ହାଇକୋର୍ଟଙ୍କ ଅଜବ ନିର୍ଦ୍ଦେଶ; ସ୍ବାମୀଙ୍କ ରୋଜଗାର ମାତ୍ର ୧୫ହଜାର, ପତ୍ନୀଙ୍କୁ ଦେବେ ୧୨ ହଜାର ଭରଣପୋଷଣ...

ନୂଆଦିଲ୍ଲୀ ୧୯।୦୫: ଦିଲ୍ଲୀ ହାଇକୋର୍ଟଙ୍କ ଅଜବ ରାୟ । ପତ୍ନୀଙ୍କୁ ଭରଣପୋଷଣ ଦେବାକୁ ସ୍ବାମୀଙ୍କୁ ନିର୍ଦ୍ଦେଶ ଦେଇଛନ୍ତି କୋର୍ଟ । ସେ ପୁଣି ୧୨ ହଜାର ଟଙ୍କା । କିନ୍ତୁ ଜାଣି ଆଶ୍ଚର୍ଯ୍ୟ ହେବେ ସ୍ବାମୀଙ୍କର ଆୟ ହେଉଛି ୧୫ ହଜାର ଟଙ୍କା । ଏପରି କିଛି ରାୟ ଦିଲ୍ଲୀ ହାଇକୋର୍ଟ ୧୩ ମଇ ୨୦୨୫ରେ ଶୁଣାଇଛନ୍ତି । ଯାହାକୁ ନେଇ ଏବେ ବେଶ୍ ଚର୍ଚ୍ଚା । 

ତେବେ ପରିବାର କୋର୍ଟ ଦ୍ୱାରା ତାଙ୍କର ITR ଏବଂ ବ୍ୟାଙ୍କ ଷ୍ଟେଟମେଣ୍ଟ ଯାଞ୍ଚ କରିବା ପର୍ଯ୍ୟନ୍ତ ସ୍ୱାମୀଙ୍କୁ ପ୍ରତି ମାସର ୧୦ ତାରିଖ ସୁଦ୍ଧା ମଧ୍ୟବର୍ତ୍ତୀକାଳୀନ ଭରଣପୋଷଣ ଦେବାକୁ ପଡିବ । ଖବର ଅନୁଯାୟୀ ସ୍ୱାମୀ ୨୦୧୦ ମସିହାରୁ ପଞ୍ଜାବ ଏବଂ ହରିୟାଣା ହାଇକୋର୍ଟରେ ଜଣେ ଓକିଲ ଭାବରେ କାର୍ଯ୍ୟ କରୁଛନ୍ତି । ସେ ଜାନୁଆରୀ ୨୦୧୬ରେ ଦିଲ୍ଲୀ ସରକାରରେ କାର୍ଯ୍ୟରତ ଜଣେ ଶିକ୍ଷକଙ୍କୁ ବିବାହ କରିଥିଲେ । ବିବାହର ପ୍ରାୟ ୧୮ ମାସ ପରେ ତାଙ୍କ ସ୍ତ୍ରୀ ଜୁଲାଇ ୨୦୧୭ରେ ତାଙ୍କୁ ଛାଡ଼ି ଚାଲିଯାଇଥିଲେ ଏବଂ ସେବେଠାରୁ ସେମାନେ ପୃଥକ ଭାବରେ ରହୁଛନ୍ତି।

ସ୍ୱାମୀ ଅଭିଯୋଗ କରିଛନ୍ତି ଯେ ସେ ଜଣେ ସରକାରୀ ଶିକ୍ଷୟିତ୍ରୀ ଏବଂ ସେ ପ୍ରାୟ ୪୦ରୁ ୪୫ ହଜାର ଟଙ୍କା ରୋଜଗାର କରନ୍ତି । କିନ୍ତୁ ସେ ନିଜ ଇଚ୍ଛାରେ ବେକାର ରହିବାକୁ ପସନ୍ଦ କରିଥିଲେ  ଏବଂ ଏହା ବଦଳରେ ତାଙ୍କୁ ଭରଣପୋଷଣ ଟଙ୍କା ମାଗିଥିଲେ । ଏହାପରେ ସ୍ୱାମୀ କହିଛନ୍ତି ଯେ ଦିଲ୍ଲୀ ସରକାର ପିଲାଟିର ଶିକ୍ଷାର ପ୍ରମୁଖ ଖର୍ଚ୍ଚ ବହନ କରନ୍ତି, ଯେଉଁଥିରେ ଟ୍ୟୁସନ୍ ଫି, ପୁସ୍ତକ ଏବଂ ଅନେକ ସୁବିଧା ଅନ୍ତର୍ଭୁକ୍ତ । 

ପତ୍ନୀଙ୍କ ଓକିଲ ଏହାକୁ ବିରୋଧ କରିଥିଲେ । କହିଥିଲେ କି ତାଙ୍କ ଅନୁପସ୍ଥିତିରେ ପିଲାମାନଙ୍କର ଯତ୍ନ ନେବା ପାଇଁ କେହି ନଥିଲେ । ଆଉ ତାଙ୍କ ନାବାଳକ ପିଲାର ଯତ୍ନ ନେବା ପାଇଁ ଚାକିରି ଛାଡି ଦେଇଥିଲେ । ପତ୍ନୀ ଏହା ମଧ୍ୟ ଅଭିଯୋଗ କରିଛନ୍ତି ଯେ ତାଙ୍କ ସ୍ୱାମୀ ଅନେକ ସମ୍ପତ୍ତିରୁ ଭଡ଼ା ଆଦୟ କରନ୍ତି । ଯାହା ସେ କୋର୍ଟରେ ପ୍ରକାଶ କରି ନଥିଲେ । 

ଏହା ସହିତ ପତ୍ନୀ କୋର୍ଟକୁ କହିଥିଲେ ଯେ ସ୍କୁଲକୁ ଯିବା ଆସିବା କରିବା ସମୟସାପେକ୍ଷ ଏବଂ ସେ ତାଙ୍କ ଘର ପାଖରେ କୌଣସି ଚାକିରି ପାଇ ପାରୁ ନଥିଲେ, ତେଣୁ ତାଙ୍କୁ ତାଙ୍କ ନାବାଳକ ପିଲାର ଯତ୍ନ ନେବା ପାଇଁ ଚାକିରି ଛାଡିବାକୁ ପଡିଲା।

ଏହାକୁ ନେଇ ହାଇକୋର୍ଟ କହିଛନ୍ତି କି ଯଦି ଜଣେ ସ୍ତ୍ରୀ ତାଙ୍କ ସ୍ୱାମୀଙ୍କଠାରୁ ଅଲଗା ରହୁଛନ୍ତି ଏବଂ ତାଙ୍କ ପିଲାକୁ ଲାଳନପାଳନ କରିବା ପାଇଁ ଚାକିରି ଛାଡି ଦିଅନ୍ତି । ତେବେ ଏହାକୁ ତାଙ୍କର ସ୍ୱେଚ୍ଛାକୃତ ଭାବରେ କାମରୁ ଅନୁପସ୍ଥିତି ଭାବରେ ବିବେଚନା କରାଯିବ ନାହିଁ । ତେଣୁ ତାଙ୍କର ଭରଣପୋଷଣ ପାଇବାର ଅଧିକାର ଅଛି ।