BRS ପ୍ରାର୍ଥୀଙ୍କ ବୈଠକରେ ଯୋଗ ଦେଇ ୧୦୬ ସରକାରୀ କର୍ମଚାରୀ ସସପେଣ୍ଡ, ନିର୍ବାଚନ କମିଶନଙ୍କ ଆକ୍ସନ

ନୂଆଦିଲ୍ଲୀ: ଭାରତୀୟ ନିର୍ବାଚନ କମିଶନ ମଙ୍ଗଳବାର ତେଲଙ୍ଗାନା ସରକାରର ୧୦୬ ଜଣ ସରକାରୀ କର୍ମଚାରୀଙ୍କୁ ନିଲମ୍ୱନ କରିଛନ୍ତି । ବିଆରଏସର ମେଡକ ପ୍ରାର୍ଥୀ ଏବଂ ପୂର୍ବତନ ଆଇଏଏସ ଅଧିକାରୀ ପି.ଭେଙ୍କଟରତମ ରେଡ୍ଡିଙ୍କ ଦ୍ୱାରା ଆୟୋଜନ କରାଯାଇଥିବା ଏକ କାର୍ଯ୍ୟକ୍ରମରେ ଏହି କର୍ମଚାରୀମାନେ ସାମିଲ ହୋଇଥିଲେ ।

ନିର୍ବାନଚ ଆୟୋଗଙ୍କ ଅନୁସାରେ, ମେଡେକ ପାର୍ଲିଆମେଣ୍ଟ ଅନ୍ତର୍ଗତ ସିଦ୍ଧିପେଟ ବିଧାନସଭା ଅଞ୍ଚଳରେ ବୈଠକ ଆୟୋଜନ କରିବା ପାଇଁ ଆସିଷ୍ଟାଣ୍ଟ ରିଟର୍ଣ୍ଣିଂ ଅଫିସରଙ୍କ ଅନୁମତି ନିଆଯାଆଇ ନଥିଲା । ନିର୍ବାଚନ ଆୟୋଗ କହିଛନ୍ତି, '୨୦୨୪ ଏପ୍ରିଲ ୭ରେ ଅନୁଷ୍ଠିତ ଏହି କାର୍ଯ୍ୟକ୍ରମକୁ ସିସିଟିଭିରେ ରେକର୍ଡ କରାଯାଇଛି । ଯେଉଁଥିରୁ ଏହି ଆୟୋଜନ ହୋଇଥିବା ସ୍ପଷ୍ଟ ହୋଇଛି । ଯାହା ନିର୍ବାଚନ ଆଚରଣ ସଂହିତାର ଉଲ୍ଲଂଘନ ହୋଇଛି।'

ପଢନ୍ତୁ: ଭୀମ୍‌ ଆର୍ମି ମୁଖ୍ୟ ଚନ୍ଦ୍ରଶେଖର ଆଜାଦଙ୍କ ନାଁରେ ସବୁଠୁ ଅଧିକ ମାମଲା, ADR ରିପୋର୍ଟରୁ ଖୁଲାସା

ଏହାସହ ରେଡ୍ଡି ଏବଂ ବିଆରଏସ ନେତାଙ୍କ ବିରୋଧରେ ବିନା ଅନୁମତିରେ ବୈଠକ କରିବା ନେଇ ଏଫଆଇର ମଧ୍ୟ ରୁଜୁ ହୋଇଛି । ନିର୍ବାଚନ ଆୟୋଗଙ୍କ ଦ୍ୱାରା ସସପେଣ୍ଡ ହୋଇଥିବା ସରକାରୀ କର୍ମଚାରୀଙ୍କ ମଧ୍ୟରେ ଟେକ୍ନିକାଲ ଆସିଷ୍ଟାଣ୍ଟ, ଇଞ୍ଜିନିୟରିଂ କନସଲଟାଣ୍ଟ, କମ୍ପ୍ୟୁଟର ଅପରେଟର, କମ୍ୟୁନିଟି କୋର୍ଡିନେଟର, ଅଡିଟର ଆଦି ସାମିଲ ଅଛନ୍ତି । ତେବେ ସସପେଣ୍ଡ ହୋଇଥିବା କର୍ମଚାରୀଙ୍କ ମଧ୍ୟରେ ଅଧିକାଂଶ ସିଦ୍ଧିପେଟ ଜିଲ୍ଲା ଗ୍ରାମାଞ୍ଚଳ ବିକାଶ ଏଜେନ୍ସି (DRDA)ର ଅଛନ୍ତି ।

ବିଜେପି ମେଡକ ପ୍ରାର୍ଥୀ ଏମ.ରଘୁନନ୍ଦନ ରାଓ ଆସିଷ୍ଟାଣ୍ଟ ରିଟର୍ଣ୍ଣିଂ ଅଫିସର ଏବଂ ଆରଡିଓଙ୍କ ନିକଟରେ ଏନେଇ ଅଭିଯୋଗ କରିଥିଲେ । ଏହାପରେ କାର୍ଯ୍ୟାନୁଷ୍ଠାନ ସ୍ୱରୂପ ୧୦୬ ସରକାରୀ କର୍ମଚାରୀଙ୍କୁ ତତ୍କାଳ ନିଲମ୍ୱନ କରାଯାଇଛି ।