ରାଜା ରଘୁବଂଶୀ ହତ୍ୟା ମାମଲା: କିଏ ସେ ସଞ୍ଜୟ ବର୍ମା ? ଯାହାଙ୍କୁ ସୋନମ ୧୦୦ ରୁ ଅଧିକ କରିଥିଲେ ଫୋନ୍

ମୁମ୍ଵାଇ ୧୯।୦୬; ରାଜା ରଘୁବଂଶୀ ହତ୍ୟା ମାମଲାରେ ପ୍ରତିଦିନ ନୂଆ ନୂଆ ଖୁଲାସା ହେଉଛି। ସ୍ୱାମୀ ରାଜା ରଘୁବଂଶୀଙ୍କ ହତ୍ୟା ପାଇଁ ଗିରଫ ହୋଇଥିବା ସୋନମଙ୍କ ବିଷୟରେ ପୋଲିସ ଆଉ ଏକ ଖୁଲାସା କରିଛି। ବିବାହ ପୂର୍ବରୁ ସୋନମ ଜଣେ ବ୍ୟକ୍ତିଙ୍କୁ ୧୦୦ରୁ ଅଧିକ ଫୋନ୍ କଲ୍ କରିଥିଲେ। ପରେ ତଦନ୍ତରୁ ଜଣାପଡିଛି ଯେ ଏହା ତାଙ୍କ ପ୍ରେମିକ ରାଜ କୁଶୱାହାର ଛଦ୍ମନାମ 'ସଞ୍ଜୟ ବର୍ମା' ଥିଲା। ବୁଧବାର ପୋଲିସ ଏହି ସୂଚନା ଦେଇଛି।

ଗତ ମାସରେ ଇନ୍ଦୋର ବ୍ୟବସାୟୀ ରାଜା ରଘୁବଂଶୀଙ୍କ ହତ୍ୟା ମାମଲାରେ ତାଙ୍କ ପତ୍ନୀ ସୋନମ ସମେତ ପାଞ୍ଚ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି। ଏନେଇ ପୋଲିସ ଅଧୀକ୍ଷକ (ଏସପି) ବିବେକ ସିମ କହିଛନ୍ତି, "ଆମେ ଜାଣିବାକୁ ପାଇଛୁ ଯେ ସୋନମ ରାଜାଙ୍କ ସହ ବିବାହ ପୂର୍ବରୁ 'ସଞ୍ଜୟ ବର୍ମା' ନାମକ ଜଣେ ବ୍ୟକ୍ତିଙ୍କୁ ୧୦୦ ରୁ ଅଧିକ ଫୋନ୍ କଲ୍ କରିଥିଲେ। ବିବାହ ପରେ ମଧ୍ୟ ଏହି କଲ୍ ଜାରି ରହିଥିଲା।"

ପୁଲିସ ସଂଜୟ ବର୍ମାଙ୍କୁ ଖୋଜିବା ପାଇଁ ଇନ୍ଦୋରରେ ଏକ ସର୍ଚ୍ଚ ଅପରେସନ୍ ଆରମ୍ଭ କରିଥିଲା।  ହେଲେ ତାଙ୍କ ଫୋନ୍ ବନ୍ଦ ଥିଲା। ସିମ୍ରୁ ଜଣାପଡିଲା ଯେ 'ବର୍ମା' ଆଉ କେହି ନୁହେଁ ବରଂ ରାଜ କୁଶୱାହା ଥିଲେ, ଯିଏ ତାଙ୍କ ପ୍ରେମିକାଙ୍କ ସ୍ୱାମୀଙ୍କୁ ହତ୍ୟା କରିବାକୁ ଷଡ଼ଯନ୍ତ୍ର କରିଥିଲେ।

ହତ୍ୟା ପାଇଁ ତିନୋଟି ପ୍ରୟାସ

ପୋଲିସ ଅଧିକ୍ଷକ ଏହା ମଧ୍ୟ କହିଛନ୍ତି ଯେ ହତ୍ୟାକାରୀମାନେ ତିନୋଟି ବିଫଳ ପ୍ରୟାସ ପରେ ମେ ୨୩ ତାରିଖରେ ରାଜା ରଘୁବଂଶୀଙ୍କୁ ହତ୍ୟା କରିବାରେ ସଫଳ ହୋଇଥିଲେ।  ପ୍ରେମ ସମ୍ପର୍କ ବ୍ୟତୀତ, ପୋଲିସ ଏବେ ଏହା ମଧ୍ୟ ତଦନ୍ତ କରୁଛି ଯେ ରାଜା ରଘୁବଂଶୀଙ୍କ ମୃତ୍ୟୁ ପଛରେ କାହାର ଆର୍ଥିକ ଉଦ୍ଦେଶ୍ୟ ଅଛି କି ନାହିଁ। ସ୍ୱତନ୍ତ୍ର ତଦନ୍ତ ଦଳ (SIT) ର ଏକ ଦଳ ମଧ୍ୟପ୍ରଦେଶର ଇନ୍ଦୋରରେ ଅଛି ଏବଂ ହତ୍ୟା ପଛରେ କୌଣସି ସମ୍ଭାବ୍ୟ ଆର୍ଥିକ ଉଦ୍ଦେଶ୍ୟ ଜାଣିବା ପାଇଁ କିଛି ଲୋକଙ୍କୁ ପଚରାଉଚରା କରୁଛି।