୨୦୦ ଅଙ୍କ ଖସିଲା ସେନ୍‌ସେକ୍ସ, ତଥାପି ନିବେଶକଙ୍କ ଲାଭ ୨.୫ ଲକ୍ଷ କୋଟି ଟଙ୍କା

ନୂଆଦିଲ୍ଲୀ: ଆଇଟି ସେୟାରରେ ବିକ୍ରି ଯୋଗୁ ସେନସେକ୍ସ ଓ ନିଫ୍ଟିରେ ସପ୍ତାହର ଶେଷ କାରବାର ଦିନରେ ହ୍ରାସ ଦେଖିବାକୁ ମିଳିଛି । ସେନ୍‌ସେକ୍ସ ୨୦୦ ଅଙ୍କ ଖସି ବନ୍ଦ ହୋଇଛି । ଅନ୍ୟପଟେ ନିଫ୍ଟି ୪୨ ପଏଣ୍ଟ ଖସିବା ସତ୍ତ୍ୱେ ୨୫,୦୦୦ର ଗୁରୁତ୍ୱପୂର୍ଣ୍ଣ ସ୍ତର ବଜାୟ ରଖିବାରେ ସଫଳ ହୋଇଛି । ତେବେ ବ୍ରଡର୍ ମାର୍କେଟରେ ସ୍ଥିତି ଏହାର ବିପରୀତ ଥିଲା । ସ୍ମଲ୍‌କ୍ୟାପ୍-ମିଡ୍‌କ୍ୟାପ୍ ଇଣ୍ଡେକ୍ସରେ ଲଗାତାର ୫ମ ଦିନରେ ବୃଦ୍ଧି ଦେଖିବାକୁ ମିଳିଛି । 

ବିଏସ୍‌ଇ ସ୍ମଲ୍‌କ୍ୟାପ୍ ଇଣ୍ଡେକ୍ସ ୧.୧୮ ପ୍ରତିଶତ ଓ ମିଡ୍‌କ୍ୟାପ୍ ଇଣ୍ଡେକ୍ସ ୦.୮୫ ପ୍ରତିଶତ ବଢି ବନ୍ଦ ହୋଇଛି । ପ୍ରତିରକ୍ଷା ସେୟାରରେ ଲଗାତାର ଷଷ୍ଠ ଦିନରେ ବି ବୃଦ୍ଧି ଦେଖିବାକୁ ମିଳିଛି । ରେଲୱେ, ରିୟଲ ଇଷ୍ଟେଟ୍, ପାୱର, କ୍ୟାପିଟାଲ ଗୁଡ୍ସ ଓ ୟୁଟିଲିଟି ସେୟାରରେ ମଧ୍ୟ ବଡ଼ ଧରଣର କ୍ରୟ ଦେଖିବାକୁ ମିଳିଛି । ଏହି କାରଣରୁ ସେୟାର ବଜାର ନିବେଶକଙ୍କୁ ଆଜି ୨.୫ ଲାଭ ହୋଇଛି ।

ଆଜିର କାରବାର ଶେଷରେ ବିଏସ୍‌ଇ ସେନ୍‌ସେକ୍ସ ୨୦୦.୧୫ ଅଙ୍କ ବା ୦.୨୪ ପ୍ରତିଶତ ହ୍ରାସ ପାଇ ୮୨,୩୩୦.୫୯ ସ୍ତରରେ ବନ୍ଦ ହୋଇଛି । ଅନ୍ୟପଟେ ଏନ୍‌ଏସ୍‌ଇର ୫୦ ସେୟାର ବିଶିଷ୍ଟ ଇଣ୍ଡେକ୍ସ ନିଫ୍ଟି ୪୨.୩୦ ପଏଣ୍ଟ ବା ୦.୧୭ ପ୍ରତିଶତ ହ୍ରାସ ପାଇ ୨୫,୦୧୯.୮୦ ସ୍ତରରେ ବନ୍ଦ ହୋଇଛି ।

ବିଏସ୍‌ଇରେ ସୂଚୀବଦ୍ଧ କମ୍ପାନିଗୁଡ଼ିକର ମୋଟ୍ ମାର୍କେଟ୍ କ୍ୟାପ୍ ମେ ୧୬ରେ ବଢି ୪୪୨.୭୪ ଲକ୍ଷ କୋଟି ଟଙ୍କା ହୋଇଛି । ଯାହା ପୂର୍ବ କରାବାର ଦିନ ଅର୍ଥାତ୍ ଶୁକ୍ରବାର ମେ ୧୫ରେ ୪୪୦.୧୯ ଲକ୍ଷ କୋଟି ଟଙ୍କା ଥିଲା । ଏହିପରି ବିଏସ୍‌ଇରେ ସୂଚୀବଦ୍ଧ କମ୍ପାନିଗୁଡ଼ିକ ମାର୍କେଟ୍ କ୍ୟାପ୍ ଆଜି ପ୍ରାୟ ୨.୫ ଲକ୍ଷ କୋଟି ଟଙ୍କା ବଢିଛି । ଅନ୍ୟ ଶବ୍ଦରେ କହିବାକୁ ଗଲେ ନିବେଶକଙ୍କୁ ଆଜି ପ୍ରାୟ ୨.୫ ଲକ୍ଷ କୋଟି ଟଙ୍କା ଲାଭ ହୋଇଛି ।  

ବିଏସଇ ସେନସେକ୍ସର ୩୦ ସେୟାର ମଧ୍ୟରୁ ୧୬ ସେୟାର ଆଜି ସବୁଜ ସଂକେତରେ ବନ୍ଦ ହୋଇଛି । ଏଥିରେ ଇଟର୍ନଲ ସେୟାରରେ ସବୁଠୁ ଅଧିକ ୧.୩୮ ପ୍ରତିଶତ ବୃଦ୍ଧି ହୋଇଛି । ଅନ୍ୟପଟେ ୧୪ ସେୟାର ଲାଲ୍ ସଂକେତରେ ବନ୍ଦ ହୋଇଛି । ଏଥିରୁ ଭାରତୀ ଏୟାରଟେଲ ସେୟାରରେ ସର୍ବାଧିକ ୨.୮୧ ପ୍ରତିଶତ ହ୍ରାସ ଘଟିଛି ।