ରେକର୍ଡ ବୁକ ହଲାଇ ଦେଲେ ଅଭିଷେକ

ହରାରେ,୭।୭: ଭାରତୀୟ ଦଳର ଯୁବ ଓପନର୍‌ ଅଭିଷେକ ଶର୍ମା ତାଙ୍କ ଟି -୨୦ ଅନ୍ତର୍ଜାତୀୟ କ୍ୟାରିୟରର ପ୍ରଥମ ଶତକ ସ୍କୋର କରି ରେକର୍ଡ ବୁକକୁ ହଲାଇ ଦେଇଛନ୍ତି। ରବିବାର ଜିମ୍ବାୱେ ବିପକ୍ଷ ଦ୍ୱିତୀୟ ଟି -୨୦ ଅନ୍ତର୍ଜାତୀୟ ମ୍ୟାଚରେ ଶର୍ମା ମାତ୍ର ୪୬ ଟି ବଲରେ ସାତ ଚୌକା ଓ ୮ ଛକା ସହାୟତାରେ ଏକ ଶତକ ହାସଲ କରିଛନ୍ତି। ବାମହାତୀ ବ୍ୟାଟ୍ସମ୍ୟାନ ୪୭ବଲରେ ୧୦୦ ରନ ସ୍କୋର କରିବା ପରେ ପାଭିଲିୟନକୁ ଫେରିଥିଲେ। ଅଭିଷେକଙ୍କ ଇନିଂସ ଆଧାରରେ ଭାରତୀୟ ଦଳ ଧାର୍ଯ୍ୟ ୨୦ ଓଭରରେ ଦୁଇଟି ୱିକେଟ ହରାଇବା ପରେ ୨୩୪ ରନ ସଂଗ୍ରହ କରିଥିଲା।
ହରାରେରେ ଖେଳାଯାଇଥିବା ଦ୍ୱିତୀୟ ଟି -୨୦ ଅନ୍ତର୍ଜାତୀୟ ମ୍ୟାଚରେ ପଞ୍ଜାବର ଅଭିଷେକ ଶର୍ମା ୩୩ ବଲରେ ୫ ଚୌକା ଓ ୩ ଛକା ସହାୟତାରେ ନିଜର ଅର୍ଦ୍ଧଶତକ ପୂରଣ କରିଥିଲେ। ସେ ତାଙ୍କର ପଚାଶ ପୂରଣ କରିବା ମାତ୍ରେ ଏକ ଆକ୍ରମଣାତ୍ମକ ଆଭିମୁଖ୍ୟ ଗ୍ରହଣ କରିଥିଲେ ଏବଂ ପରବର୍ତ୍ତୀ ୧୩ବଲରେ ୨ଟି ଚୌକା ଓ ୫ଛକା ସହାୟତାରେ ଶତକ ପୂରଣ କରିଥିଲେ। ଭାରତୀୟ ବ୍ୟାଟ୍ସମ୍ୟାନଙ୍କ ଇନିଂସ ୱେଲିଙ୍ଗଟନ ମାସାକାଡଜାଙ୍କ ଦ୍ୱାରା ଶେଷ ହୋଇଥିଲା।
ସବୁଠାରୁ ଅଳ୍ପ ଇନିଂସରେ ଟି -୨୦ ଅନ୍ତର୍ଜାତୀୟ ଶତକ ହାସଲ କରିବାରେ ଅଭିଷେକ ଶର୍ମା ପ୍ରଥମ ବ୍ୟାଟ୍ସମ୍ୟାନ ହୋଇଛନ୍ତି। ଶର୍ମା ତାଙ୍କ କ୍ୟାରିୟରର ଦ୍ୱିତୀୟ ଇନିଂସରେ ଏକ ଶତକ ହାସଲ କରିଥିଲେ। ସେ ତାଙ୍କ ଟି -୨୦ ଅନ୍ତର୍ଜାତୀୟ କ୍ୟାରିୟରର ତୃତୀୟ ଇନିଂସରେ ଶତକ ହାସଲ କରିଥିବା ଦୀପକ ହୁଡାଙ୍କ ରେକର୍ଡ ଭାଙ୍ଗିଛନ୍ତି।

The post ରେକର୍ଡ ବୁକ ହଲାଇ ଦେଲେ ଅଭିଷେକ appeared first on Dharitri Odia News.