ରାଜା ଚକ୍ରଙ୍କୁ ନେଇ ସାଂସଦ ମମତା ମହାନ୍ତଙ୍କ ବିସ୍ଫୋରକ ବୟାନ, କହିଲେ-ବବି, ପାଣ୍ଡିଆନ୍ ଯୋଗୁ...

ଭୁବନେଶ୍ୱର: କିଏ ଦେଇଥିଲା ରାଜାଙ୍କୁ ଏତେ ପାୱାର ? ପାଣ୍ଡିଆନ ଓ ବବି ଯୋଗୁ ପାୱାରଫୁଲ ଥିଲେ ରାଜା ଚକ୍ର । ୨୪ ବର୍ଷର ଶାସନରେ ସବୁଠି ମାଫିଆଙ୍କ ଦବଦବା ଥିଲା । ଧନୀ ଜିଲ୍ଲା କେନ୍ଦୁଝରରେ ରାଜା ଚକ୍ର ସବୁଠୁ ପ୍ରଭାବଶାଳୀ ଥିଲେ । ସମସ୍ତେ ତାଙ୍କ କଥାରେ ଚାଲୁଥିଲେ ବୋଲି ବିସ୍ଫୋରକ ମନ୍ତବ୍ୟ ଦେଇଛନ୍ତି ବିଜେପି ସାଂସଦ ମମତା ମାହନ୍ତ । ଏହାସହ ସେ କହିଛନ୍ତି ଯେ ମୋହନ ସରକାରରେ ଯିଏ ଦୁର୍ନୀତି କରିବ ସେ ଦଣ୍ଡ ପାଇବ ।

ଉଲ୍ଲେଖଯୋଗ୍ୟ ଯେ ଓଡ଼ିଶା ଖଣି ନିଗମ ସହ ଅନୁବନ୍ଧିତ କେନ୍ଦୁଝର ଗନ୍ଧମାର୍ଦ୍ଦନ ଲୋଡିଂ ଏଜେନ୍ସିରେ ଶହ ଶହ କୋଟି ଟଙ୍କାର ଆର୍ଥିକ ଅନିୟମିତତା ମାମଲା ଅଭିଯୋଗ । ଘଟଣାରେ ବଢ଼ିବାରେ ଲାଗିଛି ରାଜା ଚକ୍ରଙ୍କ ପାଇଁ ଅଡ଼ୁଆ । ମାର୍ଚ୍ଚ ୩ରେ ରାଜାଙ୍କୁ ଇଓଡବ୍ଲୁ ତାଙ୍କୁ ୧୧ ଘଣ୍ଟାର ଜେରା କରିଥିବାବେଳେ, ମାମଲାରେ ଇଡି ଓ ଆୟକର ବିଭାଗ ମଧ୍ୟ ତଦନ୍ତ ପ୍ରକ୍ରିୟାରେ ସାମିଲ ହୋଇଛନ୍ତି । 

ଏହାସହ ରାଜାଙ୍କର ୧୯ଟି ଗାଡ଼ି ଜବତ କରିସାରିଛି କ୍ରାଇମବାଞ୍ଚ । କ୍ରାଇମବ୍ରାଞ୍ଚ ଡିଏସପିଙ୍କ ନେତୃତ୍ୱରେ ୫ ଜଣିଆ ଟିମ୍ ଏବଂ କେନ୍ଦୁଝର ଟାଉନ ଥାନା ମିଳିତ ଭାବେ ରାଜା ଚକ୍ରଙ୍କ ଜଗନ୍ନାଥପୁର ସ୍ଥିତ ବାସଭବନରେ ଚଢ଼ାଉ କରିଥିଲା । ଏହି ସମୟରେ ରାଜାଙ୍କର ଏକ ଫର୍ଚ୍ୟୁନର କାର୍‌ ଏବଂ ଗୋଟିଏ ହାର୍ଲେ ଡେଭିଡସନ ବାଇକ୍ ଜବତ କରାଯାଇଥିବାବେଳେ ଖଣି ପରିବହନରେ ନିୟୋଜିତ ୧୭ଟି ପରିବହନ ଗାଡ଼ିକୁ ବିଭିନ୍ନ ସ୍ଥାନରୁ ଜବତ କରାଯାଇଥିଲା । ଉଲ୍ଲେଖଯୋଗ୍ୟ ଯେ ରାଜା ଚକ୍ର ରାଜ୍ୟ ଯୁବ ବିଜେଡି ଉପସଭାପତି ଅଛନ୍ତି ।