ସାହିତ୍ୟ ପତ୍ରିକା କାଦମ୍ବିନୀର ୨୬ ତମ ସ୍ଵନକ୍ଷତ୍ର ଉତ୍ସବ, ସମ୍ବର୍ଦ୍ଧିତ ହେଲେ ବିଶିଷ୍ଟ ବ୍ୟକ୍ତି

ଭୁବନେଶ୍ୱର : ସର୍ବଜନାଦୃତ ମାସିକ ପତ୍ରିକା ‘କାଦମ୍ବିନୀ’ର ୨୬ ତମ ସ୍ୱନକ୍ଷତ୍ର ଉତ୍ସବ ଅନୁଷ୍ଠିତ ହୋଇଯାଇଛି । ପୁରୀରେ ମହାସମାରୋହରେ ଅନୁଷ୍ଠିତ ଏହି ଉତ୍ସବରେ ୪ଶହରୁ ଅଧିକ ସାହିତ୍ୟିକ, ସଂସ୍କୃତି ପ୍ରେମୀ ଓ ବୁଦ୍ଧିଜୀବୀ ଯୋଗଦେଇଥିଲେ ।  ବିଭିନ୍ନ କ୍ଷେତ୍ରରେ ଉତ୍କର୍ଷ ହାସଲ କରିଥିବା ବ୍ୟକ୍ତି ବିଶେଷଙ୍କୁ ସମାରୋହରେ ସମ୍ବର୍ଦ୍ଧିତ କରାଯାଇଥିଲା ।

ପୁରୀରେ ଆୟୋଜିତ ହୋଇଯାଇଛି ଲୋକପ୍ରିୟ ସାହିତ୍ୟ ପତ୍ରିକା କାଦମ୍ବିନୀର ୨୬ ତମ ସ୍ଵନକ୍ଷତ୍ର ଉତ୍ସବ । ସ୍ଥାନୀୟ କେନ୍ଦ୍ରୀୟ ସଂସ୍କୃତ ବିଶ୍ୱବିଦ୍ୟାଳୟ ସମ୍ମିଳନୀ କକ୍ଷରେ ଆୟୋଜିତ ଏହି ଉତ୍ସବରେ ଯୋଗଦେଥିଲ ସାହିତ୍ୟ ଓ ସଂସ୍କୃତିପ୍ରେମୀ। ବିଶିଷ୍ଟ ସାହିତ୍ୟିକ ପ୍ରଫେସର କୈଳାସ ଚନ୍ଦ୍ର ଟିକାୟତରାୟଙ୍କ ସଭାପତିତ୍ବରେ ଅନୁଷ୍ଠିତ ଏହି ଉତ୍ସବରେ ଅତିଥି ଭାବେ ଯୋଗଦେଇଥିଲେ କେନ୍ଦ୍ରୀୟ ସଂସ୍କୃତି ବିଶ୍ଵବିଦ୍ୟାଳୟର ନିର୍ଦ୍ଦେଶକ ପ୍ରଫେସର ପ୍ରଭାତ କୁମାର ମହାପାତ୍ର, ବିଶିଷ୍ଟ କବୟିତ୍ରୀ ଅପର୍ଣ୍ଣା ମହାନ୍ତି,ବିଶିଷ୍ଟ ବ୍ୟଙ୍ଗକବି ଜ୍ଞାନ ହୋତା ଓ ବିଶିଷ୍ଟ କବି ପବିତ୍ର ମୋହନ ଦାଶ । ଅତିଥିମାନେ କାଦମ୍ବିନୀ ପତ୍ରିକା ୨୬ ବର୍ଷ ପୂରଣ କରିଥିବାରୁ ପ୍ରତିଷ୍ଠାତା ଡ. ଅଚ୍ୟୁତ ସାମନ୍ତଙ୍କ ନିରନ୍ତର ପ୍ରୋତ୍ସାହନ ଓ ସମ୍ପାଦିକାଙ୍କ ପ୍ରୟାସକୁ ଉଚ୍ଚ ପ୍ରଶଂସା କରିବା ସହ ଓଡିଶା ସାହିତ୍ୟ ଓ ସଂସ୍କୃତି ପାଇଁ ପତ୍ରିକାର ଅବଦାନକୁ ସ୍ମରଣ କରିଥିଲେ l

ଏହି ଅବସରରେ ବିଶିଷ୍ଟ ସାହିତ୍ୟିକ ଭାସ୍କର ମିଶ୍ର, ବିଶିଷ୍ଟ ସାହିତ୍ୟିକା ଲକ୍ଷ୍ମୀପ୍ରିୟା ଆଚାର୍ଯ୍ଯ, ସ୍ୱରାଜଲକ୍ଷ୍ମୀ ମିଶ୍ର, ବିଶିଷ୍ଟ ସାହିତ୍ୟିକ ମାନସରଞ୍ଜନ ମହାପାତ୍ର, ବିଶିଷ୍ଟ ଶିଶୁ ସାହିତ୍ୟିକ ବୀରେନ୍ଦ୍ର ମହାନ୍ତି ଓ ବିଶିଷ୍ଟ ସାହିତ୍ୟିକ ଓ ସଂଗଠକ ଶ୍ୟାମପ୍ରକାଶ ସେନାପତିଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହି ଅବସରରେ ‘କାଦମ୍ବିନୀ’ର ସ୍ୱନକ୍ଷତ୍ର ସ୍ଵତନ୍ତ୍ର ଏବଂ ‘କୁନିକଥା’ର ଜୁଲାଇ ସଂଖ୍ୟା ଉନ୍ମୋଚିତ ହୋଇଥିଲା। ‘କାଦମ୍ବିନୀ’ର ୨୬ତମ ଜନ୍ମଦିନ ଉପଲକ୍ଷେ ‘ ସଂସ୍କୃତି ଓ ସଂସ୍କୃତି’ ଏବଂ ‘ଓଡିଶା ସଚେତନ ନାଗରିକ ଫୋରମ’ ପକ୍ଷରୁ ଏକ ଶୁଭେଚ୍ଛାମୂଳକ କେକ୍ କଟାଯାଇ, ସଂପାଦିକା ଡ.ଇତି ସାମନ୍ତଙ୍କୁ ସମ୍ବର୍ଦ୍ଧିତ କରାଯାଇଥିଲା । ଅନୁଷ୍ଠାନର ସମ୍ପାଦକ ଦିଲ୍ଲୀପ ହାଲି ଓ କର୍ମକର୍ତ୍ତାଙ୍କ ଉପସ୍ଥିତି ଥିଲେ ।

ଆଜିର ଉତ୍ସବ ପ୍ରାରମ୍ଭରେ ନୃତ୍ୟଗୁରୁ ରୂପଶ୍ରୀ ମହାପାତ୍ର ଓ ଦେବରୂପା ଦାସଗୁପ୍ତା ମାହାରୀ ନୃତ୍ଯ ପରିବେଷଣ କରିଥିବା ବେଳେ ଶେଷରେ ପୁରୀର ସାହିଯାତ ପରିବେଷଣ କରିଥିଲେ ନୃତ୍ଯଶିଳ୍ପୀ କୁମାର ଭୀମସେନ ଓ ସାଥୀ। କାର୍ଯ୍ୟକ୍ରମ ସଂଚାଳନ କରିଥିଲେ ଶ୍ରୀନିବାସ ଘଟୁଆରୀ। ଧନ୍ୟବାଦ ଅର୍ପଣ କରିଥିଲେ ‘କାଦମ୍ବିନୀ’ ସଂପାଦିକା ଡ.ଇତି ସାମନ୍ତ। ଏହି ଉତ୍ସବରେ ବହୁ ସଂଖ୍ୟାରେ ସାହିତ୍ଯ ଓ ସଂସ୍କୃତିପ୍ରେମୀ ଯୋଗ ଦେଇ କାଦମ୍ବିନୀ ପତ୍ରିକାର ଶୁଭ ମନାସିଥିଲେ।

The post ସାହିତ୍ୟ ପତ୍ରିକା କାଦମ୍ବିନୀର ୨୬ ତମ ସ୍ଵନକ୍ଷତ୍ର ଉତ୍ସବ, ସମ୍ବର୍ଦ୍ଧିତ ହେଲେ ବିଶିଷ୍ଟ ବ୍ୟକ୍ତି appeared first on KNews Odisha.