ସ୍କୁଲ-କୋଚିଂ ସେଣ୍ଟର ବନ୍ଦ, ଶୁଖି ଗଲାଣି ବୋରୱେଲ...ପାଣି ପାଇଁ ଡହଳବିକଳ ବେଙ୍ଗାଲୁରୁରେ ‘ଏମର୍ଜେନ୍ସି’

ନୂଆଦିଲ୍ଲୀ: ଦିନେ ଗାର୍ଡେନ ସିଟି ନାଁରେ ପରିଚିତ ଥିବା ବେଙ୍ଗାଲୁରୁ ଏବେ ପାଣି ମୁନ୍ଦାଏ ପାଇଁ ଡହଳବିକଳ ହେଉଛି । ଗ୍ରୀଷ୍ମ ଆସିବା ପୂର୍ବରୁ ହିଁ ସହରରେ ଜଳ ସଂକଟ ଅଧିକ ହୋଇଛି । ଯାହା କେବେଳ ବେଙ୍ଗାଲୁରୁ ପାଇଁ ନୁହେଁ ବରଂ ସାରା ଦେଶ ପାଇଁ ଚିନ୍ତାର ବିଷୟ ଅଟେ । କିଛି ଅଞ୍ଚଳର ସ୍ଥିତି ଏତେ ଖରାପ ଯେ ଏଠାକାର କୋଚିଂ ସେଣ୍ଟର ଏବଂ ସ୍କୁଲ ପିଲାମାନଙ୍କୁ ଘରେ ରହି କ୍ଲାସ୍ କରିବାରୁ କହିଛନ୍ତି ।

ବେଙ୍ଗାଲୁରୁର ବିଜୟନଗରରେ ସ୍ଥିତ କୋଚିଂ ସେଣ୍ଟର ନିଜ ଛାତ୍ରଛାତ୍ରୀଙ୍କୁ ଗୋଟିଏ ସପ୍ତାହ ଲାଗି ଜରୁରୀକାଳୀନ ସ୍ଥିତି ଯୋଗୁଁ ଅନଲାଇନ୍ କ୍ଲାସ କରିବାକୁ କହିଛି । ଅନ୍ୟପଟେ, ସହରର ବନ୍ନେରଘଟ୍ଟା ରୋଡ୍ ସ୍ଥିତ ଏକ ସ୍କୁଲ ବନ୍ଦ ହୋଇଛି । ସ୍କୁଲ ପ୍ରଶାସନ ଛାତ୍ରଙ୍କୁ ଭର୍ଚୁଆଲ୍ ମାଧ୍ୟମରେ କ୍ଲାସରେ ଯୋଗ ଦେବାକୁ କହିଛନ୍ତି ।

ପଢନ୍ତୁ: ୫ ଟଙ୍କାରେ ୨୦ ଲିଟର: ଗାଧୋଇବାକୁ କଲବଲ ଲୋକେ, ବେଙ୍ଗାଲୁରୁରେ ପାଣି ପାଇଁ ହାହାକାର

ଜରୁରୀ ସ୍ଥିତି ଅର୍ଥାତ୍ ଗମ୍ଭୀର ଜଳ ସଂକଟ । କର୍ଣ୍ଣାଟକ ଚଳିତ ବର୍ଷ ଜଳ ସଂକଟର ସାମନା କରୁଛି । ଏହାର ଏକ କାରଣ ଗତ ବର୍ଷ କମ ବର୍ଷା ହେବା । ଭାରତୀୟ ପାଣିପାଗ ବିଜ୍ଞାନ ବିଭାଗ କମ ବର୍ଷ ପାଇଁ ଅଲ୍ ନିନୋ ପ୍ରଭାବକୁ ଦାୟୀ କରିଛି ।

ବେଙ୍ଗାଲୁରୁର ସ୍ଥିତି କେତେ ଭୟଙ୍କର ରହିଛି ତାର ଅନୁମାନ ଏଥିରୁ କରାଯାଇ ପାରିବ ଯେ କୁମାରକୃପା ରୋଡ ସ୍ଥିତ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟାଙ୍କ କାର୍ଯ୍ୟାଳୟ ଭିତରେ ପାଣି ଟ୍ୟାଙ୍କର ରହିଛି । କେବଳ ଏତିକି ନୁହେଁ ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କ ସଦାଶିବନଗର ସ୍ଥିତ ଘରେ ଥିବା ବୋରୱେଲ ମଧ୍ୟ ଶୁଖି ଯାଇଛି ।