ସେବାରେ ନିଜର ସ୍ବତନ୍ତ୍ରତା ପ୍ରତିଫଳିତହେବା ଦରକାର

ଦେଶିଆ ଇକୋ ରିସୋର୍ଟର ଫାଉଣ୍ଡର ତଥା ସଫଳ ଉଦ୍ୟୋଗୀ ହେଉଛନ୍ତି ଯୁଗବ୍ରତ କର। ପୁରୀରେ ତାଙ୍କର ଜନ୍ମ, ସେଇଠି ସେ ଛୋଟରୁ ବଡ଼ ହୋଇଛନ୍ତି। ପୁରୀ ଆସୁଥିବା ବିଦେଶୀ ପର୍ଯ୍ୟଟକଙ୍କ କାହାଣୀ ଜାଣିବାକୁ ତାଙ୍କୁ ଭଲ ଲାଗେ। ସେମାନେ ଯେପରି ବୁଲିବାକୁ ଆସୁଛନ୍ତି ସେ ମଧ୍ୟ ପୂରା ବିଶ୍ୱ ଭ୍ରମଣ କରିବାକୁ ଚାହୁଁଥିଲେ। ଅନ୍ୟ ମଧ୍ୟବିତ୍ତ ପରିବାର ଭଳି ତାଙ୍କ ଘରେ ମଧ୍ୟ ତାଙ୍କୁ ସୁରକ୍ଷିତ ଭବିଷ୍ୟତ ପାଇଁ ପ୍ରୋତ୍ସାହିତ କରୁଥିଲେ। କିନ୍ତୁ ସେ ଦେଶିଆ ଇକୋ ରିସୋର୍ଟ ମାଧ୍ୟମରେ ନିଜର ସ୍ବପ୍ନ ସାକାର କରିପାରିଛନ୍ତି। ପରିବେଶ ଅନୁକୂଳ ପର୍ଯ୍ୟଟନ ଶିଳ୍ପକୁ ଗୁରୁତ୍ୱ ଦେଉଥିବା ଯୁଗବ୍ରତଙ୍କ ସହ ଧରିତ୍ରୀର ସ୍ବତନ୍ତ୍ର ଆଲୋଚନା…

ପ୍ର- ପର୍ଯ୍ୟଟନ କ୍ଷେତ୍ରରେ ଭବିଷ୍ୟତ ଗଢ଼ିବା କଥା କିପରି ଚିନ୍ତାକଲେ?
ଉ- ମୁଁ ମେକାନିକାଲ ଇଞ୍ଜିନିୟରିଂରେ ପାଠପଢ଼ା ସାରିବା ପରେ ଏକ ବହୁରାଷ୍ଟ୍ରୀୟ କମ୍ପାନୀ(ଏମ୍‌ଏନ୍‌ସି)ରେ ଯୋଗଦେଇଥିଲି। ଏଗ୍ରିକଲ୍‌ଚରାଲ ପମ୍ପ୍‌ ସେଲ୍‌ ପାଇଁ ମୋତେ ଗ୍ରାମୀଣ ଓଡ଼ିଶାକୁ ଯାତ୍ରା କରିବାକୁ ପଡ଼ୁଥିଲା। ମାତ୍ର ପରିଭ୍ରମଣ ଓ ନୂଆ ନୂଆ ପରମ୍ପରା ବିଷୟରେ ଜାଣିବାର ମୋର ଯେଉଁ ଆଗ୍ରହ ଥିଲା, ତାହା ମୋତେ ଚାକିରି ଛାଡ଼ିବାକୁ ବାଧ୍ୟ କରିଥିଲା ଏବଂ ପର୍ଯ୍ୟଟନ କ୍ଷେତ୍ରରେ ମୁଁ ଉଦ୍ୟୋଗୀ ଭାବେ ପାଦ ଦେଇଥିଲି। ଏହା ଭିତରେ ପ୍ରାୟ ୩୦ ବର୍ଷ ବିତିଗଲାଣି। ପର୍ଯ୍ୟଟନ କ୍ଷେତ୍ରରେ ଅଭିବୃଦ୍ଧି ସହ ସ୍ଥାନୀୟ ସମ୍ପ୍ରଦାୟକୁ ସଶକ୍ତ କରିବା ଏବଂ ସଂସ୍କୃତି ଓ ଐତିହ୍ୟ ବିକାଶ ଦିଗରେ କାର୍ଯ୍ୟ କରୁଛି।

ପ୍ର- ଏହି କ୍ଷେତ୍ରରେ ସୋସିଆଲ ମିଡିଆର ଭୂମିକା କେତେ ଗୁରୁତ୍ୱପୂର୍ଣ୍ଣ?
ଉ- ଓଡ଼ିଶା ଇକୋ ଟୁରିଜମ୍‌ର ପ୍ରଚାରପ୍ରସାର କ୍ଷେତ୍ରରେ ସୋସିଆଲ ମିଡିଆର ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଓଡ଼ିଶାର ବିସ୍ତୃତ ସମୁଦ୍ର ତଟ, ଘଞ୍ଚ ଅରଣ୍ୟ, ବିବିଧ ବନ୍ୟପ୍ରାଣୀ ପର୍ଯ୍ୟଟକମାନଙ୍କୁ ବିଶେଷକରି ଯୁବପିଢ଼ିଙ୍କୁ ଖୁବ୍‌ ଆକୃଷ୍ଟ କରୁଛି। ଇନ୍‌ଷ୍ଟା, ଫେସ୍‌ବୁକ୍‌, ୟୁଟ୍ୟୁବ୍‌ ଆଦି ମାଧ୍ୟମରେ ଜାତୀୟ ଉଦ୍ୟାନ ଭିତରକନିକାଠାରୁ ଆରମ୍ଭ କରି ଶିମିଳିପାଳ, କୋରାପୁଟ ଉପତ୍ୟକା ଆଦି ସ୍ଥାନ ଲୋକପ୍ରିୟତା ସାଉଁଟୁଛି। ଭିଜୁଆଲ ଷ୍ଟୋରି ଟେଲିଂ ତଥା ସୋସିଆଲ ମିଡିଆ ଇନ୍‌ଫ୍ଲୁଏନ୍ସରମାନେ ରାଜ୍ୟର ସ୍ବତନ୍ତ୍ର ଐତିହ୍ୟ ପରମ୍ପରାର ପ୍ରଚାରପ୍ରସାରରେ ସହାୟକ ହେଉଛନ୍ତି। ବାର୍ଡ ଓ୍ବାଚିଂ, ଟ୍ରେକିଂ ଓ ଭିଲେଜ୍‌ ଟୁର୍‌ର ଚାହିଦା ବଢ଼ୁଛି।

ପ୍ର- ଆପଣଙ୍କ ବ୍ୟବସାୟ କ୍ଷେତ୍ରରେ ବିଭିନ୍ନ ଗ୍ରାହକଙ୍କ ଚାହିଦା ଭିନ୍ନ ଭିନ୍ନ ରହିଥାଏ। ଆପଣ ଏହାର କେମିତି ସମାଧାନ କରନ୍ତି?
ଉ- ଯେଉଁ ଅତିଥିମାନେ ଆମ ସହ ପରିଭ୍ରମଣ କରିଥା’ନ୍ତି ସେମାନେ ପ୍ରଥମରୁ ଆମେ ପ୍ରଦାନ କରୁଥିବା ସେବା ଓ ସୁବିଧା ସମ୍ପର୍କରେ ଅବଗତ ଥା’ନ୍ତି। ତେଣୁ ଅତିଥିମାନେ ସେହି ଅନୁରୂପ ସେବା ଆଶା ରଖନ୍ତି। ଆମେ ମଧ୍ୟ ଆମ ସେବାରେ ଅବହେଳା କରୁନା। ତେଣୁ କୌଣସି ଅସୁବିଧା ହୁଏ ନାହିଁ।

ପ୍ର- ଆପଣଙ୍କ ଏ ପର୍ଯ୍ୟନ୍ତର ଯାତ୍ରା କିପରି ରହିଛି? ଆଗକୁ କ’ଣ ଯୋଜନା ରହିଛି?
ଉ- ଓଡ଼ିଶାର ସମୃଦ୍ଧ ସାଂସ୍କୃତିକ ଐତିହ୍ୟ ଓ ପ୍ରାକୃତିକ ସୌନ୍ଦର୍ଯ୍ୟକୁ ବିଶ୍ୱ ଦରବାରରେ ପରିଚିତ କରାଇବାର ପ୍ରୟାସକୁ ଆମ ଟିମ୍‌, ପାର୍ଟନର ଏବଂ ସ୍ଥାନୀୟ ବାସିନ୍ଦା ସଫଳ କରିଛନ୍ତିି। ପର୍ଯ୍ୟଟନ ଶିଳ୍ପରେ ପରିବେଶ ଅନୁକୂଳ କାର୍ଯ୍ୟକଳାପକୁ ଗୁରୁତ୍ୱ ଦେଉଛୁ। ନୀଳାଦ୍ରି ବିଚ୍‌, ସାତପଡ଼ା ଟୁରିଷ୍ଟ ଜେଟିସ୍‌କୁ ପ୍ଲାଷ୍ଟିକ୍‌ମୁକ୍ତ କରିବା ପାଇଁ ଆମର ଓଡ଼ିଶା ଇକୋଟୁରିଜମ୍‌ ଫାଉଣ୍ଡେଶନ୍‌ କାର୍ଯ୍ୟ କରୁଥିବାବେଳେ ଆଗକୁ ଅନ୍ୟାନ୍ୟ ସ୍ଥାନରେ ଏହି ପଦକ୍ଷେପ ଗ୍ରହଣ କରାଯିବ। ଦେଶିଆ ଡ଼ୁଡ଼ୁମା, ଦେଶିଆ ଦେଓମାଳି, ଦେଶିଆ ଚିଲିକା ନେଷ୍ଟ ପରେ ଓଡ଼ିଶାର ବିଭିନ୍ନ ସ୍ଥାନରେ ଇକୋ ଲଜ୍‌ ପାଇଁ ଯୋଜନା କରାଯାଉଛି। ସୋସିଆଲ ମିଡିଆରେ ପ୍ରଚାରପ୍ରସାର ସହ କର୍ମଚାରୀଙ୍କୁ ଅଧିକ ତାଲିମ ଦିଆଯିବ।

ପ୍ର- ପର୍ଯ୍ୟଟନ କ୍ଷେତ୍ରରେ ସଫଳ ଉଦ୍ୟୋଗୀ ହେବାର କ’ଣ ସୂତ୍ର ରହିଛି?
ଉ- ପର୍ଯ୍ୟଟନ ଓ ସ୍ଥାନୀୟ ସମ୍ପ୍ରଦାୟର ବିକାଶ ଉଦ୍ଦେଶ୍ୟରେ ନିଷ୍ଠାର ସହ ଏହି କ୍ଷେତ୍ରରେ ପ୍ରବେଶକଲେ ସଫଳତା ମିଳିବ। ଅତିଥିଙ୍କୁ ପ୍ରଦାନ କରାଯାଉଥିବା ସେବାରେ ଆପଣଙ୍କ ସ୍ବତନ୍ତ୍ରତା ପ୍ରତିଫଳିତ ହେବା ଦରକାର। ସେହିପରି ପରିବେଶ ଅନୁକୂଳ କାର୍ଯ୍ୟକଳାପ ଓ ସାମାଜିକ ଦାୟିତ୍ୱବୋଧ ଦୀର୍ଘକାଳୀନ ସଫଳତାର ସୂତ୍ର। ଏହିସବୁ ସୂତ୍ରକୁ ପାଥେୟ କରି ପର୍ଯ୍ୟଟନ ଶିଳ୍ପରେ ଭବିଷ୍ୟତ ଗଢ଼ିହେବ।

-ସାକ୍ଷାତ୍‌କାର: ଅନୁରାଧା ମହାରଣା, ଭୁବନେଶ୍ୱର

The post ସେବାରେ ନିଜର ସ୍ବତନ୍ତ୍ରତା ପ୍ରତିଫଳିତହେବା ଦରକାର appeared first on Dharitri Odia News.