୬.୧ ତୀବ୍ରତାରେ ଦୋହଲିଲା ପେରୁ ମାଟି, ଭୟଙ୍କର ଶକ୍ତିଶାଳୀ କମ୍ପନରେ ଜଣେ ମୃତ

ନୂଆଦିଲ୍ଲୀ ୧୬/୦୬: ଦକ୍ଷିଣ ଆମେରିକୀୟ ଦେଶ ପେରୁରେ ଭୟଙ୍କର କମ୍ପନ ଅନୁଭୂତ । ୬.୧ ତୀବ୍ରତାରେ ଭୂମିକମ୍ପ ଅନୁଭୂତ ହୋଇଛି । ତେବେ ଏହି କମ୍ପନରେ ଜଣଙ୍କର ମୃତ୍ୟୁ ହେବା ସହ ଅନେକ ଗୁରୁତର ହୋଇଛନ୍ତି । ଏଜେନ୍ସି ଅନୁଯାୟୀ, ଅଧିକାରୀମାନେ କହିଛନ୍ତି ଯେ ରବିବାର ପେରୁର କେନ୍ଦ୍ରୀୟ ଉପକୂଳରେ ଭୂମିକମ୍ପ ଝଟକା ଅନୁଭୂତ ହୋଇଥିଲା ।  ଯାହା ଲିମା ଓ ବନ୍ଦର ସହର କାଲାଓକୁ ଥରାଇ ଦେଇଥିଲା । 

ଏହି ଭୂମିକମ୍ପରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବା ଏବଂ ପାଞ୍ଚ ଜଣ ଆହତ ହୋଇଥିବା ଜଣାପଡ଼ିଛି । ପେରୁର ଲିମାରେ ୬.୧ ତୀବ୍ରତାର ଭୂମିକମ୍ପ ପରେ, ପଥରରୁ ଧୂଳି ଏବଂ ବାଲିର ଏକ ମେଘ ଉଠିଥିବା ଦେଖାଯାଇଥିଲା। ଯୁକ୍ତରାଷ୍ଟ୍ର ଭୂତତ୍ତ୍ୱ ସର୍ବେକ୍ଷଣ ଅନୁସାରେ, ସ୍ଥାନୀୟ ସମୟ ରାତି ୧୧.୩୫ରେ ପ୍ରଶାନ୍ତ ମହାସାଗରରେ ଭୂମିକମ୍ପ ହୋଇଥିଲା । ଏହାର କେନ୍ଦ୍ରସ୍ଥଳ ରାଜଧାନୀ ଲିମାର ପଶ୍ଚିମରେ କାଲାଓର ୨୩ କିଲୋମିଟର ଦକ୍ଷିଣ-ପଶ୍ଚିମରେ ଅବସ୍ଥିତ ଥିଲା। 

ରିପୋର୍ଟ ଅନୁଯାୟୀ, ପୋଲିସ କର୍ଣ୍ଣେଲ ରାମିରୋ କ୍ଲାଉକୋ ଆରପିପି ରେଡିଓକୁ କହିଛନ୍ତି ଯେ ଉତ୍ତର ଲିମାରେ ଜଣେ ୩୬ ବର୍ଷୀୟ ବ୍ୟକ୍ତିଙ୍କ ମୃତ୍ୟୁ ଘଟିଛି। ମୃତକ ଜଣକ ତାଙ୍କ ଗାଡ଼ି ବାହାରେ ଜଣେ ଯାତ୍ରୀଙ୍କୁ ଅପେକ୍ଷା କରିଥିଲେ । ଏତିକିବେଳେ ନିର୍ମାଣାଧୀନ ଏକ କୋଠାର ଚତୁର୍ଥ ମହଲା କାନ୍ଥ ଭୁଶୁଡ଼ି ତାଙ୍କ ମୁଣ୍ଡ ଉପରେ ପଡ଼ିଗଲା । ଜରୁରୀକାଳୀନ ଅପରେସନ୍ସ ସେଣ୍ଟର କହିଛି ଯେ ପାଞ୍ଚ ଜଣ ଆହତଙ୍କୁ ହସ୍ପିଟାଲରେ ଚିକିତ୍ସା କରାଯାଉଛି। ଏଜେନ୍ସି ରାସ୍ତା ଏବଂ ଶିକ୍ଷା କେନ୍ଦ୍ରଗୁଡ଼ିକର କ୍ଷତି ବିଷୟରେ ମଧ୍ୟ ରିପୋର୍ଟ କରିଛି।