ଯଦି କୌଣସି ଦେଶ ପରମାଣୁ ବୋମା ପକାଇ ଦିଏ ଏହାର ବିକିରଣରୁ ବଞ୍ଚିବାର ଉପାୟ କ’ଣ? ଜାଣନ୍ତୁ କାମର କଥା

ନୂଆଦିଲ୍ଲୀ,୮ା୫: ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ପ୍ରାୟ ୧୫ ଦିନ ପରେ ଭାରତ ପାକିସ୍ତାନ ଉପରେ ଆକ୍ରମଣ କରିଛି। ଭାରତୀୟ ସେନା ଅପରେସନ ସିନ୍ଦୂର ଅଧୀନରେ ପାକିସ୍ତାନ ଏବଂ ପାକିସ୍ତାନ ଅଧିକୃତ କାଶ୍ମୀରରେ ଆତଙ୍କବାଦୀଙ୍କର ୯ଟି ଅଡ୍ଡା ଉପରେ ମିସାଇଲ ଆକ୍ରମଣ କରି ଅନେକ ଆତଙ୍କବାଦୀଙ୍କୁ ହତ୍ୟା କରିଛି। ଏହି ଆକ୍ରମଣରେ ଜୈଶ-ଏ-ମହମ୍ମଦ, ଲସ୍କର-ଏ-ତୈୟବା ପରି ଆତଙ୍କବାଦୀ ସଂଗଠନଙ୍କ ଅଡ୍ଡାକୁ ଟାର୍ଗେଟ କରାଯାଇଛି। ଭାରତ ପକ୍ଷରୁ ଏହି କାର୍ଯ୍ୟାନୁଷ୍ଠାନ ଏକ ଏପରି ସମୟରେ କରାଯାଇଛି, ଯେତେବେଳେ ପାକିସ୍ତାନ ନିରନ୍ତର ଭାରତକୁ ପରମାଣୁ ଆକ୍ରମଣର ଧମକ ଦେଉଛି।

ଜଣାଇ ରଖୁଛୁ, ଭାରତ ଏବଂ ପାକିସ୍ତାନ ଉଭୟ ପରମାଣୁ ଶକ୍ତି ସମ୍ପନ୍ନ ଦେଶ। ପହଲଗାମ ଆତଙ୍କବାଦୀ ଆକ୍ରମଣ ପରେ ପାକିସ୍ତାନ ଭାରତର ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନକୁ ଭୟ କରୁଛି ଏବଂ ଭାରତକୁ ପରମାଣୁ ଆକ୍ରମଣର ଧମକ ଦେଉଛି। ତେବେ, ଭାରତ ପାକିସ୍ତାନକୁ ତା’ର ନିଜ ଭାଷାରେ କଡ଼ା ଜବାବ ଦେଇଛି। ଏପରି ପରିସ୍ଥିତିରେ ଯଦି ପାକିସ୍ତାନ ମଧ୍ୟ ଭାରତ ଉପରେ ଆକ୍ରମଣ କରେ ଏବଂ ଯୁଦ୍ଧ ପରି ପରିସ୍ଥିତି ସୃଷ୍ଟି ହୁଏ, ତେବେ ପାକିସ୍ତାନ ପରମାଣୁ ବୋମାର ବ୍ୟବହାର କରିପାରେ।

ବିସ୍ଫୋରଣଠାରୁ ଅଧିକ ଘାତକ ହେଉଛି ତା’ର ବିକିରଣ
ପରମାଣୁ ବୋମା ହେଉଛି ବିଶ୍ୱର ସବୁଠାରୁ ବିପଜ୍ଜନକ ଅସ୍ତ୍ର। ଏହାର ଶେଷ ବ୍ୟବହାର ଦ୍ୱିତୀୟ ବିଶ୍ୱଯୁଦ୍ଧ ସମୟରେ ହୋଇଥିଲା, ଯେତେବେଳେ ଆମେରିକା ଜାପାନର ହିରୋଶିମା ଏବଂ ନାଗାସାକି ଉପରେ ପରମାଣୁ ବୋମା ଫୋପାଡିଥିଲା। ଏହି ଆକ୍ରମଣରେ ହିରୋଶିମାରେ କିଛି ମିନିଟରେ ପ୍ରାୟ ୮୦ ହଜାର ଲୋକଙ୍କର ମୃତ୍ୟୁ ହୋଇଥିଲା। ବିସ୍ଫୋରଣ ଯୋଗୁଁ ଏତେ ତାପମାତ୍ରା ସୃଷ୍ଟି ହୋଇଥିଲା ଯେ ଅନେକ ଲୋକ ଜଳି ଯାଇଥିଲେ। ଏହାଛଡା, ଆକ୍ରମଣ ପରେ ଏତେ ବିପଜ୍ଜନକ ବିକିରଣ ବ୍ୟାପିଥିଲା ଯେ ପରେ ମଧ୍ୟ ଅନେକ ଲୋକଙ୍କର ମୃତ୍ୟୁ ହୋଇଥିଲା। ଏହି ବିକିରଣର ପ୍ରଭାବ ହିରୋଶିମାରେ ଆଜି ମଧ୍ୟ ଦେଖାଯାଉଛି। ଅନ୍ୟପକ୍ଷରେ, ନାଗାସାକିରେ ପରମାଣୁ ଆକ୍ରମଣ ପରେ ସହରର ୮୦ ପ୍ରତିଶତ ଅଂଶ ଧ୍ୱଂସ ହୋଇଯାଇଥିଲା।

ବିକିରଣରୁ କିପରି ବଞ୍ଚି ପାରିବେ?
ପ୍ରଥମେ ଜାଣି ରଖନ୍ତୁ ଯେ ଯଦି କୌଣସି ଦେଶ ପରମାଣୁ ଆକ୍ରମଣ କରେ, ତେବେ ବଞ୍ଚିବା ପାଇଁ ବହୁତ କମ ସମୟ ମିଳେ, କାରଣ ବିସ୍ଫୋରଣ ପରେ ତାପ ଏବଂ ଶକ୍ତି ବହୁତ ଦ୍ରୁତ ଗତିରେ ସୃଷ୍ଟି ହୁଏ ଓ ବ୍ୟାପିଥାଏ। ସବୁଠାରୁ ବିପଜ୍ଜନକ ହେଉଛି ଏହାର ବିକିରଣ, ଯାହା ଅନେକ କିଲୋମିଟର ପର୍ଯ୍ୟନ୍ତ ବ୍ୟାପିଥାଏ। ଏପରି ପରିସ୍ଥିତିରେ ବିକିରଣରୁ ବଞ୍ଚିବା ପାଇଁ ଦୂରକୁ ପଳାଇବାର ଚେଷ୍ଟା ନ କରି ଯେଉଁଠି ଜାଗା ମିଳେ, ସେଠାରେ ନିଜକୁ ଲୁଚାଇ ରଖନ୍ତୁ ଏବଂ ଆଗାମୀ ୨୪ ଘଣ୍ଟା ପର୍ଯ୍ୟନ୍ତ ବାହାରକୁ ନ ବାହାରନ୍ତୁ। ଆପଣ ଯେଉଁ ପୋଷାକ ପିନ୍ଧିଛନ୍ତି, ତାହାକୁ ତୁରନ୍ତ ଖୋଲି ଦିଅନ୍ତୁ ଏବଂ ଏହାକୁ ଏକ ପ୍ଲାଷ୍ଟିକ ବ୍ୟାଗରେ ବନ୍ଦ କରି ମଣିଷ ଓ ପଶୁଙ୍କ ପହଞ୍ଚରୁ ଦୂରେଇ ରଖନ୍ତୁ, କାରଣ ପୋଷାକରେ ବିକିରଣ ରହିବାର ସମ୍ଭାବନା ସବୁଠାରୁ ଅଧିକ। ଏହାପରେ ଗାଧୋଇ ନିଅନ୍ତୁ ଏବଂ ସାବୁନ ବ୍ୟବହାର କରି ନିଜକୁ ପରିଷ୍କାର କରନ୍ତୁ। ଧ୍ୟାନ ରଖନ୍ତୁ ଶରୀରକୁ ଅତ୍ୟଧିକ ଘଷନ୍ତୁ ନାହିଁ ଏବଂ ଆଖି, ନାକ ଓ କାନକୁ କେବଳ ପରିଷ୍କାର କପଡା ଦ୍ୱାରା ସଫା କରନ୍ତୁ।

The post ଯଦି କୌଣସି ଦେଶ ପରମାଣୁ ବୋମା ପକାଇ ଦିଏ ଏହାର ବିକିରଣରୁ ବଞ୍ଚିବାର ଉପାୟ କ’ଣ? ଜାଣନ୍ତୁ କାମର କଥା appeared first on Dharitri Odia News.