ମୋଦିଙ୍କୁ ନେଇ କହୁ କହୁ ଏମିତି କହିଦେଲେ ଅମିତ ଶାହା

ନୂଆଦିଲ୍ଲୀ,୫।୮: କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ବିରୋଧୀଙ୍କୁ ଟାର୍ଗେଟ୍‌ କରିଛନ୍ତି। ସେ କହିଛନ୍ତି, ବିରୋଧୀଦଳ ଯେଉଁମାନେ କହୁଛନ୍ତି ଯେ ସରକାର ୫ ବର୍ଷ ପର୍ଯ୍ୟନ୍ତ ରହିବେ ନାହିଁ, ମୁଁ ସେମାନଙ୍କୁ କହିବାକୁ ଚାହେଁ ଯେ ମୋଦି ସରକାର କେବଳ ୫ ବର୍ଷ ପର୍ଯ୍ୟନ୍ତ ରହିବେ ନାହିଁ, ଏହା ପରେ ମଧ୍ୟ ଏନଡିଏ ସରକାର ଗଠନ ହେବ।
ସ୍ମାର୍ଟ ସିଟି ମିଶନ ଅଧୀନରେ ନିର୍ମିତ ୨୪ ଘଣ୍ଟିଆ ଜଳ ଯୋଗାଣ ପ୍ରକଳ୍ପର ଉଦଘାଟନ କରିବା ପାଇଁ ଚଣ୍ଡିଗଡ଼ରେ ଆସିଥିବା ଅମିତ ଶାହା ମୋଦି ସରକାରଙ୍କ ସଫଳତାକୁ ଗଣନା କରିଥିଲେ। ସେ କହିଛନ୍ତି, ୧୦ ବର୍ଷ ମଧ୍ୟରେ ଦେଶ ଅନେକ ଜିନିଷ ହାସଲ କରିଛି। ଚନ୍ଦ୍ରରେ ପତାକା ଉତ୍ତୋଳନ ହେବାଠାରୁ ଆରମ୍ଭ କରି ସର୍ଜିକାଲ ଷ୍ଟ୍ରାଇକ ଏବଂ ଏୟାର ଷ୍ଟ୍ରାଇକ କରି ଶତ୍ରୁମାନଙ୍କୁ ଉପଯୁକ୍ତ ଜବାବ ଦେଇଛୁ। କଶ୍ମୀରରୁ ଧାରା ୩୭୦ ରଦ୍ଦ କରି ରାମ ମନ୍ଦିର ନିର୍ମାଣ କରିଛୁ। ଦେଶର ଲୋକମାନେ ପ୍ରତ୍ୟେକ କ୍ଷେତ୍ରରେ ବିକାଶ ପାଇଁ ଏକ ନୂତନ ମାଧ୍ୟମ ଅନୁଭବ କରିଛନ୍ତି।
ଅମିତ ଶାହା ଆହୁରି ମଧ୍ୟ କହିଛନ୍ତି, ମୋଦି ସରକାରଙ୍କ କାର୍ଯ୍ୟ ହେତୁ ୬୦ ବର୍ଷ ପରେ କ୍ରମାଗତ ତୃତୀୟ ଥର ପାଇଁ ଏକ ସରକାର ପୂର୍ଣ୍ଣ ସଂଖ୍ୟାଗରିଷ୍ଠତା ସହ କ୍ଷମତାକୁ ଆସିଛି। ମୋଦି ଜିଙ୍କ କାର୍ଯ୍ୟରେ ଦେଶର ଲୋକମାନେ ଏକ ଷ୍ଟାମ୍ପ ଲଗାଇଛନ୍ତି। ବିରୋଧୀ ଯାହା ଚାହାଁନ୍ତି ତାହା କରନ୍ତୁ। ୨୦୨୯ ରେ କେବଳ ଏନଡିଏ କ୍ଷମତାକୁ ଆସିବ .. କେବଳ ମୋଦି ଜୀ ଆସିବେ।

The post ମୋଦିଙ୍କୁ ନେଇ କହୁ କହୁ ଏମିତି କହିଦେଲେ ଅମିତ ଶାହା appeared first on Dharitri Odia News.