ରାଜ୍ୟ ପରିବହନ ମନ୍ତ୍ରୀଙ୍କ ବଡ଼ ଘୋଷଣା, ବଦଳିବ ଲକ୍ଷ୍ମୀ ବସ୍ ଯୋଜନାର ନାଁ, ହେବ ମୁଖ୍ୟମନ୍ତ୍ରୀ ବସ୍ ସେବା

ବ୍ରହ୍ମପୁର: ଲକ୍ଷ୍ମୀ ବସ୍ ଯୋଜନାକୁ ନେଇ ରାଜ୍ୟ ପରିବହନ ମନ୍ତ୍ରୀ ବିଭୂତି ଜେନା ବଡ଼ ମନ୍ତବ୍ୟ ଦେଇଛନ୍ତି । ଲକ୍ଷ୍ମୀ ବସ୍ ଏଣିକି ମୁଖ୍ୟମନ୍ତ୍ରୀ ବସ୍ ସେବା ହେବ । ରାଜ୍ୟର ପ୍ରତି ବ୍ଲକରୁ ଏହି ବସ୍ ଚଳାଚଳ କରିବ । ଶୁକ୍ରବାର ରାଜ୍ୟ ପରିବହନ ମନ୍ତ୍ରୀ ଏହି ସୂଚନା ଦେବା ସହ ରାଜ୍ୟରେ ପରିବହନ ବ୍ୟବସ୍ଥାରୁ ଅଧିକ ସୁଗମ କରାଯିବା ବୋଲି କହିଛନ୍ତି ।

ପରିବହନ ମନ୍ତ୍ରୀ ବିଭୂତି ଜେନା କହିଛନ୍ତି, ଯେଉଁ ଅଂଚଳରେ ବସ୍ ସେବା ନାହିଁ ସେହି ଅଞ୍ଚଳକୁ ପ୍ରାଧାନ୍ୟ ଦେଇ ଏହି ବସ୍ ସେବା ଚାଲିବ । ଏହି ବସ୍ ପ୍ରତି ବ୍ଲକରୁ ପୁରୀ ଯିବ । ଏପରିକି ଭାରତର ବିଭିନ୍ନ ତୀର୍ଥ କ୍ଷେତ୍ରକୁ ମଧ୍ୟ ଏହି ବସ୍ ଚଳାଚଳ କରିବ ବୋଲି ପରିବହନ ମନ୍ତ୍ରୀ ବିଭୁତି ଭୂଷଣ ଜେନା କହିଛନ୍ତି । ତେବେ ଲକ୍ଷ୍ମୀ ବସ୍‌ର ଲୋଗୋ କାହିଁକି କଡାଗଲା ? କାଡିବା ପାଇଁ କିଏ କହିଥିଲେ ? ତାର ଜବାବରେ ମନ୍ତ୍ରୀ କହିଛନ୍ତି ଯେ କଣ ଗୋଟେ ଭୁଲ ଅଛି, ସେଥିପାଇଁ କାଡିଲେ । ଏବେ ମୁଖ୍ୟମନ୍ତ୍ରୀ ବସ୍ ସେବା ହେବ । ମୁଖ୍ୟମନ୍ତ୍ରୀ ଲୋକଙ୍କର, ଏହି ବସ୍‌ରେ ବସିଲେ ମୁଖ୍ୟମନ୍ତ୍ରୀଙ୍କ ବସ୍‌ରେ ବସିବା ଭଳି ଲୋକେ ଅନୁଭବ କରିବେ ବୋଲି ମନ୍ତ୍ରୀ କହିଛନ୍ତି ।