ହିମାଚଳ ପ୍ରଦେଶରେ ପୁଣି ବାଦଲ ଫଟା ବର୍ଷା :୯ମୃତ, ୪୭ ଜଣ ନିଖୋଜ

ଶିମ୍‌ଲା, ୦୪।୮: ହିମାଚଳ ପ୍ରଦେଶରେ ଶୁକ୍ରବାର  ପୁଣି ବାଦଲ ଫଟା ବର୍ଷା ହୋଇଛି । ଲାହୌଲ ସ୍ପୀତିର ପିନ୍‌  ଭ୍ୟାଲିରେ ଗତକାଲି ସନ୍ଧ୍ୟା ପ୍ରାୟ ୬ଟାରେ ବାଦଲଫଟା ବର୍ଷା ଯୋଗୁ ବନ୍ୟା ଆସିଥିଲା । ସେଥିରେ ଜଣେ ମହିଳା ଭାସି ଯାଇଛନ୍ତି । ପୋଲିସ ତାଙ୍କର ଶବ ଉଦ୍ଧାର କରିଛି। କୁଲ୍ଲୁ, ମଣ୍ଡି  ଓ ଶିମଲାରେ ବି ବାଦଲ ଫଟା ବର୍ଷା ହୋଇଛି । ଏହାପୂର୍ବରୁ  ଗୁରୁବାର ୫ଟି ସ୍ଥାନରେ ବାଦଲଫଟା ବର୍ଷା ହେବାରୁ ୯   ଜଣଙ୍କର ମୃତ୍ୟୁ ଘଟିଥିଲା । ସେଥିଯୋଗୁ ଏବେ ମଧ୍ୟ ୪୭  ଜଣ ନିଖୋଜ ଅଛନ୍ତି । ସେମାନଙ୍କ ମଧ୍ୟରୁ ୩୬ ଜଣ କେବଳ  ଶିମ୍‌ଲାର । ନିଖୋଜ ଲୋକଙ୍କର ସନ୍ଧାନ ଲାଗି ଏନ୍‌ଡିଆରଏଫ,  ଏସ୍‌ଡିଆରଏଫ୍‌, ପୁଲିସ ଓ ହୋମଗାର୍ଡର ଯବାନମାନେ  ଉଦ୍ୟମ କରୁଛନ୍ତି । ଡ୍ରୋନ୍‌ର ମଧ୍ୟ ବ୍ୟବହାର କରାଯାଉଛି ।   

ରାଜ୍ୟ ବିପର୍ଯ୍ୟୟ  ପରିଚାଳନା   ସଂସ୍ଥାନ ପକ୍ଷରୁ  କୁହାଯାଇଛି ଯେ  , ବିଗତ ୫୬  ଘଣ୍ଟା ମଧ୍ୟରେ  ବନ୍ୟା ଓ ବାଦଲ   ଫଟା ବର୍ଷା ଯୋଗୁ  ୬୦ଟି ଘର ଧ୍ୱସ୍ତ ହୋଇଯାଇଛି । ଏହାଛଡ଼ା ୧୪ଟି ପୋଲ, ୪ଟି  ସ୍କୁଲ ଓ ଗୋଟିଏ ହସ୍ପିଟାଲ ଭୁଶୁଡି଼ ପଡିଛି । ରାଜ୍ୟରେ ୩ଟି  ଜାତୀୟ ରାଜପଥ ସହିତ ୧୯୧ଟି ସଡ଼କ ବନ୍ଦ ରହିଛି । ୮୨ଟି  ରୁଟ୍‌ରେ ବସ୍‌ ସେବାକୁ ଆଶିଂକ ବନ୍ଦ କରାଯାଇଛି । ସେପଟେ  ବାଦଲଫଟା ବର୍ଷା ପରେ ଉତ୍ତରାଖଣ୍ଡର କେଦାରନାଥରେ  ଫସି ରହିଥିବା ତୀର୍ଥଯାତ୍ରୀଙ୍କୁ ଉଦ୍ଧାର କରିବା ଅଭିଯାନ   ଶନିବାର ତୃତୀୟ ଦିନରେ ବି ଜାରି ରହିଛି। ଅଦ୍ୟାବଧି  ୧୦,୫୦୦ରୁ ଅଧିକ ଲୋକଙ୍କୁ ଉଦ୍ଧାର କରାଯାଇଛି ।

ତେବେ   କେଦାରନାଥ, ଭୀମବଲି ଓ ଗୌରୀକୁଣ୍ଡରେ ପ୍ରାୟ ୧୩୦୦  ତୀର୍ଥଯାତ୍ରୀ ଫସିରହିଥିବା ଅଧିକାରୀମାନେ କହିଛନ୍ତି ।  ସମସ୍ତେ ସୁରକ୍ଷିତ ଅଛନ୍ତି । କେଦାରନାଥ ଯାତ୍ରାକୁ ବର୍ତ୍ତମାନ  ଲାଗି ବନ୍ଦ କରାଯଇଛି । ଫଶିଥିବା ଲୋକଙ୍କୁ ଉଦ୍ଧାର ଲାଗି   ଏସ୍‌ଡିଆରଏଫ, ଏନ୍‌ଡିଆରଏଫ୍‌ ଅଭିଯାନ ଚଳାଇଛି ।  ବାୟୁସେନାର ଚିନୁକ୍‌ ଓ ଏମ୍‌ଆଇ-୧୭ ହେଲିକପ୍ଟର ମଧ୍ୟ  ଉଦ୍ଧାରରେ ସାମିଲ ରହିଛି । ଜିଲ୍ଲା ପ୍ରଶାସନ ପକ୍ଷରୁ ଲୋକଙ୍କ  ଲାଗି ଦୁଇଟି ହେଲପଲାଇନ୍‌ ନମ୍ବର ଜାରି ହୋଇଛି ।