ଭାରତ ଫେରିବେ ୨୬/୧୧ ଆକ୍ରମଣର ଅଭିଯୁକ୍ତ ତହୱୁର ରାଣା, ଏହି ତାରିଖରେ NIA ଟିମ ଯିବ ଆମେରିକା

ନୂଆଦିଲ୍ଲୀ,୨୮।୧: ୨୬/୧୧ ମୁମ୍ବାଇ ଆକ୍ରମଣ ଅଭିଯୁକ୍ତ ତହୱୁର ରାଣାଙ୍କ ପ୍ରତ୍ୟର୍ପଣ ପାଇଁ ରାଷ୍ଟ୍ରୀୟ ତଦନ୍ତ ଏଜେନ୍ସି (NIA)ର ଏକ ଦଳ ଖୁବ ଶୀଘ୍ର ଆମେରିକା ଯିବ। ଏଥିପାଇଁ ପ୍ରସ୍ତୁତି ଆରମ୍ଭ ହୋଇସାରିଛି। ଗୋଟିଏ ପଟେ, ଏନଆଇଏ ଆମେରିକା ଯାଉଥିବା ଅଧିକାରୀଙ୍କ ତାଲିକା ଗୃହ ମନ୍ତ୍ରଣାଳୟକୁ ହସ୍ତାନ୍ତର କରିଛି, ଅନ୍ୟପଟେ, ଭାରତୀୟ ବୈଦେଶିକ ମନ୍ତ୍ରଣାଳୟ ଏହି ମାମଲାରେ ଆମେରିକୀୟ ଅଧିକାରୀଙ୍କ ସହ ଆଲୋଚନା କରୁଛି।
ଇଣ୍ଡିଆନ ଏକ୍ସପ୍ରେସରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ସମ୍ଭବତଃ ଜାନୁଆରୀ ୩୦ତାରିଖରେ, ଏକ ଚାରି ଜଣିଆ ଏନଆଇଏ ଦଳ ତହୱୁର ରାଣାଙ୍କ ପ୍ରତ୍ୟର୍ପଣ ପାଇଁ ଔପଚାରିକତା ପୂରଣ କରିବା ପାଇଁ ଆମେରିକା ଯାତ୍ରା କରିବ। ଏହି ଖବରକାଗଜ ଗୃହ ମନ୍ତ୍ରଣାଳୟ ସୂତ୍ରକୁ ଉଦ୍ଧୃତ କରି କହିଛି ଯେ ଏହି ଚାରି ସଦସ୍ୟ ବିଶିଷ୍ଟ ଦଳରେ ଆଇଜି ଏବଂ ଡିଆଇଜି ର଼୍ୟାଙ୍କର ଦୁଇଜଣ ବରିଷ୍ଠ ଅଧିକାରୀ ଏବଂ ଦୁଇଜଣ କନିଷ୍ଠ ଅଧିକାରୀ ରହିବେ। ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଏନଆଇଏ ତାଙ୍କ ଦଳର ବିବରଣୀ ଗୃହ ମନ୍ତ୍ରଣାଳୟକୁ ପ୍ରଦାନ କରିଛି ଏବଂ ବର୍ତ୍ତମାନ ଗୃହ ଏବଂ ବୈଦେଶିକ ବ୍ୟାପାର ମନ୍ତ୍ରଣାଳୟ ରାଣାର ପ୍ରତ୍ୟର୍ପଣ ପାଇଁ ଆମେରିକୀୟ କର୍ତ୍ତୃପକ୍ଷଙ୍କ ସହ ଚୂଡ଼ାନ୍ତ ଆଲୋଚନା କରୁଛନ୍ତି। ରିପୋର୍ଟରେ ଏହା ମଧ୍ୟ ପ୍ରକାଶ ପାଇଛି ଯେ ତିହାର ଜେଲ ପ୍ରଶାସନ ତହୱୁର ରାଣାଙ୍କ ପାଇଁ ଏକ ଉଚ୍ଚ ସୁରକ୍ଷା ଜେଲ ୱାର୍ଡ ନିର୍ମାଣ ପାଇଁ ପ୍ରସ୍ତୁତି ଆରମ୍ଭ କରିଛି।

The post ଭାରତ ଫେରିବେ ୨୬/୧୧ ଆକ୍ରମଣର ଅଭିଯୁକ୍ତ ତହୱୁର ରାଣା, ଏହି ତାରିଖରେ NIA ଟିମ ଯିବ ଆମେରିକା appeared first on Dharitri Odia News.