ଅଭାବନୀୟ ! ମଶା ଧୂପ ନେଲା ଯୁବକଙ୍କ ଜୀବନ

ଭୁବେନଶ୍ବର: ମଶାଙ୍କ ଦାଉରୁ ରକ୍ଷା ପାଇବା ପାଇଁ ଆମେ ସାଧାରଣତଃ ମଶା ଧୂପର ବ୍ୟବହାର କରିଥାଉ। ହେଲେ ଏହି ମଶା ଧୂପ ବ୍ୟବହାର କରିବା ଜଣେ ଯୁବକଙ୍କୁ ଭାରି ପଡ଼ିଛି। କାରଣ ମଶାଧୂପ ଧୂଆଁ ନେଇଛି ଜଣେ ଯୁବକଙ୍କ ଜୀବନ ।

ସୂଚନା ଅନୁଯାୟୀ, ଗତ ଗୁରୁବାର ରାତି ପ୍ରାୟ ୧୨ ଟାରେ ଅଠାନ୍ତର ଗ୍ରାମର ଅଜିତ୍ କୁମାର ଦାସ (ଗୁଗା) ନିଜ ଟାଟା ଏସ୍‌ ଗାଡିରେ ପ୍ରତିଦିନ ଭଳି ଭୁବନେଶ୍ଵର ୪ ନମ୍ବର ମାଛ ମାର୍କେଟରୁ ମାଛ ଆଣିବାକୁ ଆସିଥିଲେ। ହେଲେ ମାଛ ବାହାରିବା ପାଇଁ ଆହୁରି ସମୟ ଥିବାରୁ ସେ ନିଜ ଗାଡ଼ିରେ ଶୋଇପଡ଼ିଥିଲେ । ତେବେ ଗାଡ଼ିରେ ମଶା କାମୁଡ଼ିବାରୁ ମଶା ଧୂପର ବ୍ୟବହାର କରି ଶୋଇପଡ଼ିଥିଲେ। ଆଉ ଗାଡ଼ିର ଡୋର୍‌ ମଧ୍ୟ ବନ୍ଦ କରିଦେଇଥିଲେ। ଯାହା ତାଙ୍କ ପାଇଁ କାଳ ସାଜିଥିଲା। ପ୍ରକୃତରେ ଗାଡ଼ିରେ ଶ୍ବାସରୁଦ୍ଧ ହୋଇପଡ଼ିଥିଲେ ଅଜିତ୍‌।

ତେବେ ୨ ଘଣ୍ଟା ପରେ ତାଙ୍କ ସହଯୋଗୀ ତାଙ୍କୁ ଉଠାଇବା ଆସିବା ବେଳେ ସେ ଡୋର୍‌ ଖୋଲିନଥିଲେ। ତେଣୁ ଡୋର୍‌ ଭାଙ୍ଗି ତାଙ୍କୁ ଉଦ୍ଧାର କରାଯାଇ ତୁରନ୍ତ ତାଙ୍କୁ କ୍ୟାପିଟାଲ୍‌ ହସ୍ପିଟାଲରେ ଭର୍ତ୍ତି କରାଯାଇଥିଲା । ହେଲେ ସେଠାରେ ଡାକ୍ତର ଅଜିତଙ୍କୁ ମୃତ ଘୋଷଣା କରିଥିଲେ । ମଶା ଧୂପର ବିଷାକ୍ତ ଧୂଆଁ ଯୋଗୁ ତାଙ୍କର ମୃତ୍ୟୁ ହୋଇଥିବା ଡାକ୍ତର ଅନୁମାନ କରିଛନ୍ତି ।

ସେପଟେ ଅଜିତଙ୍କ ଅକାଳ ବିୟୋଗରେ ଅଠାନ୍ତର ଗ୍ରାମର ଶୋକର ଛାୟା ଖେଳିଯାଇଛି । ଅଜିତଙ୍କ ଘରେ ସ୍ତ୍ରୀ ଏବଂ ଏକ ୧୨ ବର୍ଷର ପୁତ୍ର ସନ୍ତାନ ଅଛନ୍ତି । ଗାଡ଼ି ଚଳାଇ ଗୁଜୁରାଣ ମେଣ୍ଟାଉଥିବା ଅଜିତଙ୍କ ମୃତ୍ୟୁ ପରେ ଅସହାୟ ହୋଇପଡ଼ିଛନ୍ତି ତାଙ୍କ ପରିବାର।