ମୋଦିଙ୍କ ବଡ଼ ଗେମ୍‌ ପ୍ଲାନ୍‌, ଚକ୍ରବ୍ୟୁହରେ ଫସିଗଲେ ୟୁନୁସ: ଏବେ ଭୟରେ ଛାଡ଼ିଦେବେ ଗାଦି!

ଢାକା,୨୩।୫: ବାଂଲାଦେଶରେ ରାଜନୈତିକ ସଙ୍କଟ ଘନିଭୂତ ହେବାରେ ଲାଗିଛି। ମହମ୍ମଦ ୟୁନୁସଙ୍କ ନେତୃତ୍ୱାଧୀନ ସରକାର ଯେକୌଣସି ସମୟରେ ପତନ ହୋଇପାରେ ଏବଂ ସରକାର ମୁଖ୍ୟ ମହମ୍ମଦ ୟୁନୁସ ଇସ୍ତଫା ଦେବାକୁ ବିଚାର କରୁଛନ୍ତି। କେବଳ ଏତିକି ନୁହେଁ, ସେନା ମୁଖ୍ୟ ଜେନେରାଲ ୱାକର-ଉଜ-ଜମାନ ୟୁନୁସଙ୍କୁ ସିଧାସଳଖ ଚେତାବନୀ ଦେଇଛନ୍ତି ବୋଲି ଜଣାପଡ଼ିଛି। ଏହି ଚେତାବନୀ ହେଉଛି ଡିସେମ୍ବର ସୁଦ୍ଧା ଜାତୀୟ ନିର୍ବାଚନ କରିବା। ଏହା ବ୍ୟତୀତ ସଂଖ୍ୟାଲଘୁଙ୍କ ବିରୋଧରେ ହିଂସା ସମେତ ଅନେକ ପ୍ରସଙ୍ଗରେ ମହମ୍ମଦ ୟୁନୁସଙ୍କୁ ଚାରିପାଖରୁ ଘେରି ରଖାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ସାକ୍ଷାତକାରର ମାତ୍ର ୩ ମାସ ପରେ ଏସବୁ ଘଟୁଛି।

ବାଂଲାଦେଶରେ ବିଦ୍ରୋହ ହେବା ପରଠାରୁ, ମହମ୍ମଦ ୟୁନୁସ ଭାରତ ବିରୋଧରେ ଷଡ଼ଯନ୍ତ୍ର ରଚନା କରିବାକୁ ଚେଷ୍ଟା କରୁଛନ୍ତି। କେବଳ ଏତିକି ନୁହେଁ, ସେ ଦେଶରେ ହିନ୍ଦୁ ସମ୍ପ୍ରଦାୟ ବିରୋଧରେ ହେଉଥିବା ହିଂସାକୁ ମଧ୍ୟ ରୋକିବାରେ ସଫଳ ହୋଇ ନ ଥିଲେ, ଯାହାର ଭାରତ ତୀବ୍ର ପ୍ରତିବାଦ କରିଥିଲା। ଚଳିତ ବର୍ଷ ଆମେରିକା ଗସ୍ତ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାଂଲାଦେଶର ପରିସ୍ଥିତି ବିଷୟରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ତାଙ୍କର ଚିନ୍ତା ପ୍ରକାଶ କରିଥିଲେ। ଟ୍ରମ୍ପ ଭାରତକୁ ଖୋଲା ଅଧିକାର ଦେଇଥିଲେ ଏବଂ ତିନି ମାସ ମଧ୍ୟରେ ବାଂଲାଦେଶର ୟୁନୁସ ସରକାର ଆଣ୍ଠୁ ମାଡ଼ି ବସିବାକୁ ବାଧ୍ୟ ହେଉଛି।
ପ୍ରଧାନମନ୍ତ୍ରୀ ମୋଦି ଚଳିତ ବର୍ଷ ଫେବୃଆରୀରେ ନୂତନ ଆମେରିକା ରାଷ୍ଟ୍ରପତି ଟ୍ରମ୍ପଙ୍କୁ ଭେଟିବାକୁ ଆସିଥିଲେ। ଏହି ସମୟରେ, ଦ୍ୱିପାକ୍ଷିକ ବୈଠକ ପରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବାଂଲାଦେଶ ସଙ୍କଟରେ କୌଣସି ପ୍ରକାରର ଆମେରିକାର ହସ୍ତକ୍ଷେପକୁ ପ୍ରତ୍ୟାଖ୍ୟାନ କରିଥିଲେ। ବୈଠକ ପରେ ବାଂଲାଦେଶର ଚାଲିଥିବା ପରିସ୍ଥିତିରେ ଆମେରିକାର ଭୂମିକା କ’ଣ ପ୍ରଶ୍ନରେ ଟ୍ରମ୍ପ କହିଥିଲେ, ମୁଁ ଏହା ବିଷୟରେ ପଢ଼ୁଛି। ମୁଁ ବାଂଲାଦେଶକୁ ପ୍ରଧାନମନ୍ତ୍ରୀଙ୍କ ଉପରେ ଛାଡି ଦେଉଛି।

ଛାତ୍ର-ନେତୃତ୍ୱାଧୀନ ନ୍ୟାଶନାଲ ସିଟିଜେନ ପାର୍ଟି (ସିପି)ର ମୁଖ୍ୟ ନିଦ ଇସଲାମ କହିଛନ୍ତି, ଆମେ ୟୁନୁସ ଇସ୍ତଫା ଦେବା ଖବର ଶୁଶୁଛୁ। ମୁଁ ସେହି ପ୍ରସଙ୍ଗରେ ଆଲୋଚନା କରିବା ପାଇଁ ତାଙ୍କୁ ଭେଟିବାକୁ ଯାଇଥିଲି ସେ କହିଛନ୍ତି ଯେ ସେ ଏହା ବିଷୟରେ ଚିନ୍ତା କରୁଛନ୍ତି। ଯେପର୍ଯ୍ୟନ୍ତ ରାଜନୈତିକ ଦଳଗୁଡ଼ିକ ଏକ ସହମତିରେ ପହଞ୍ଚିବେ ନାହିଁ, ମୁଁ କାମ କରିପାରିବି ନାହିଁ ବୋଲି ସେ ସ୍ପଷ୍ଟ କରିଛନ୍ତି।

ତତ୍କାଳୀନ ପ୍ରଧାନମନ୍ତ୍ରୀ ଶେଖ ହାସିନାଙ୍କୁ କ୍ଷମତାରୁ ହଟାଇବାରେ ସେନାର ମଧ୍ୟ ଏକ ବଡ଼ ଭୂମିକା ଥିଲା। ଏବେ ୟୁନୁସ ସରକାରଙ୍କୁ ମଧ୍ୟ ଏହି ସେନା ପକ୍ଷରୁ ଏକ ବଡ଼ ଚେତାବନୀ ମିଳୁଛି। ସେନା ମୁଖ୍ୟ ଜେନେରାଲ ୱାକର-ଉଜ-ଜମାନ କହିଛନ୍ତି, ବାଂଲାଦେଶ ସେନା କେବେବି ଏପରି କୌଣସି କାର୍ଯ୍ୟକଳାପରେ ଲିପ୍ତ ହେବ ନାହିଁ ଯାହା ସାର୍ବଭୌମତ୍ୱ ପାଇଁ କ୍ଷତିକାରକ। ଏହା କରିବାକୁ କାହାକୁ ଅନୁମତି ଦିଆଯିବ ନାହିଁ। ଯେକୌଣସି କାର୍ଯ୍ୟରେ ଜାତୀୟ ସ୍ବାର୍ଥ ପ୍ରଥମେ ଆସିବା ଉଚିତ, ଯାହା ବି କରାଯାଏ ତାହା ରାଜନୈତିକ ସହମତି ଦ୍ୱାରା ପରିଚାଳିତ ହେବା ଉଚିତ। ୟୁନୁସଙ୍କ ପ୍ରତି ସେନାମୁଖ୍ୟଙ୍କ ବାର୍ତ୍ତା ସ୍ପଷ୍ଟ ଯେ ସେ ଯାହା ଇଚ୍ଛା ତାହା କରିପାରିବେ ନାହିଁ।

ଗତବର୍ଷ ବହିଷ୍କୃତ ପ୍ରଧାନମନ୍ତ୍ରୀ ଶେଖ ହାସିନା ଢାକା ଛାଡିବା ପରେ ଭାରତ ଏବଂ ବାଂଲାଦେଶ ମଧ୍ୟରେ ସମ୍ପର୍କ ବହୁତ ଉତ୍ତେଜନାପୂର୍ଣ୍ଣ ହୋଇଯାଇଛି। ବାଂଲାଦେଶରେ ହିନ୍ଦୁମାନଙ୍କ ଉପରେ ନିରନ୍ତର ଆକ୍ରମଣ ହେଉଛି, ଯାହା କାରଣରୁ ଦ୍ୱିପାକ୍ଷିକ ସମ୍ପର୍କ କ୍ରମାଗତ ଭାବରେ ତିକ୍ତ ହେବାରେ ଲାଗିଛି। ବାଂଲାଦେଶରେ, ଅଗଷ୍ଟ ୨୦୨୪ରେ, ଛାତ୍ରଙ୍କ ନେତୃତ୍ୱରେ ଏକ ଆନ୍ଦୋଳନ କିଛି ସପ୍ତାହର ପ୍ରତିବାଦ ଏବଂ ହିଂସା ପରେ ପ୍ରଧାନମନ୍ତ୍ରୀ ଶେଖ ହାସିନାଙ୍କୁ କ୍ଷମତାରୁ ହଟାଇ ଦେଇଥିଲା। ଏହି ଆନ୍ଦୋଳନରେ ୬୦୦ରୁ ଅଧିକ ଲୋକ ପ୍ରାଣ ହରାଇଥିଲେ। ୭୬ ବର୍ଷୀୟା ହାସିନା ଭାରତ ପଳାଇଗଲେ ଏବଂ ନୋବେଲ ପୁରସ୍କାର ବିଜେତା ମହମ୍ମଦ ୟୁନୁସଙ୍କ ନେତୃତ୍ୱରେ ଏକ ମଧ୍ୟବର୍ତ୍ତୀକାଳୀନ ସରକାର ଗଠନ କରାଗଲା।

The post ମୋଦିଙ୍କ ବଡ଼ ଗେମ୍‌ ପ୍ଲାନ୍‌, ଚକ୍ରବ୍ୟୁହରେ ଫସିଗଲେ ୟୁନୁସ: ଏବେ ଭୟରେ ଛାଡ଼ିଦେବେ ଗାଦି! appeared first on Dharitri Odia News.