ସୁଯୋଗ ହାତଛଡା କଲା ଆରସିବି, ୧ ରନରେ ଜିତିଲା କେକେଆର

କୋଲକାତା:  ଇଣ୍ଡିଆନ୍‌ ପ୍ରିମିୟର ଲିଗ୍‌ (ଆଇପିଏଲ୍‌)-୨୦୨୪ର ୩୬ତମ ମ୍ୟାଚ୍‌ ରୋମାଞ୍ଚକର ହୋଇଛି। ଏହି ମୁକାବିଲାରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି)କୁ କୋଲକାତା ୧ ରନ୍‌ରେ ପରାସ୍ତ କରିଛି। ପ୍ରଥମେ ବ୍ୟାଟିଂ କରି କେକେଆର୍‌ ୨୦ ଓଭରରେ ୬ ଉଇକେଟ ହରାଇ ୨୨୨ ରନ ସଂଗ୍ରହ କରିଥିଲେ। ଏହାର ଜବାବରେ ଆରସିବିକୁ ଶେଷ ବଲରେ ତିନି ରନ ସ୍କୋର କରିବାକୁ ପଡୁଥିଲା, କିନ୍ତୁ ଦଳ ମାତ୍ର ଗୋଟିଏ ରନ ସ୍କୋର କରିପାରିଥିଲା ଏବଂ ପରାଜୟର ସାମ୍ନା କରିବାକୁ ପଡିଥିଲା। ୱିଲ ଜ୍ୟାକ ଏବଂ ରଜତ ପଟିଦାରଙ୍କ ମଧ୍ୟରେ ଶତକୀୟ ସହଭାଗୀତା ଏବଂ ଶେଷ ଓଭରରେ କରଣ ଶର୍ମାଙ୍କ ଉତ୍କୃଷ୍ଟ ପ୍ରଦର୍ଶନ ସତ୍ତ୍ୱେ ୨୦ ଓଭରରେ ୨୨୧ ରନ ସ୍କୋର କରିବା ପରେ ଆରସିବି ଅଲଆଉଟ ହୋଇଯାଇଥିଲା।

ଶ୍ରେୟସ ଆୟର କେକେଆର୍‌ ପାଇଁ ଅର୍ଦ୍ଧଶତକ ଖେଳିଥିଲେ ଏବଂ ଶେଷରେ ରସେଲ ଏବଂ ରମଣଦୀପ ସିଂ ଏକ ଦ୍ରୁତ ଇନିଂସ ଖେଳି ଆରସିବି ପାଇଁ ୨୨୩ ରନ ଧାର୍ଯ୍ୟ କରିଥିଲେ। ଟାର୍ଗେଟକୁ ପିଛା କରି ଆରସିବିର ଭଲ ଆରମ୍ଭ ହୋଇ ନ ଥିଲା, କିନ୍ତୁ ଜ୍ୟାକ ୩୨ଟି ବଲରେ ୫୫ ରନ ଏବଂ ରଜତ ପଟିଦାର ୫୨ ରନ ଖେଳିଥିଲେ। ତେବେ ମଧ୍ୟଭାଗରେ ଆନ୍ଦ୍ରେ ରସେଲ ଏବଂ ସୁନୀଲ ନାରିନ ନିୟମିତ ବ୍ୟବଧାନରେ ଆରସିବି ଉଇକେଟ ନେଇ କେକେଆରକୁ ମ୍ୟାଚକୁ ଫେରାଇ ଆଣିଥିଲେ। ଆରସିବି ବ୍ୟାଟ୍ସମ୍ୟାନ ଦ୍ରୁତ ଗତିରେ ଖେଳିବା ଜାରି ରଖିଥିଲେ ମଧ୍ୟ ଦଳ ଅନ୍ୟ ପ୍ରାନ୍ତରୁ ଉଇକେଟ ହରାଇଥିଲା।

ଶେଷ ଓଭରରେ ଜିତିବା ପାଇଁ ଆରସିବି ୨୧ ରନ ଆବଶ୍ୟକ କରିଥିଲା ଏବଂ ଆଇପିଏଲର ସବୁଠାରୁ ମହଙ୍ଗା ଖେଳାଳି ଦ୍ରୁତ ବୋଲର ମିଚେଲ ଷ୍ଟାର୍କ ବୋଲିଂ କରିବାକୁ ଆସିଥିଲେ। ଷ୍ଟାର୍କଙ୍କ ସାମ୍ନାରେ କରଣ ଶର୍ମା ତିନିଟି ଛକା ମାରିଥିଲେ। ସେହି ସମୟରେ ଆରସିବି ଦୁଇଟି ବଲରୁ ତିନି ରନ ଆବଶ୍ୟକ କରୁଥିଲା, କିନ୍ତୁ ଷ୍ଟାର୍କ ନିଜ ବଲରେ କରନଙ୍କ କ୍ୟାଚ୍‌ ନିଜେ ଧରିଥିଲେ। ଶେଷ ବଲରେ ଆରସିବି ତିନି ରନ ଆବଶ୍ୟକ କରିଥିଲା ଏବଂ ଲକି ଫର୍ଗୁସନ ଷ୍ଟ୍ରାଇକ୍‌ରେ ଥିଲେ। ଫର୍ଗୁସନ ଦୁଇଟି ରନ ପାଇଁ ଦୌଡ଼ିଥିଲେ, କିନ୍ତୁ ଗୋଟିଏ ରନ ଶେଷ କରିବା ପରେ ଆଉଟ ହୋଇଥିଲେ। ଏହିପରି ଏହି ରୋମାଞ୍ଚକର ମ୍ୟାଚରେ କେକେଆର ଆରସିବିକୁ ଗୋଟିଏ ରନ୍‌ରେ ପରାସ୍ତ କଲା।