ଅଟୋ ଚାଳକ ଭୂମିକାରେ ନଜର ଆସିବେ ହୁମା କ୍ୟୁରେଶୀ, ସାମ୍ନାକୁ ଆସିଲା ପୋଷ୍ଟର

ମୁମ୍ଵାଇ ୧୧।୦୩: ୨୦୧୨ରେ ‘ଗ୍ୟାଙ୍ଗସ୍‌ ଅଫ୍‌ ୱାସେପୁର’  ଜରିଆରେ ବଲିଉଡ୍‌ରେ ଡେବ୍ୟୁ  କରିଥିଲେ ଅଭିନେତ୍ରୀ ହୁମା କ୍ୟୁରେଶୀ । ତା’ପରେ ସେ ‘ବଦ୍‌ଲାପୁର’, ‘ଜଲି  ଏଲ୍‌ଏଲ୍‌ବି ୨’ ଭଳି ଫିଲ୍ମ ମାଧ୍ୟମରେ  ନିଜର ଅଭିନୟ ପ୍ରତିଭା ପ୍ରଦର୍ଶନ  କରିଛନ୍ତି । ନିକଟରେ ଅନ୍ତର୍ଜାତୀୟ  ମହିଳା ଦିବସରେ ନିଜର ଅପ୍‌କମିଙ୍ଗ  ପ୍ରୋଜେକ୍ଟ ସଂପର୍କରେ ଘୋଷଣା କରିଛନ୍ତି  ହୁମା । ବିପୁଲ ମେହେତା ତାର ନିର୍ଦ୍ଦେଶନା ଦେବେ । ଫିଲ୍ମରେ ତାଙ୍କୁ ଜଣେ ଅଟୋ  ରିକ୍ସାଚାଳକଙ୍କ ଭୂମିକାରେ ଦେଖିବାକୁ  ମିଳିବ । 

ତାହା ଏକ ସତ୍ୟ କାହାଣୀ ଉପରେ  ପର୍ଯ୍ୟବସିତ। ନିଜର ଦୃଢ଼ ଇଚ୍ଛାଶକ୍ତି ବଳରେ  ସେହି ମହିଳାଜଣକ କିପରି ଅସାଧ୍ୟ ସାଧନ  କରିବା ସହିତ ଅନ୍ୟମାନଙ୍କ ଲାଗି ପ୍ରେରଣା  ହୋଇପାରିଛନ୍ତି ତାହା ଫିଲ୍ମରେ ଦେଖିବାକୁ ମିଳିବ ।   ନିଜ ଇନ୍‌ଷ୍ଟାଗ୍ରାମ ଆକାଉଣ୍ଟରେ ହୁମା ଫିଲ୍ମକୁ ନେଇ  ଏକ ଫଟୋ ବି ପୋଷ୍ଟ କରିଛନ୍ତି । ସେହି ଫଟୋରେ  ତାଙ୍କୁ କିଛି ମହିଳା ଅଟୋଚାଳକଙ୍କ ସହିତ ଏକ  ଅଟୋ ସାମ୍ନାରେ ବସିଥିବା ଦେଖିବାକୁ ମିଳୁଛି ।  

ଏ ସଂପର୍କରେ ହୁମା କହିଛନ୍ତି, ଏଭଳି ଏକ  ଚାଲେଞ୍ଜିଂ ଚରିତ୍ରରେ ଅଭିନୟ କରିବା ଏକ  ବିରଳ ସୁଯୋଗ । ଅସାଧାରଣ କାମ କରୁଥିବା ଦେଶର ସାଧାରଣ ମହିଳାଙ୍କ ସାହସ ପ୍ରତି  ଏହା ସମର୍ପିତ । ମୋ କ୍ୟାରିୟରକୁ ଏହା  ଏକ ନୂତନ ଦିଗ ଦେଇପାରିବ ବୋଲି ଆଶା  କରୁଛି । ଜ୍ୟୋତି ଦେଶପାଣ୍ଡେ ଓ ବିଶାଲ ରାଣା  ଏହାର ପ୍ରଯୋଜନାରେ ଅଛନ୍ତି । ଫିଲ୍ମର ନାମ  ଜଣାପଡି଼ନଥିବାବେଳେ ଖୁବ୍‌ ଶୀଘ୍ର ସୁଟିଂ  ଆରମ୍ଭ ହେବ ବୋଲି କୁହାଯାଉଛି । ୱାର୍କଫ୍ରଣ୍ଟ  କଥା କହିବାକୁ ଗଲେ ହୁମାଙ୍କୁ ଆଗକୁ ‘ପୂଜା  ମେରୀ ଜାନ୍‌’ରେ ଦେଖିବାକୁ ମିଳିବ ।