ଇତିହାସ ରଚିଲେ ଅର୍ଶଦୀପ ସିଂ, ରେକର୍ଡ ଭାଙ୍ଗି ପାଲଟିଲେ ନମ୍ବର-୧ ବୋଲର୍‌…

କୋଲକାତା,୨୨।୧: ଟି-୨୦ କ୍ରିକେଟରେ ଇତିହାସ ରଚିଲେ ଭାରତର ଯୁବ ଦ୍ରୁତ ବୋଲର ଅର୍ଶଦୀପ ସିଂ। କୋଲକାତାର ଇଡେନ ଗାର୍ଡେନ୍ସ ଷ୍ଟାଡିୟମରେ ଇଂଲଣ୍ଡ ବିପକ୍ଷରେ ଖେଳାଯାଉଥିବା ଟି-୨୦ ସିରିଜର ପ୍ରଥମ ମୁକାବିଲାରେ ସେ ଭାରତ ପାଇଁ ସର୍ବାଧିକ ଉଇକେଟ ନେବାର ରେକର୍ଡ ହାସଲ କରିଛନ୍ତି।

ଅର୍ଶଦୀପ  ନଭେମ୍ବର ୨୦୨୨ରେ ତାଙ୍କର ଅନ୍ତର୍ଜାତୀୟ କ୍ରିକେଟ ଡେବ୍ୟୁ କରିଥିଲେ। ମାତ୍ର ୨ ବର୍ଷ ମଧ୍ୟରେ, ସେ ଟି୨୦ କ୍ରିକେଟରେ ଭାରତ ପାଇଁ ସର୍ବାଧିକ ଉଇକେଟ ନେବାର ରେକର୍ଡ ହାସଲ କରିଛନ୍ତି। ଇଂଲଣ୍ଡ ବିପକ୍ଷ ଏହି ମ୍ୟାଚ୍‌ରେ ସେ ତାଙ୍କର ପ୍ରଥମ ଓଭରରେ ଫିଲ ସଲ୍ଟଙ୍କ ଉଇକେଟ ନେଇଥିଲେ। ଫିଲ ସଲ୍ଟ ଖାତା ନ ଖୋଲି ପାଭିଲିୟନ ଫେରିଥିଲେ। ଏହି ଉଇକେଟ ସହିତ, ସେ ସର୍ବାଧିକ ଉଇକେଟ ନେଇଥିବା ଖେଳାଳି ତାଲିକାରେ ୟୁଜବେନ୍ଦ୍ର ଚହଲଙ୍କ ସହ ସମକକ୍ଷ ହୋଇଥିଲେ। ଏହା ପରେ, ସେ ତାଙ୍କର ପରବର୍ତ୍ତୀ ଓଭରରେ ବେନ ଡକେଟ୍‌ଙ୍କୁ ଆଉଟ୍‌ କରି ଚହଲଙ୍କ ରେକର୍ଡ ଭାଙ୍ଗି ଦେଇଥିଲେ।

ଅର୍ଶଦୀପଙ୍କ ପୂର୍ବରୁ ୟୁଜବେନ୍ଦ୍ର ଚହଲ ୯୬ ଉଇକେଟ ସହିତ ଭାରତର ସବୁଠାରୁ ସଫଳ ଟି-୨୦ ବୋଲର ଥିଲେ। ଏହି ତାଲିକାରେ ଭୁବନେଶ୍ୱର କୁମାରଙ୍କ ନାମ ତୃତୀୟ ସ୍ଥାନରେ ରହିଛି। ଟି-୨୦ କ୍ରିକେଟରେ ତାଙ୍କ ନାମରେ ୯୦ଟି ଉଇକେଟ ଅଛି। ଏମାନଙ୍କ ବ୍ୟତୀତ ଜସପ୍ରିତ ବୁମ୍‌ରା ଏବଂ ହାର୍ଦ୍ଦିକ ପାଣ୍ଡ୍ୟା ୮୯-୮୯ ଉଇକେଟ ସହିତ ଚତୁର୍ଥ ସ୍ଥାନରେ ଅଛନ୍ତି।

ଏଯାବତ ଅର୍ଶଦୀପ ୬୧ ମ୍ୟାଚ ଖେଳି ୯୭ ଉଇକେଟ ନେଇଛନ୍ତି। ସେ ଏହି ଉଇକେଟ ଗୁଡ଼ିକ ୧୭.୮୦ ହାରରେ ଏବଂ ୯ ରୁ କମ ଇକୋନୋମିରେ ନେଇଛନ୍ତି। ଏହା ବ୍ୟତୀତ ସେ ଟିମ ଇଣ୍ଡିଆ ପାଇଁ ୮ଟି ODI ମ୍ୟାଚ ମଧ୍ୟ ଖେଳିଛନ୍ତି। ଯେଉଁଥିରେ ତାଙ୍କ ନାମରେ ୧୨ଟି ଉଇକେଟ ରହିଛି। ଚାମ୍ପିଅନ୍ସ ଟ୍ରଫି ପାଇଁ ଭାରତୀୟ ଦଳରେ ଅର୍ଶଦୀପ ସିଂହଙ୍କୁ ମଧ୍ୟ ସାମିଲ କରାଯାଇଥିଲା। ବିଶେଷ କଥା ହେଉଛି ଚୟନକର୍ତ୍ତାମାନେ ତାଙ୍କୁ ମହମ୍ମଦ ସିରାଜଙ୍କ ଉପରେ ସ୍ଥାନ ଦେଇଛନ୍ତି, ଯିଏ କିଛି ସମୟ ଧରି ଟିମ ଇଣ୍ଡିଆ ପାଇଁ ନିରନ୍ତର ଖେଳି ଆସୁଥିଲେ।

The post ଇତିହାସ ରଚିଲେ ଅର୍ଶଦୀପ ସିଂ, ରେକର୍ଡ ଭାଙ୍ଗି ପାଲଟିଲେ ନମ୍ବର-୧ ବୋଲର୍‌… appeared first on Dharitri Odia News.