ବିବାଦ ଭିତରେ ବି ବାଂଲାଦେଶରେ ଭାରତର ଏହି ଖାଦ୍ୟର ଚାହିଦା ଅଧିକ, ଏତେ ହୋଇଛି ରପ୍ତାନୀ

ନୂଆଦିଲ୍ଲୀ,୨୩।୩: ଉତ୍ତର ପ୍ରଦେଶର ମୁଜାଫରନଗରରୁ ଜିଆଇ ଟ୍ୟାଗ ବାଜିଥିବା 30 ଟନ ଗୁଡ଼ ବାଂଲାଦେଶକୁ ପଠାଯାଇଛି। ଶନିବାର ଏକ ସରକାରୀ ବିବୃତ୍ତିରେ ଏହି ସୂଚନା ଦିଆଯାଇଛି। ମୁଜାଫରନଗର ଅଞ୍ଚଳ ଏହାର ଉଚ୍ଚମାନର ଆଖୁ ପାଇଁ ପ୍ରସିଦ୍ଧ। GI (ଭୌଗୋଳିକ ସୂଚକ) ମୁଖ୍ୟତଃ ଏକ ର୍ନିଦ୍ଦିଷ୍ଟ ଭୌଗୋଳିକ ଅଞ୍ଚଳରେ ମିଳୁଥିବା କୃଷି, ପ୍ରାକୃତିକ କିମ୍ବା ର୍ନିମିତ ଉତ୍ପାଦ (ହସ୍ତଶିଳ୍ପ ଏବଂ ଶିଳ୍ପ ସାମଗ୍ରୀ)। ଏହି ଚିହ୍ନଟକରଣ ଉତ୍ପାଦର ଗୁଣବତ୍ତା ଏବଂ ଅନନ୍ୟତା ସୁନିଶ୍ଚିତ କରେ।

ବିବୃତ୍ତିରେ କୁହାଯାଇଛି, ପଶ୍ଚିମ ଉତ୍ତର ପ୍ରଦେଶରୁ ବାଂଲାଦେଶକୁ ସିଧାସଳଖ ଗୁଡ଼ ରପ୍ତାନି କୃଷକ ଉତ୍ପାଦକ ସଂଗଠନ (FPO) ଏବଂ କୃଷକ ଉତ୍ପାଦକ କମ୍ପାନୀ (FPC) ମାଧ୍ୟମରେ ଆରମ୍ଭ ହେଉଛି। ବାଣିଜ୍ୟ ମନ୍ତ୍ରଣାଳୟ ଏହା ମଧ୍ୟ କହିଛି ଯେ ଭାରତ ମିଜୋରାମରୁ ସିଙ୍ଗାପୁରକୁ ଆନ୍ଥୁରିୟମ ଫୁଲର ରପ୍ତାନି ମଧ୍ୟ କରିଛି। ମିଜୋରାମରେ ଚାଷ ହେଉଥିବା ସବୁଠାରୁ ଗୁରୁତ୍ୱପୂର୍ଣ୍ଣ ଫୁଲ ମଧ୍ୟରୁ ଆନ୍ଥୁରିୟମ ଗୋଟିଏ, ଯାହା ସ୍ଥାନୀୟ ଆର୍ଥିକ କାର୍ଯ୍ୟକଳାପକୁ ବୃଦ୍ଧି କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ।

ଗୁଡ଼ ଉତ୍ପାଦନରେ ଉତ୍ତର ପ୍ରଦେଶ ଦେଶରେ ଏକ ନମ୍ବର। ଆପଣଙ୍କୁ କହିରଖୁଛୁ ଯେ ପଶ୍ଚିମ ଉତ୍ତର ପ୍ରଦେଶରେ ବ୍ୟାପକ ଭାବରେ ଆଖୁ ଚାଷ କରାଯାଏ। ଏହା ସହିତ, ଏଠାରେ ଅନେକ ଭଲ ମିଲ ଅଛି ଯାହା ଚିନି ଏବଂ ଗୁଡ଼ ତିଆରି କରେ। ଏପରି ପରିସ୍ଥିତିରେ, ୟୁପି ସରକାର ରାଜ୍ୟରେ ଗୁଡ଼ ଉତ୍ପାଦନରେ ଚାଷୀମାନଙ୍କୁ ମଧ୍ୟ ସାହାଯ୍ୟ କରନ୍ତି। ଯାହା ଯୋଗୁଁ ଉତ୍ତର ପ୍ରଦେଶର ଗୁଡ଼ର ଚାହିଦା ଦେଶ ଏବଂ ବିଦେଶରେ ଦ୍ରୁତ ଗତିରେ ବୃଦ୍ଧି ପାଇଛି।

ଗୁଡ଼ ତିଆରି କରିବାର ପାରମ୍ପରିକ ପ୍ରକ୍ରିୟା ବହୁତ ଆକର୍ଷଣୀୟ। ପ୍ରଥମେ, ଆଖୁକୁ ପେଷି ଏହାର ରସ ବାହାର କରାଯାଏ। ତା’ପରେ ଏହାକୁ ବଡ଼ କଡେଇରେ ଫୁଟାଯାଏ ଏବଂ ଅପରିଷ୍କାର ପଦାର୍ଥ ବାହାର କରିବା ପାଇଁ ଏକ ଛାଣି ପ୍ରକ୍ରିୟା କରାଯାଏ। ଏହା ଧୀରେ ଧୀରେ ଘନ ହେବା ସହିତ, ଏହାକୁ ଥଣ୍ଡା କରାଯାଇ ଏକ କଠିନ ଆକାରରେ ଛାଞ୍ଚ କରାଯାଏ। ଏହି ପ୍ରକ୍ରିୟା ସମ୍ପୂର୍ଣ୍ଣ ପ୍ରାକୃତିକ ଏବଂ ଏଥିରେ କୌଣସି ରାସାୟନିକ ପଦାର୍ଥ ମିଶାଯାଏ ନାହିଁ।

The post ବିବାଦ ଭିତରେ ବି ବାଂଲାଦେଶରେ ଭାରତର ଏହି ଖାଦ୍ୟର ଚାହିଦା ଅଧିକ, ଏତେ ହୋଇଛି ରପ୍ତାନୀ appeared first on Dharitri Odia News.