ସେପ୍ଟେମ୍ୱର ୯ରୁ ୨୮ ଯାଏଁ ଏସିଆ କପ୍ ଟୁର୍ଣ୍ଣାମେଣ୍ଟ, ୧୪ରେ ଭାରତ-ପାକିସ୍ତାନ ମ୍ୟାଚ୍ !

ନୂଆଦିଲ୍ଲୀ: ଏସିଆ କପ୍ ୨୦୨୫ ୟୁଏଇରେ ଖେଳାଯିବ । ଟୁର୍ଣ୍ଣାମେଣ୍ଟ ସେପ୍ଟେମ୍ୱର ୯ରୁ ଆରମ୍ଭ ହେବ ଓ ସେପ୍ଟେମ୍ୱର ୨୮ରେ ଫାଇନାଲ୍ ମ୍ୟାଚ୍ ଖେଳାଯିବ । ଏସିଆନ୍ କ୍ରିକେଟ୍ କାଉନସିଲ୍ (ଏସିସି)ର ଅଧ୍ୟକ୍ଷ ମୋହସିନ ନକଭୀ ଏହି ସୂଚନା ଦେଇଛନ୍ତି । ଟୁର୍ଣ୍ଣାମେଣ୍ଟ ଟି-୨୦ ଫର୍ମାଟରେ ଖେଳାଯିବ । ଭାରତ ଏବଂ ପାକିସ୍ତାନ ମଧ୍ୟରେ ସେପ୍ଟେମ୍ୱର ୧୪ରେ ମ୍ୟାଚ୍ ହୋଇପାରେ ।

ପାକିସ୍ତାନ କ୍ରିକେର୍ଟ ବୋର୍ଡର ଅଧ୍ୟକ୍ଷ ନକଭୀ ସୋସିଆଲ୍ ମିଡିଆ ପୋଷ୍ଟରେ ଲେଖିଛନ୍ତି, ମୁଁ ଖୁସି ଯେ ଏସିସି ଏସିଆ କପ୍ ୨୦୨୫ ଏବେ ଆନୁଷ୍ଠାନିକ ଭାବେ ୟୁଏଇରେ ସେପ୍ଟେମ୍ୱର ୯ରୁ ୨୮ ଯାଏ ଖେଳାଯିବ । ଏହା ଏକ ଚମତ୍କାର ଟୁର୍ଣ୍ଣାମେଣ୍ଟ ହେବ ଓ ଆମେ ସମସ୍ତଙ୍କୁ ଏକ ଭଲ କ୍ରିକେଟ୍ ଦେଖିବାକୁ ମିଳିବ । ଖୁବଶୀଘ୍ର ଖେଳ ସୂଚୀ ଜାରି କରାଯିବ । ଉଲ୍ଲେଖଯୋଗ୍ୟ ଯେ ଏସିଆ କପ୍ ୨୦୨୫ର ଆୟୋଜନ ଭାରତକୁ ମିଳିଛି, କିନ୍ତୁ ଭାରତ-ପାକିସ୍ତାନ ମଧ୍ୟର ତିକ୍ତ ସମ୍ପର୍କ କାରଣରୁ ନ୍ୟୁଟ୍ରଲ ଭେନ୍ୟୁରେ ଟୁର୍ଣ୍ଣାମେଣ୍ଟ ଖେଳାଯିବ ।

ଆଗାମୀ ଏସିଆ କପ୍ ସଂସ୍କରଣରେ ଆଠଟି ଦଳ ଅଂଶଗ୍ରହଣ କରିବେ । ଏଥିରେ ଭାରତ, ପାକିସ୍ତାନ, ଶ୍ରୀଲଙ୍କା, ବାଂଲାଦେଶ, ଆଫଗାନିସ୍ତାନ, ହଂକଂ, ଓମାନ ଏବଂ ୟୁଏଇ ସାମିଲ ଅଛନ୍ତି । ଟୁର୍ଣ୍ଣାମେଣ୍ଟରେ ଆଠଟି ଦଳକୁ ଚାରିଟି ଲେଖାଏଁ ଦୁଇଟି ଗ୍ରୁପରେ ରଖାଯିବ । ତା'ପରେ ପ୍ରତ୍ୟେକ ଗ୍ରୁପରୁ ଶୀର୍ଷ ୨ ଦଳ ସୁପର-୪ ପର୍ଯ୍ୟାୟ ପାଇଁ ଯୋଗ୍ୟତା ଅର୍ଜନ କରିବେ । ଭାରତ, ପାକିସ୍ତାନ, ୟୁଏଇ ଏବଂ ଓମାନକୁ ଗ୍ରୁପ-ଏରେ ରଖାଯାଇପାରେ । ଆଫଗାନିସ୍ତାନ, ଶ୍ରୀଲଙ୍କା, ବାଂଲାଦେଶ ଏବଂ ହଂକଂକୁ ଗ୍ରୁପ୍-ବିରେ ରହିପାରନ୍ତି । ଏହାରି ଭିତରେ ଏସିଆ କପ୍ ୨୦୨୫ର ସମ୍ଭାବ୍ୟ ସୂଚୀ ମଧ୍ୟ ସାମନାକୁ ଆସିଛି । ଭାରତ-ପାକିସ୍ତାନ ମଧ୍ୟରେ ସେପ୍ଟେମ୍ୱର ୧୪ରେ ମୁକାବିଲା ହୋଇପାରେ । 

ଏସିଆ କପ୍ ୨୦୨୩ର ଆୟୋଜନ ପାକିସ୍ତାନ କରିଥିଲା । ତେବେ ଭାରତ ସୁରକ୍ଷା ଦୃଷ୍ଟିରୁ ପାକିସ୍ତାନ ଗସ୍ତ କରିବାକୁ ମନା କରିଦେଇଥିଲା । ଏହାପରେ ଟୁର୍ଣ୍ଣାମେଣ୍ଟକୁ ହାଇବ୍ରିଡ୍ ମଡେଲରେ ଖେଳା ଯାଇଥିଲା । ଭାରତର ସବୁ ମ୍ୟାଚ୍ ଶ୍ରୀଲଙ୍କାରେ ଖେଳାଯାଇଥିଲା । ଭାରତ ଶ୍ରୀଲଙ୍କାକୁ ହରାଇ ଏସିଆ କପ୍ ୨୦୨୩ ଟାଇଟଲ୍ ଜିତିଥିଲା ।