ୟୁକ୍ରେନ ଉପରେ ଚଳିତ ବର୍ଷର ସବୁଠାରୁ ବଡ଼ ଆକ୍ରମଣ କଲା ରୁଷିଆ

କ୍ୱିଭ,୧୪।୪: ରୁଷିଆ ପୁଣିଥରେ ୟୁକ୍ରେନ ଉପରେ ଏକ ବଡ଼ ଆକ୍ରମଣ କରିଛି। ରବିବାର ୟୁକ୍ରେନର ସୁମି ସହରରେ ଚର୍ଚ୍ଚ ପ୍ରାର୍ଥନା ସମୟରେ ରୁଷୀୟ କ୍ଷେପଣାସ୍ତ୍ରଗୁଡ଼ିକ ଧ୍ୱଂସଲୀଳା ସୃଷ୍ଟି କରିଥିଲା। ଏହି ଆକ୍ରମଣରେ ୩୪ ଜଣ ପ୍ରାଣ ହରାଇଥିଲେ, ସେମାନଙ୍କ ମଧ୍ୟରେ ଦୁଇଜଣ ନିର୍ଦ୍ଦୋଷ ଶିଶୁ ମଧ୍ୟ ଥିଲେ। ରାସ୍ତାରେ ରକ୍ତ, ଭଗ୍ନାବଶେଷ ଗଦା ଏବଂ ଚିତ୍କାର ଦେଖିବାକୁ ମିଳିଥିଲା। ଏହି ଦୃଶ୍ୟ ଦେଖି ବିଶ୍ୱ ଆଶ୍ଚର୍ଯ୍ୟ ହୋଇଯାଇଛି। ଏହା ୨୦୨୫ ମସିହାରେ ରୁଷିଆର ସବୁଠାରୁ ବଡ଼ ଆକ୍ରମଣ। ରୁଷିଆର ଏହି ବର୍ବରତାରେ ସାରା ବିଶ୍ୱ କ୍ରୋଧିତ ହୋଇଛି। ଅନ୍ୟପକ୍ଷରେ, ଆମେରିକା ୟୁକ୍ରେନର ଗ୍ୟାସ ପାଇପଲାଇନକୁ କବଜା କରିବାକୁ ଚାହୁଁଛି।
ରବିବାର ସୁମିର ଲୋକଙ୍କ ପାଇଁ ଏକ କଳା ଦିନ ହୋଇଗଲା। ଲୋକମାନେ ଚର୍ଚ୍ଚରେ ପ୍ରାର୍ଥନା କରୁଥିଲେ, ପିଲାମାନେ ଖେଳୁଥିଲେ, ଏବଂ ତା’ପରେ ଆକାଶରୁ ରୁଷିଆ ବାଲିଷ୍ଟିକ କ୍ଷେପଣାସ୍ତ୍ର ବର୍ଷା ହେଲା। ୩୪ ଜଣଙ୍କର ମୃତ୍ୟୁ ହୋଇଥିଲା, ୧୧୭ ଜଣ ଆହତ ହୋଇଥିଲେ। ଗୋଟିଏ କ୍ଷେପଣାସ୍ତ୍ର ବିଶ୍ୱବିଦ୍ୟାଳୟ କୋଠାରେ ପଡ଼ିଥିଲା, ଅନ୍ୟଟି ରାସ୍ତା ମଝିରେ ବିସ୍ଫୋରଣ ହୋଇଥିଲା। ସୁମିର ରାସ୍ତାରେ ଯାନବାହାନ ଜଳିଗଲା, କୋଠାଘର ଭୁଶୁଡ଼ି ପଡ଼ିଲା, ଏବଂ ଲୋକଙ୍କ ଜିନିଷପତ୍ର ଭଗ୍ନାବଶେଷ ତଳେ ପୋତି ହୋଇଗଲା। ସିଏନଏନର ଏକ ରିପୋର୍ଟ ଅନୁଯାୟୀ, ୫୨ ବର୍ଷୀୟା ନାତାଲିଆ ପିହୁଲ କାନ୍ଦି କାନ୍ଦି କହିଥିଲେ, ‘ମୋ ମାଆ ରୋଷେଇ କରୁଥିଲେ।’ ହଠାତ ଏକ ବିସ୍ଫୋରଣ ହେଲା ଏବଂ ଆଲମାରୀଟି ତାଙ୍କ ମୁଣ୍ଡ ଉପରେ ପଡ଼ିଗଲା। ତାଙ୍କ ମୁଣ୍ଡରୁ ରକ୍ତ ବାହାରୁଛି, ସେ ଡାକ୍ତରଖାନାରେ ଅଛନ୍ତି।
ତାଙ୍କ ଘରର ଝରକା ଭାଙ୍ଗି ଯାଇଥିଲା ଏବଂ କାଚର ଖଣ୍ଡ ବିଛାଡ଼ି ହୋଇ ପଡ଼ିଥିଲା। ନାତାଲିଆ ନିଜର କ୍ରୋଧ ପ୍ରକାଶ କରି କହିଲେ, ‘ଏଠାରେ କୌଣସି ସାମରିକ ଘାଟି ନଥିଲା।’ ତେବେ ରୁଷିଆ ସାଧାରଣ ଲୋକଙ୍କୁ କାହିଁକି ଟାର୍ଗେଟ କଲା? ଆକ୍ରମଣ ପରେ ୟୁକ୍ରେନୀୟ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ମଧ୍ୟ କ୍ରୋଧିତ। ସେ କ୍ରୋଧର ସହିତ କହିଲେ, ‘ରୁଷ ଜାଣିଶୁଣି ଆତଙ୍କବାଦ ପ୍ରସାର କରୁଛି।’ ଏହି ଲୋକମାନେ ଶାନ୍ତିର ଧାରଣା ବୁଝନ୍ତି ନାହିଁ। ଏହି କ୍ଷେପଣାସ୍ତ୍ରଗୁଡ଼ିକୁ ବନ୍ଦ କରିବା ପାଇଁ ବିଶ୍ୱକୁ କଠୋର ପଦକ୍ଷେପ ନେବାକୁ ପଡିବ।
ରୁଷିଆ ପକ୍ଷରୁ କରାଯାଇଥିବା ଏହି ଆକ୍ରମଣକୁ ସାରା ବିଶ୍ୱ ନିନ୍ଦା କରୁଛି। ଏହାକୁ ନେଇ ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ କହିଛନ୍ତି ଯେ ସୁମି ଉପରେ ରୁଷିଆର ଆକ୍ରମଣ ‘ ଏହି କଥାର ଏକ ଦୁଃଖଦ ରିମାଇଣ୍ଡର କି ରାଷ୍ଟ୍ରପତି ଟ୍ରମ୍ପ ଏବଂ ତାଙ୍କ ପ୍ରଶାସନ ଏହି ଯୁଦ୍ଧ ଶେଷ କରିବା ଏବଂ ଏକ ସ୍ଥାୟୀ ଶାନ୍ତି ପ୍ରତିଷ୍ଠା ପାଇଁ କାହିଁକି ଲାଗିଛନ୍ତି। ଆମେରିକାର ସ୍ବତନ୍ତ୍ର ପ୍ରତିନିଧି କିଥ କେଲୋଗ କହିଛନ୍ତି: ‘ମୁଁ ସେନାରେ କାମ କରିଥିଲି। ମୁଁ ଜାଣଇଛି ଲକ୍ଷ୍ୟଭେଦ କିପରି କରାଯାଏ। ଏହି ଆକ୍ରମଣ ଭୁଲ ଥିଲା। ସେଥିପାଇଁ ଟ୍ରମ୍ପ ଏହି ଯୁଦ୍ଧକୁ ଶେଷ କରିବାକୁ ଚେଷ୍ଟା କରୁଛନ୍ତି।’

The post ୟୁକ୍ରେନ ଉପରେ ଚଳିତ ବର୍ଷର ସବୁଠାରୁ ବଡ଼ ଆକ୍ରମଣ କଲା ରୁଷିଆ appeared first on Dharitri Odia News.