ଇନଷ୍ଟାଗ୍ରାମରେ ବନ୍ଧୁତା କରିବା ଯୁବତୀଙ୍କୁ ପଡିଲା ମହଙ୍ଗା, ଠକି ନେଲେ ୧.୪୬ ଲକ୍ଷ ଟଙ୍କା

ନୂଆଦିଲ୍ଲୀ ୧୨।୦୯: ସୋସିଆଲ ମିଡିଆ ପ୍ଲାଟଫର୍ମରେ ବନ୍ଧୁତା କରିବା ପଡିଲା ମହଙ୍ଗା । ଗୁରୁଗ୍ରାମର ଜଣେ ମହିଳାଙ୍କ ସହ ବନ୍ଧୁତା କରିଥିବା ଜଣେ ବ୍ୟକ୍ତି ତାଙ୍କ ଠାରୁ ୧.୪୬ ଲକ୍ଷ ଟଙ୍କା ଠକିଥିବା ଅଭିଯୋଗ ହୋଇଛି। ଏନେଇ ଅଧିକାରୀମାନେ ବୁଧବାର ଏହି ସୂଚନା ଦେଇଛନ୍ତି। ଅଧିକାରୀ କହିଛନ୍ତି ଯେ ଏହା କଷ୍ଟମ୍ ଠକେଇର ଏକ ମାମଲା। ପୋଲିସ କହିଛି ଯେ ଠକମାନେ କଷ୍ଟମ ବିଭାଗର ଅଧିକାରୀ ଭାବରେ ପରିଚିତ ହୋଇ ବିଦେଶରୁ ଉପହାର ପାଇବା ପାଇଁ ମହିଳାଙ୍କ ଠାରୁ ଟଙ୍କା ମାଗିଥିଲେ।

ପୋଲିସ ନିକଟରେ ଦିଆଯାଇଥିବା ଅଭିଯୋଗ ଅନୁଯାୟୀ, ମହିଳା ଜଣକ ଇନଷ୍ଟାଗ୍ରାମରେ ଜଣେ ପୁରୁଷଙ୍କ ସହିତ ବନ୍ଧୁତା କରିଥିଲେ।  ଯିଏ କି ୟୁରୋପରେ ରୁହନ୍ତି ଏବଂ ହିନ୍ଦୀ ଶିଖିବାକୁ ଚାହୁଁଛନ୍ତି ବୋଲି କହିଥିଲେ। କିଛି ଦିନ ପରେ ବ୍ୟକ୍ତି ଜଣକ କହିଥିଲେ ଯେ ସେ ତାଙ୍କ ଦେଶରୁ କିଛି ଉପହାର ପଠାଇବାକୁ ଚାହୁଁଛନ୍ତି। ହେଲେ ମହିଳା ଜଣକ ତାଙ୍କୁ ମନା କରିଦେଇଥିଲେ, ତଥାପି ବ୍ୟକ୍ତି ତାଙ୍କ ପାଇଁ ଉପହାର ପଠାଉଥିଲେ। ଏହା ପରେ ମହିଳା ଜଙ୍କୁ ଏକ କଲ ଆସିଥିଲା । କିନ୍ତୁ ସେ ତାଙ୍କ ସହ କଥାବାର୍ତ୍ତା କରୁଥିବା ବ୍ୟକ୍ତିଙ୍କ ଭାଷା ବୁଝିପାରିଲେ ନାହିଁ ତା’ପରେ ମହିଳା ଜଣକ ମଧ୍ୟ ଏକ ମେସେଜ ପାଇଲେ।  ଯେଉଁଥିରେ ଲେଖାଥିଲା ଯେ ମୁମ୍ବାଇ ଇଣ୍ଟରନ୍ୟାସନାଲରେ ତାଙ୍କୁ “କାଲାଇସ୍ ଏରିକ” ର କଲ୍ ଆସିଥିଲା।

 ମହିଳା ଜଣକ ପୋଲିସ ନିକଟରେ ଅଭିଯୋଗ କରିଥିଲେ

ଅଭିଯୋଗକାରୀ କହିଛନ୍ତି, "ଏହା ମଧ୍ୟ ଲେଖାଯାଇଥିଲା ଯେ ପ୍ୟାକେଜ୍ ଡେଲିଭରି ପାଇଁ ପ୍ରସ୍ତୁତ ଅଛି। ଏଥିପାଇଁ ସେମାନଙ୍କୁ କଷ୍ଟମ୍ ବିଭାଗକୁ କ୍ଲିୟରାନ୍ସ ଫି ଭାବରେ ୫୦,୦୦୦ ଟଙ୍କା ଦେବାକୁ ପଡ଼ିବ। ଯେତେବେଳେ ମହିଳା ମନା କରିଦେଲେ ଏବଂ ସେମାନଙ୍କୁ ପ୍ୟାକେଜ୍ ପଠାଇବାକୁ କହିଥିଲେ, ସେମାନେ କହିଥିଲେ ଯେ ପ୍ୟାକେଜ୍ ଫେରସ୍ତ ହୋଇପାରିବ ନାହିଁ। ଏହା ପରେ ମହିଳା ୫୦ ହଜାର ଟଙ୍କା କ୍ଲିୟରାନ୍ସ ଫି ଜମା କରିଥିଲେ କିନ୍ତୁ ପରେ ଫ୍ରଡମାନେ ଆଉ ୯୬ ହଜାର ଟଙ୍କା ମାଗିଥିଲେ ଏବଂ ଏହା ବୀମା ଏବଂ ଆୟକର ପରିମାଣ ବୋଲି କହିଥିଲେ।

୯୬ ହଜାର ଟଙ୍କା ଜମା କରିବା ପରେ ସେ ୧.୭୦ ଲକ୍ଷ ଟଙ୍କା ମାଗିଥିଲେ ଏବଂ ପରେ ମହିଳା ଜଣକ ଶେଷରେ ପୋଲିସ ନିକଟରେ ଅଭିଯୋଗ କରିବାକୁ ନିଷ୍ପତ୍ତି ନେଇଥିଲେ। ଅଭିଯୋଗକାରୀଙ୍କ ଅଭିଯୋଗକୁ ଭିତ୍ତି କରି ଭାରତୀୟ ନ୍ୟାୟ ସଂହିତା ବିଭାଗ ଅଧୀନରେ ଏକ ଏଫଆଇଆର ରେଜିଷ୍ଟ୍ରେସନ ହୋଇଛି। ସାଇବର ପୋଲିସର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ସେମାନେ ଏହି ଘଟଣାର ତଦନ୍ତ କରୁଛନ୍ତି।