୟୋଜନ କରୁଥିବା ଜିମି କିମେଲ କହିଥିଲେ ଯେ ୫୦ ବର୍ଷ ପୂର୍ବେ ଜଣେ ବ୍ୟକ୍ତି ବିନା ପୋଷାକରେ ଏକ ପୁରସ୍କାର କାର୍ଯ୍ୟକ୍ରମରେ ପହଞ୍ଚିଥିଲେ । 

ଜିମି ଏହି ବର୍ଷ ପୁରୁଣା ଘଟଣା ବିଷୟରେ କହୁଥିବାବେଳେ ରେସଲର ତଥା ଅଭିନେତା ଜନ୍ ସିନା ମଞ୍ଚ ଉପରେ ଲୁଚିଥିବାର ନଜର ଆସିଥିଲେ । ପରେ ଜନ୍ ସିନା ମଞ୍ଚକୁ ଆସିଥିଲେ, ତାପୁଣି ବିନା ପୋଷାକରେ ।  ତା ପରେ ସେ ଶ୍ରେଷ୍ଠ ପୋଷାକ ଡିଜାଇନର ବିଜେତାଙ୍କ ନାମ ଘୋଷଣା କରିଥିଲେ । ଏହି ସମୟରେ ଜନ୍ କହିଥିଲେ ଯେ ଏବେ ପୋଷାକ ପିନ୍ଧିବା ଉଚିତ୍ । ଏହା ପରେ ଜିମି ତାଙ୍କୁ ଗୋଟିଏ ପୋଷାକ ପିନ୍ଧାଇଥିଲେ । 

କହିବାକୁ ଗଲେ ଏହା ଥିଲା କମିକ୍। ଉଭୟ ଜନ୍ ସିନା ଏବଂ ଜିମି ଏକାଠି ଏମିତି କରିବାର ନିଷ୍ପତ୍ତି ନେଇଥିଲେ । ତେବେ ଏହି ଉପହାସ ଦେଖିବା ପରେ ସେଠାରେ କିଛି ସମୟ ପାଇଁ ଉତ୍ତେଜନା ଦେଖାଦେଇଥିଲା । ସର୍ବଶ୍ରେଷ୍ଠ ପୋଷାକ ଡିଜାଇନ୍ ପାଇଁ ହୋଲି ୱାଡିଙ୍ଗଟନ୍ ପୁରସ୍କାର ଗ୍ରହଣ କରିଥିଲେ ଯାହା ଜନ୍ ସିନା ପ୍ରେଜେଣ୍ଟ କରିବାକୁ ଆସିଥିଲେ । ଫିଲ୍ମ ପୋର ଥିଙ୍ଗସ୍ ପାଇଁ ତାଙ୍କୁ ଏହି ପୁରସ୍କାର ଦିଆଯାଇଛି ।