ହେମନ୍ତ ସୋରେନଙ୍କ ସଙ୍ଗିନ ଅଭିଯୋଗ, କହିଲେ ସମସ୍ତ ପୂର୍ବତନ ମୁଖ୍ୟମନ୍ତ୍ରୀ ମିଶି ମୋତେ …

ରାଞ୍ଚି,୧୯।୯: ଝାଡ଼ଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନ ଗୁରୁବାର ଭାଜପା ଏବଂ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ‘ଆପକି ସରକାର ଆପକେ ଦ୍ୱାର’ କାର୍ଯ୍ୟକ୍ରମ ଅନ୍ତର୍ଗତ ଗରୱା ଜିଲାର ମେରାଲରେ ଏକ ସାଧାରଣ ସଭାରେ ସମ୍ବୋଧିତ କରି ସେ କହିଛନ୍ତି ଯେ ମୋତେ ମୁଖ୍ୟମନ୍ତ୍ରୀ ପଦରୁ ହଟାଇବା ପାଇଁ ରାଜ୍ୟର ସମସ୍ତ ପୂର୍ବତନ ମୁଖ୍ୟମନ୍ତ୍ରୀ ଭାଜପା ସହ ହାତ ମିଳାଇଛନ୍ତି। ପ୍ରଧାନମନ୍ତ୍ରୀ ମଧ୍ୟ ତାଙ୍କ ସହ ଅଛନ୍ତି। ସମସ୍ତ ଲୋକ ଗୋଟିଏ ପାର୍ଶ୍ୱରେ ଅଛନ୍ତି ଏବଂ ମୁଁ ଅନ୍ୟ ପାର୍ଶ୍ୱରେ ଅଛି । କିନ୍ତୁ, ମୋ ଉପରେ ଜନସାଧାରଣଙ୍କ ଆଶୀର୍ବାଦ ଅଛି।
ରାଜ୍ୟରେ ନିର୍ବାଚନ ପାଖେଇ ଆସୁଛି ବୋଲି ହେମନ୍ତ ସୋରେନ କହିଛନ୍ତି। ଏହି ସମୟରେ ହିନ୍ଦୁ-ମୁସଲମାନ ଷଡଯନ୍ତ୍ରକାରୀମାନେ ରାଜ୍ୟରେ ବୁଲୁଛନ୍ତି। ଗୁଜୁରାଟ, ଉତ୍ତର ପ୍ରଦେଶ, ମହାରାଷ୍ଟ୍ର, ହାଇଦ୍ରାବାଦ, ଚଣ୍ଡିଗଡ଼, ମଧ୍ୟପ୍ରଦେଶର ଲୋକମାନେ ପ୍ରତ୍ୟେକ ଗାଁରେ ଦେଖିବାକୁ ପାଇବେ। ଏହି ଲୋକମାନେ ଧନ ବଳ ସହିତ ଜନତାଙ୍କୁ ଏକାଠି କରି ଜାତି, ଧର୍ମ ଏବଂ ସମ୍ପ୍ରଦାୟର ବିଷ ବୁଣିବା କାର୍ଯ୍ୟ କରିବେ। ସେମାନଙ୍କୁ ନିର୍ବାଚନ ଅଖା ଭିତରେ ପ୍ୟାକ କରିବାକୁ ପଡ଼ିବ ଏବଂ ଯେଉଁଠାରୁ ସେମାନେ ଆସିଲେ ସେମାନଙ୍କୁ ସେଠାକୁ ପଠାଇବାକୁ ପଡ଼ିବ। ଯେଉଁମାନେ ଭୋଟ ଚୋରି କରନ୍ତି ସେମାନଙ୍କୁ ରାଜ୍ୟରୁ ବାହାର କରିଦେବାକୁ ପଡ଼ିବ।
କେନ୍ଦ୍ର ସରକାରଙ୍କୁ ଝାଡ଼ଖଣ୍ଡ ପ୍ରତି ବୈମାତୃକ ବ୍ୟବହାର ଅଭିଯୋଗ କରି ସୋରେନ କହିଛନ୍ତି ଯେ ଚାରି ବର୍ଷ ଧରି କେନ୍ଦ୍ର ସାମ୍ନାରେ ନାକ ଘଷିବାରେ ଆମେ ଥକି ଯାଇଥିଲୁ, ସେମାନେ ରାଜ୍ୟର ଦେୟ ପ୍ରଦାନ କରିନଥିଲେ। ଯେତେବେଳେ ଆମେ ଝାଡ଼ଖଣ୍ଡ ପାଇଁ ଅଧିକାର ଦାବି କରୁ, ସେମାନେ ଆମକୁ ଜେଲରେ ରଖିଲେ। ତିନି ବର୍ଷ ଧରି ଆମେ କେନ୍ଦ୍ର ସରକାରଙ୍କ ଠାରୁ ଗରିବ ଲୋକଙ୍କ ପାଇଁ ଗୃହ ଦାବି କରିଆସୁଥିଲୁ, କିନ୍ତୁ ସେମାନେ ଏହାକୁ ଅନୁମୋଦନ କରିନଥିଲେ। ବର୍ତ୍ତମାନ ନିର୍ବାଚନ ପାଖେଇ ଆସୁଥିବାରୁ ସେ କିଛି ଘର ଦେବେ ବୋଲି ଆଗ୍ରହ ଦେଖାଇଛନ୍ତି। ଆମେ ରାଜ୍ୟ ସରକାରଙ୍କ ଅବୁଆ ଆଓ୍ବାସ ସ୍କିମ ଅଧୀନରେ ୨୦ଲକ୍ଷ ଘର ଯୋଗାଇବା ପାଇଁ କାର୍ଯ୍ୟ କରୁଛୁ।

The post ହେମନ୍ତ ସୋରେନଙ୍କ ସଙ୍ଗିନ ଅଭିଯୋଗ, କହିଲେ ସମସ୍ତ ପୂର୍ବତନ ମୁଖ୍ୟମନ୍ତ୍ରୀ ମିଶି ମୋତେ … appeared first on Dharitri Odia News.