ରାମ ମନ୍ଦିର ସ୍ବପ୍ନ ସତ ହେଲା, ଚନ୍ଦ୍ରରେ ଉଡିଲା ତ୍ରିରଙ୍ଗା: ରାଷ୍ଟ୍ରପତି…

ନୂଆଦିଲ୍ଲୀ,୩୧।୧ : ସଂସଦର ବଜେଟ ଅଧିବେଶନ ବୁଧବାରଠାରୁ ଆରମ୍ଭ ହୋଇଛି। ଏହା ଫେବୃଆରୀ ୯ ପର୍ଯ୍ୟନ୍ତ ଚାଲିବ। ଏହା ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ଦ୍ୱିତୀୟ କାର୍ଯ୍ୟକାଳର ଶେଷ ମଧ୍ୟବର୍ତ୍ତୀ ବଜେଟ, ଯାହା ଆସନ୍ତା କାଲି ଅର୍ଥାତ ଫେବୃଆରୀ ୧ ରେ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଦ୍ୱାରା ଉପସ୍ଥାପିତ ହେବ। ସଂସଦର ମଧ୍ୟବର୍ତ୍ତୀକାଳୀନ ବଜେଟ ଅଧିବେଶନ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ସହିତ ଆରମ୍ଭ ହୋଇଛି।

ନୂତନ ସଂସଦରେ ତାଙ୍କର ପ୍ରଥମ ଅଭିଭାଷଣରେ ରାଷ୍ଟ୍ରପତି କହିଛନ୍ତି ନୂତନ ସଂସଦ ଭବନରେ ଏହା ମୋର ପ୍ରଥମ ଭାଷଣ। ଏଠାରେ ‘ୱାନ ଇଣ୍ଡିଆ, ବେଷ୍ଟ ଇଣ୍ଡିଆ’ର ସୁଗନ୍ଧ ରହିଛି। ସମଗ୍ର ବିଶ୍ୱରେ ଗୁରୁତର ସଙ୍କଟ ମଧ୍ୟରେ ଭାରତ ହେଉଛି ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ଏବଂ ଗତ ଦୁଇ ତ୍ର୍ରୟମାସରେ ଦେଶର ଅଭିବୃଦ୍ଧି ହାର ୧,୫ ପ୍ରତିଶତ ରହିଛି। ତାଙ୍କ ଅଭିଭାଷଣରେ ରାଷ୍ଟ୍ରପତି କହିଛନ୍ତି ଅମୃତକାଳ ଆରମ୍ଭରେ ସଂସଦ କୋଠା ନିର୍ମାଣ କରାଯାଇଛି।
ସରକାର ନିରନ୍ତର ‘ସଂସ୍କାର, ପ୍ରଦର୍ଶନ ଏବଂ ପରିବର୍ତ୍ତନ’ ଜାରି ରଖିଛନ୍ତି। ନାରୀ ଶକ୍ତି ଆଇନ ପାସ କରିଥିବାରୁ ମୁଁ ସଦସ୍ୟମାନଙ୍କୁ ଅଭିନନ୍ଦନ ଜଣାଉଛି, ଏହା ମହିଳା ନେତୃତ୍ୱାଧୀନ ବିକାଶ ପାଇଁ ମୋ ସରକାରଙ୍କ ସଂକଳ୍ପକୁ ଦୃଢ଼ କରିଛି। ଲୋକସଭା ଓ ରାଜ୍ୟସଭାର ମିଳିତ ବୈଠକକୁ ସମ୍ବୋଧିତ କରି ରାଷ୍ଟ୍ରପତି କହିଛନ୍ତି ଯେ ରାମ ମନ୍ଦିର ନିର୍ମାଣ ପାଇଁ ସ୍ବପ୍ନ ଶତାବ୍ଦୀ ଧରି ରହିଆସିଥିଲା। ଏବେ ଏହା ସତ୍ୟ ହୋଇଛି। ପରୀକ୍ଷାରେ ଅନିୟମିତତା ନେଇ ଯୁବବର୍ଗମାନଙ୍କ ଚିନ୍ତାଧାରା ବିଷୟରେ ମୋ ସରକାର ଅବଗତ ଅଛନ୍ତି, ଏହି ଦିଗରେ କଠୋରତା ଆଣିବା ପାଇଁ ଏକ ନୂତନ ନିୟମ କରିବାକୁ ନିଷ୍ପତ୍ତି ନିଆଯାଇଛି।

ଆମେ ପିଲାଦିନରୁ ’ଗରିବି ହଟାଓ’ର ସ୍ଲୋଗାନ ଶୁଣୁଛୁ, କିନ୍ତୁ ଆମ ଜୀବନରେ ପ୍ରଥମ ଥର ପାଇଁ, ଆମ ସରକାରଙ୍କ କାର୍ଯ୍ୟକାଳ ସମୟରେ ଦାରିଦ୍ର୍ୟ ବହୁ ପରିମାଣରେ ହଟାଯାଉଛି। କୋଟି କୋଟି ଦେଶବାସୀ ଦାରିଦ୍ର୍ୟରୁ ବାହାରି ଆସିଛନ୍ତି। ଗତ ଦଶନ୍ଧି ମଧ୍ୟରେ ସରକାର ପ୍ରତ୍ୟେକ ଶାସନ ବ୍ୟବସ୍ଥାର ଉତ୍ତମ ଶାସନ ଏବଂ ସ୍ବଚ୍ଛତା ଆଣିଛନ୍ତି।

ପୂର୍ବରୁ ବ୍ୟାଙ୍କିଙ୍ଗ ବ୍ୟବସ୍ଥା ତୁଳନାରେ ଆଜି ଆମର ବ୍ୟାଙ୍କିଙ୍ଗ ବ୍ୟବସ୍ଥା ଦୁନିଆର ସବୁଠାରୁ ଶକ୍ତିଶାଳୀ ବ୍ୟବସ୍ଥା ମଧ୍ୟରୁ ଅନ୍ୟତ। ଆଜି ବ୍ୟାଙ୍କଗୁଡିକର ଏନପିଏ ମାତ୍ର ଚାରି ପ୍ରତିଶତ ଅଟେ। ଆଜି ପ୍ରତ୍ୟେକ ଭାରତୀୟ ସ୍ବଦେଶୀ ନିର୍ମିତ ବିମାନ ପରିବହନକାରୀ ଆଇଏନଏସ ବିକ୍ରାନ୍ତ ଦେଖି ଗର୍ବିତ ।
ଆଜି ବିଶ୍ୱର ମୋଟ ରିଅଲ ଟାଇମ ଡିଜିଟାଲ କାରବାରର ୪୬ ପ୍ରତିଶତ ଭାରତରେ ହେଉଛି। ଗତ ମାସରେ, ୟୁପିଆଇ ମାଧ୍ୟମରେ ୧୨୦୦ କୋଟିର ଏକ ରେକର୍ଡ କାରବାର କରାଯାଇଛି। ଏହା ଅନ୍ତର୍ଗତ ୧୮ ଲକ୍ଷ କୋଟି ଟଙ୍କାର ରେକର୍ଡ କାରବାର ହୋଇଛି। ପୂର୍ବରୁ ଦେଶରେ ମୁଦ୍ରାସ୍ଫୀତି ହାର ଦୁଇ ଅଙ୍କରେ ଥିଲା, ଯାହା ବର୍ତ୍ତମାନ ଚାରି ପ୍ରତିଶତ ଛୁଇଁଛି।
ବିକଶିତ ଭାରତର ମହାନ ସ୍ଥାପନା ଚାରୋଟି ସ୍ତମ୍ଭ ଉପରେ ରହିଛି ସେସବୁ ହେଉଛି ଯୁବ ଶକ୍ତି, ମହିଳା ଶକ୍ତି, କୃଷକ ଏବଂ ଗରିବ। ସରକାର ଏହି ଚାରୋଟି ସ୍ତମ୍ଭକୁ ମଜବୁତ କରିବା ପାଇଁ ନିରନ୍ତର କାର୍ଯ୍ୟ କରୁଛନ୍ତି। ବିଗତ ବର୍ଷଗୁଡିକରେ, ବିଶ୍ୱ ଦୁଇଟି ପ୍ରମୁଖ ଯୁଦ୍ଧ ଦେଖିଛି ଏବଂ କରୋନା ପରି ବିଶ୍ୱବ୍ୟାପୀ ମହାମାରୀର ସମ୍ମୁଖୀନ ହୋଇଛି। ଏଭଳି ବିଶ୍ୱ ସଙ୍କଟ ସତ୍ତ୍ୱେ ମୋ ସରକାର ଦେଶରେ ମୁଦ୍ରାସ୍ଫୀତି ନିୟନ୍ତ୍ରଣରେ ରଖିଥିଲେ ଏବଂ ସାଧାରଣ ଭାରତୀୟଙ୍କ ଭାର ବଢ଼ିବାକୁ ଦେଇ ନ ଥିଲେ।
ମୋ ସରକାର ଉଜ୍ୱଳା ଯୋଜନାରେ ୨.୫ ଲକ୍ଷ କୋଟି ଟଙ୍କା ଖର୍ଚ୍ଚ କରିଛନ୍ତି। ଗରିବ ଲୋକଙ୍କୁ ଶସ୍ତା ରାଶନ ଯୋଗାଇବା ପାଇଁ ୨୦ଲକ୍ଷ କୋଟି ଟଙ୍କା ଖର୍ଚ୍ଚ କରାଯାଇଛି। ଆୟୁଷ୍ମାନ ଯୋଜନା ଅଧୀନରେ ମାଗଣା ଚିକିତ୍ସା ଦିଆଯାଉଛି। ୧୧ କୋଟି ଘର ପ୍ରଥମ ଥର ପାଇଁ ଟ୍ୟାପ ୱାଟର ସ୍କିମ ସହିତ ସଂଯୁକ୍ତ ହୋଇଛି। କିଡନୀ ରୋଗୀଙ୍କୁ ଡାଏଲିସିସ ସୁବିଧା ଯୋଗାଇ ଦିଆଯାଇଛି। ଏଲଇଡି ବଲ୍ବ ସହିତ ବିଦ୍ୟୁତ ବିଲ ସଞ୍ଚୟ କରିବାକୁ ଚେଷ୍ଟା କରାଯାଇଛି। ଯୋଜନାଗୁଡିକ ଶୀଘ୍ର ସଂପୂର୍ଣ୍ଣ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି। ଗତ ବର୍ଷ ବିଶ୍ୱରେ ଦୁଇଟି ବଡ଼ ଯୁଦ୍ଧ ହୋଇଥିଲା। ବିଶ୍ୱ ସଙ୍କଟ ସତ୍ତ୍ୱେଦେଶରେ ମୁଦ୍ରାସ୍ଫୀତି ବୃଦ୍ଧି ପାଇନାହିଁ। ଗରିବ ଏବଂ ମଧ୍ୟବିତ୍ତମାନେ ଶସ୍ତା ବିମାନ ଟିକେଟ ପାଇଛନ୍ତି।

ଆଜି ଦେଶରେ ଶତପ୍ରତିଶତ ଆଧୁନିକ ପ୍ରସବ ଚାଲିଛି ଏବଂ ଏହି କାରଣରୁ ମାତୃ ମୃତ୍ୟୁହାରରେ ବହୁତ ହ୍ରାସ ଘଟିଛି ଏବଂ ଉଜ୍ୱଳା ଯୋଜନାର ସୁଯୋଗ ନେଇ ଗରିବ ପରିବାରରେ ରୋଗର ମାତ୍ରା ହ୍ରାସ ପାଇଛି। ଟ୍ୟାକ୍ସର ଏକ ବଡ଼ ଅଂଶ ଯୁବକ, ମହିଳା, କୃଷକ ଏବଂ ଗରିବ ଲୋକଙ୍କୁ ସଶକ୍ତିକରଣ ପାଇଁ ବ୍ୟବହୃତ ହେଉଛି।

The post ରାମ ମନ୍ଦିର ସ୍ବପ୍ନ ସତ ହେଲା, ଚନ୍ଦ୍ରରେ ଉଡିଲା ତ୍ରିରଙ୍ଗା: ରାଷ୍ଟ୍ରପତି… appeared first on Dharitri Odia News.