ଶରଣ ଶ୍ରୀକ୍ଷେତ୍ରରୁ ପୁରୀ ଶ୍ରୀକ୍ଷେତ୍ର ଗଲା ତୁଳସୀ ହାର, ଜଗାକୁ ଲାଗି ହେବ ୩୫୧ ଫୁଟର ତୁଳସୀ ମାଳ

ଢେଙ୍କାନାଳ: ଜଗାର ତୁଳସୀ ଦୟଣା ମାଳ ଭାରି ପ୍ରିୟ । ସେଥିପାଇଁ ତ କାଳିଆ ସାଆନ୍ତଙ୍କ ଅନ୍ୟାନ୍ୟ ସେବା ଭିତରେ ଅନ୍ୟତମ ସେବା ହେଉଛି ତୁଳସୀ ସେବା । ପବିତ୍ର ବାହୁଡା ଦଶମୀ ଉପଲକ୍ଷେ ୩୫୧ ଫୁଟର ତୁଳସୀ ମାଳ, ୨୫୧ ଫୁଟର ପଦ୍ମମାଳ ଓ ଗେଣ୍ଡୁମାଳ ଇତ୍ୟାଦି ପ୍ରସ୍ତୁତ କରାଯାଇଛି । ଏହି ତୁଳସୀ ମାଳ ଓ ପଦ୍ମଫୁଲ ହାର ଶ୍ରୀକ୍ଷେତ୍ରରେ କାଳିଆ ସାଆନ୍ତଙ୍କ ଠାରେ ଲାଗି ହେବ । ପ୍ରତି ବର୍ଷ ପରି ଚଳିତ ବର୍ଷ ମଧ୍ୟ ଢେଙ୍କାନାଳ ଜିଲ୍ଲା ଓଡ଼ାପଡ଼ା ବ୍ଳକ ଶରଣ ଶ୍ରୀକ୍ଷେତ୍ରରୁ ପୁରୀ ଶ୍ରୀକ୍ଷେତ୍ର ଧାମର ରଥାରୂଢ ପ୍ରଭୁ ଶ୍ରୀଜଗନ୍ନାଥ, ବଳଭଦ୍ର ଓ ଦେବୀ ସୁଭଦ୍ରାଙ୍କ ନିକଟକୁ ଯାଉଛି ତୁଳସୀ ମାଳ, ପଦ୍ମମାଳ ଓ ଗେଣ୍ଡୁମାଳ ।

ଏହାର ପ୍ରସ୍ତୁତି କରୁଛନ୍ତି ଜଗନ୍ନାଥ ମହାପ୍ରଭୁଙ୍କ ଭକ୍ତ ଚିଣ୍ଟୁ ବାବା, ଗ୍ରାମବାସୀ ଓ ଅଗଣିତ ଶ୍ରଦ୍ଧାଳୁମାନେ । ତୁଳସୀ ବଣରୁ ଶଙ୍ଖ, ଘଣ୍ଟ, ଘଣ୍ଟା ଓ ହୁଳହୁଳି, ହରିବୋଲ ଶବ୍ଦ ସହ ଧୂପଦୀପ ଦେଇ ମହାପ୍ରଭୁଙ୍କ ପାଇଁ ତୁଳସୀ ତୋଳାଯାଇ ଗୁନ୍ଥା ଯାଇଥିଲା । ଏହି ସ୍ଥାନରୁ ପ୍ରତ୍ୟେକ ଦିନ ଚିଣ୍ଟୁବାବାଙ୍କ ଦ୍ୱାରା ତୁଳସୀ ଯାଇ ମହାପ୍ରଭୁଙ୍କୁ ଲାଗି ହେଉଛି । ଢେଙ୍କାନାଳ ଏକ ଘରିଆ ଗ୍ରାମର ସରଣ ଶ୍ରୀକ୍ଷେତ୍ରରୁ ସପ୍ତାହକୁ ୩ ରୁ ୪ ଦିନ ଠାକୁରଙ୍କ ପାଇଁ ତୁଳସୀ ପଠାଯାଏ । ମହାପ୍ରଭୁଙ୍କ ଭକ୍ତ ଚିଣ୍ଟୁ ବାବା ବାଇକ ଯୋଗେ ଝଡ ବର୍ଷା, ଶୀତ, କାକରକୁ ଖାତିର୍ ନ କରି ରାତି ଗୋଟାଏରୁ ବାହାରିଯାଆନ୍ତି ଶ୍ରୀମନ୍ଦିର ଅଭିମୁଖେ ।

ନିଜକୁ ମହାପ୍ରଭୁଙ୍କର ଦାସ କହି ଜଗନ୍ନାଥଙ୍କ ସେବାରେ ନିଜକୁ ସମର୍ପି ଦେଇଛନ୍ତିି । ମହାପ୍ରଭୁଙ୍କ ଶ୍ରୀଅଙ୍ଗ ସେବା ନିମନ୍ତେ ପ୍ରତିଦିନ ତୁଳସୀ ସେବା ଜାରି ରଖିଛନ୍ତି । ପ୍ରତିଦିନ ଅନେକ ପରିବାର ତୁଳସୀ, ଦୟଣା, ଫୁଲ, ଫଳ, ନଡ଼ିଆ, ଭୋଗ ଯିଏ ଯାହା ପାରନ୍ତି ଜଗନ୍ନାଥଙ୍କ ଉଦ୍ଦେଶ୍ୟରେ ପଠାଇଥାନ୍ତି । ଚିଣ୍ଟୁ ବାବାଙ୍କ ନିୟମିତ କାମ ଜଗନ୍ନାଥଙ୍କ ପାଇଁ ତୁଳସୀ ନେଇ ଯିବା । ଏହି କାମରେ ବେଶ ଆନନ୍ଦ ପାଆନ୍ତି ସେ । ଗତ ୯ ବର୍ଷ ଧରି ଏହି କାମ ସେ ପ୍ରତ୍ୟେକ ଦିନ କରୁଛନ୍ତି । କି ଖରା କି ବର୍ଷା କି ଶୀତ କିଛି ମାନନ୍ତିନି ସେ ଏବଂ ବାଇକ ଧରି ସବୁ ଦିନ ପୁରୀ ଅଭିମୁଖେ ବାହାରି ଯାଇଥାନ୍ତି ।

ପୁରୀ ଶ୍ରୀକ୍ଷେତ୍ର ଧାମକୁ ପବିତ୍ର ବାହୁଡ଼ା ଯାତ୍ରା ପାଇଁ ଢେଙ୍କାନାଳ ଜିଲ୍ଲାର ଏକ ଘରିଆ ଗ୍ରାମ ଶରଣ ଶ୍ରୀକ୍ଷେତ୍ରରୁ ଗଲା ଜଗନ୍ନାଥ ମହାପ୍ରଭୁଙ୍କ ଅତିପ୍ରିୟ ତୁଳସୀ ମାଳ । ପ୍ରତି ବର୍ଷ ଭଳି ଚଳିତ ବର୍ଷ ଏହି ତୁଳସୀ ମାଳ ଓ ଫୁଲ ହାର କାଳିଆ ଠାକୁର ନିକଟରେ ଲାଗି ହେବ । ଏହି ତୁଳସୀ ମାଳ ଓ ଫୁଲ ହାରକୁ ଗ୍ରାମବାସୀମାନେ ଭକ୍ତିର ସହ ତୁଳସୀ ବଣରୁ ତୋଳି ଫୁଲ ସଂଗ୍ରହ କରି ପ୍ରସ୍ତୁତ କରିଛନ୍ତି ।

Also read: ରତ୍ନବେଦୀକୁ ଲେଉଟିବେ ଚତୁର୍ଦ୍ଧା ମୂର୍ତ୍ତି, ମାଉସୀ ମା’ଙ୍କ ହାତରୁ ଖାଇବେ ପୋଡ଼ପିଠା

The post ଶରଣ ଶ୍ରୀକ୍ଷେତ୍ରରୁ ପୁରୀ ଶ୍ରୀକ୍ଷେତ୍ର ଗଲା ତୁଳସୀ ହାର, ଜଗାକୁ ଲାଗି ହେବ ୩୫୧ ଫୁଟର ତୁଳସୀ ମାଳ appeared first on KNews Odisha.