ଅଡୁଆରେ ଉଦୟନିଧି, ଡ୍ରଗ୍ସ ସ୍ମଗଲିଂ ମାମଲାରେ ଇଡି ଦାଖଲ କଲା ମନି ଲଣ୍ଡରିଂ କେସ

ନୂଆଦିଲ୍ଲୀ,୧୦।୩: ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ମନ୍ତ୍ରୀ ପୁଅ ଉଦୟନିଧିଙ୍କ ସମସ୍ୟା ବୃଦ୍ଧି ପାଇଛି। ବର୍ତ୍ତମାନ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ମଧ୍ୟ ଡ୍ରଗ୍ସ ଚୋରା ଚାଲାଣ ମାମଲାରେ ଟଙ୍କା ହେରଫେର ବା ମନି ଲଣ୍ଡରିଂ ମାମଲା ରୁଜୁ କରିଛି। କେନ୍ଦ୍ରୀୟ ଏଜେନ୍ସି ମଧ୍ୟ ଉଦୟନିଧିଙ୍କୁ ପଚରାଉଚରା କରିପାରିବ।
ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି) ଏବଂ ଦିଲ୍ଲୀ ପୋଲିସ ପ୍ରାୟ ଦୁଇ ହଜାର କୋଟି ଟଙ୍କା ମୂଲ୍ୟର ଆନ୍ତର୍ଜାତୀୟ ଡ୍ରଗ୍ସ ର଼୍ୟାକେଟ ମାମଲାରେ ଜାଫର ସାଦିକଙ୍କୁ ଗିରଫ କରିଛି। ଜାଫର ଜଣେ ତାମିଲ ଫିଲ୍ମ ନିର୍ମାତା ଏବଂ ଅନେକ ଫିଲ୍ମ ନିର୍ମାଣ କରିଛନ୍ତି । ସୂଚନାନୁସାରେ, ଜାଫର ସାଦିକ ଏନସିବିକୁ ପଚରାଉଚରା ବେଳେ କହିଛନ୍ତି ଯେ ସେ ଡିଏମକେ ମନ୍ତ୍ରୀ ଉଦୟନିଧି ଷ୍ଟାଲିନଙ୍କୁ ୭ଲକ୍ଷ ଟଙ୍କା ଦେଇଛନ୍ତି। ଏନସିବି ପଚରାଉଚରା ବେଳେ ଜାଫର କହିଛନ୍ତି ଯେ ଗତ ବର୍ଷ ସେ ଉଦୟନିଧିଙ୍କୁ ବନ୍ୟା ପରିସ୍ଥିତିରେ ସହାୟତା ପାଇଁ ୫ଲକ୍ଷ ଏବଂ ପାର୍ଟି ପାଣ୍ଠି ପାଇଁ ୨ଲକ୍ଷ ଟଙ୍କା ଦେଇଥିଲେ।
ସୂଚନାନୁସାରେ, ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ମନ୍ତ୍ରୀ ପୁଅ ଉଦୟନିଧିଙ୍କୁ ଉଭୟ ଏନସିବି ଏବଂ ଇଡି ପଚରାଉଚରା ପାଇଁ ଡକାଯାଇପାରେ। ଡ୍ରଗ୍ସର ଚୋରା ଚାଲାଣରୁ ଜାଫର ସାଦିକଙ୍କୁ ଉଦୟାନିଧି ଷ୍ଟାଲିନଙ୍କୁ ଦିଆଯାଇଥିବା ଟଙ୍କା ମିଳିଛି କି ନାହିଁ ଏନସିବି ଅନୁସନ୍ଧାନ କରୁଛି। ଏଥି ସହିତ, ବର୍ତ୍ତମାନ ଏହି ପ୍ରସଙ୍ଗରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ର ପ୍ରବେଶ ସହିତ ଷ୍ଟାଲିନଙ୍କ ସମସ୍ୟା ବୃଦ୍ଧି ପାଇଛି। ସୂତ୍ରରୁ ପ୍ରକାଶ ଯେ ଇଡି ଖୁବ ଶୀଘ୍ର ଜାଫରଙ୍କୁ ମଧ୍ୟ ପଚରାଉଚରା କରିପାରେ।

The post ଅଡୁଆରେ ଉଦୟନିଧି, ଡ୍ରଗ୍ସ ସ୍ମଗଲିଂ ମାମଲାରେ ଇଡି ଦାଖଲ କଲା ମନି ଲଣ୍ଡରିଂ କେସ appeared first on Dharitri Odia News.