ସିକ୍କିମର ପୂର୍ବତନ ମୁଖ୍ୟମନ୍ତ୍ରୀ ପୱନ କୁମାର ଚାମଲିଙ୍ଗଙ୍କ ପରାଜୟ, ୪ ଦଶନ୍ଧି ପରେ ବିଧାନସଭାରେ ପଡ଼ିବନି ପାଦ

ନୂଆଦିଲ୍ଲୀ: ସିକ୍କିମ ବିଧାନସଭା ନିର୍ବାଚନ ପରିଣାମ ସାମନାକୁ ଆସି ସାରିଛି । ରେଲଜ୍ଟ ଲୋକଙ୍କୁ ଆଶ୍ଚର୍ଯ୍ୟ କରିଛି କାରଣ ସିକ୍କିମର ପୂର୍ବତନ ମୁଖ୍ୟମନ୍ତ୍ରୀ ପୱନ କୁମାର ଚାମଲିଙ୍ଗ ପୋକଲୋକ ବିଧାନସଭା ଆସନରୁ ନିର୍ବାଚନ ହାରିଛନ୍ତି । ସେ ସିକ୍କିମ କ୍ରାନ୍ତିକାରୀ ମୋର୍ଚ୍ଚାର ପ୍ରାର୍ଥୀ ଭୋଜରାଜ ରାୟଙ୍କଠାରୁ ୩୦୬୩ ଭୋଟ ବ୍ୟବଧାନରେ ପରାଜିତ ହୋଇଛନ୍ତି । ଏହାସହ ୪୦ ବର୍ଷ ପରେ ପ୍ରଥମ ଥର ପାଇଁ ସିକ୍କିମର ପାଞ୍ଚ ଥର ମୁଖ୍ୟମନ୍ତ୍ରୀ ରହିଥିବା ପୱନ କୁମାର ଚାମଲିଙ୍ଗଙ୍କ ପାଦ ବିଧାନସଭାରେ ପଡ଼ିବ ନାହିଁ ।

ଦେଶର କୌଣସି ରାଜ୍ୟରେ ସବୁଠୁ ଦୀର୍ଘ ସମୟ ଯାଏ ମୁଖ୍ୟମନ୍ତ୍ରୀ ରହିବା ଦୌଡରେ ପୱନ କୁମାର ଚାମଲିଙ୍ଗ ସବୁଠୁ ଆଗରେ ଅଛନ୍ତି । ତାଙ୍କ ନାଁରେ ପ୍ରାୟ ୨୫ ବର୍ଷ ଯାଏ ସିକ୍କିମ ମୁଖ୍ୟମନ୍ତ୍ରୀ ରହିବା ରେକର୍ଡ ରହିଛି । ତାଙ୍କର ପାର୍ଟି ଏସଡିଏଫ୍ ସିକ୍କିମ ବିଧାନସଭା ନିର୍ବାଚନରେ ୧୯୯୪,୧୯୯୯,୨୦୦୪,୨୦୦୯ ଏବଂ ୨୦୧୪ରେ ଜିତି ସରକାର ଗଢିଥିଲେ । ଚାମଲିଙ୍ଗ ସିକ୍କିମ ଡେମୋକ୍ରେଟିକ୍ ଫ୍ରଣ୍ଟର ପ୍ରତିଷ୍ଠାତା ଅଧ୍ୟକ୍ଷ ଅଟନ୍ତି । ଚାମଲିଙ୍ଗ ନିଜର ରାଜନୀତିକ କ୍ୟାରିୟର ୩୨ ବର୍ଷରେ ଆରମ୍ଭ କରିଥିଲେ । ଚାମଲିଙ୍ଗ ନେପାଳି ଭାଷାର କବି ଏବଂ ଗୀତିକାର । ସେ ୧୯୮୫ରୁ ୧୯୯୪ ଯାଏ ସିକ୍କିମପ ଦମଥାଙ୍ଗ ଆସନର ପ୍ରତିନିଧିତ୍ୱ କରିଥିଲେ । ଏହାପରେ ସେ ନାମଚୀ-ସିଙ୍ଘିଥାଙ୍ଗ ଆସନରେ ୨୦୧୯ ଯାଏ ବିଧାୟକ ନିର୍ବାଚିତ ହୋଇଥିଲେ ।

ଚାମଲିଙ୍ଗ ଚଳିତ ଥର ଦୁଇଟି ଆସନରୁ ନିର୍ବାଚନ ଲଢୁଥିଲେ । ନାମଚେୟବୁଙ୍ଗ ଆସନରେ ରାଜୁ ବସ୍ନେତଠାରୁ ୨୨୫୬ ଭୋଟ୍ ବ୍ୟବଧାନରେ ପରାଜିତ ହୋଇଛନ୍ତି । ୨୦୧୯ରେ ସିକ୍କିମ କ୍ରାନ୍ତିକାରୀ ମୋର୍ଚ୍ଚା ନେତା ପ୍ରେମ ସିଂଙ୍କ ନେତୃତ୍ୱରେ ସରକାର ଗଠନ କରିବା ପରେ ଚାମଲିଙ୍ଗ ମୁଖ୍ୟମନ୍ତ୍ରୀ ପଦରୁଇ ଇସ୍ତଫା ଦେଇଥିଲେ ।