ଇସ୍କନ ପରେ ଭାରତୀୟ ଟିଭି ଚ୍ୟାନେଲ୍ ବ୍ୟାନ୍ ପାଇଁ ବାଂଲାଦେଶରେ ଦାବି; ହାଇକୋର୍ଟରେ ମାମଲା

ନୂଆଦିଲ୍ଲୀ: ବାଂଲାଦେଶରେ ହିନ୍ଦୁଙ୍କ ଉପରେ ଜାରି ହିଂସାକୁ ନେଇ ଭାରତରେ ଆକ୍ରୋଶ ବଢିବାରେ ଲାଗିଛି । ଇସ୍କନକୁ ବ୍ୟାନ୍ କରିବା ଦାବି ପରେ ଏବେ ଭାରତୀୟ ଟିଭି ଚ୍ୟାନେଲ୍ ବ୍ୟାନ କରିବା ପାଇଁ ବାଂଲାଦେଶରେ ଦାବି କରାଯାଇଛି । ରିପୋର୍ଟ ଅନୁସାରେ ଏଖଲାସ ଉଦ୍ଦିନ ଭୁଇଁୟା ନାମକ ଜଣେ ଓକିଲ ହାଇକୋର୍ଟରେ ଏକ ଆବେଦନ ଦାଖଲ କରିଛନ୍ତି । ଯେଉଁଥିରେ ଭାରତୀୟ ମିଡିଆର ବଢୁଥିବା ପ୍ରଭାବ ଯୋଗୁଁ ବାଂଲାଦେଶୀ ସଂସ୍କୃତି ଏବଂ ସମାଜ ଉପରେ କୁପ୍ରଭାବ ପଢୁଛି । ଆବେଦନରେ ଭାରତୀୟ ଟିଭି ଚ୍ୟାନେଲ୍ ପ୍ରସାରଣ ଉପରେ ରୋକ ଲଗାଇବା ପାଇଁ ଟେଲିଭିଜନ ନେଟୱାର୍କ ଅପରେସନ ଆକ୍ଟ ୨୦୦୬ ଅଧିନରେ ଅପିଲ୍ କରାଯାଇଛି ।

ଆବେଦନରେ ଷ୍ଟାର ଜଲସା, ଜୀ ବାଂଲା, ରିପବ୍ଲିକ୍ ବାଂଲା ପରି ସବୁ ଭାରତୀୟ ଟିଭି ଚ୍ୟାନେଲକୁ ବ୍ୟାନ୍ କରିବା ପାଇଁ ଦାବି କରାଯାଇଛି । ଏଖଲାସ ଭୁଇଁୟାଙ୍କ ଯାଚିକାରେ ସୂଚନା ମନ୍ତ୍ରଣାଳୟ ଏବଂ ଗୃହ ମନ୍ତ୍ରଣାଳୟ ସଚିବ, ବାଂଲାଦେଶ ଦୂରସଂଚାର ଆୟୋଗ ଏବଂ ଅନ୍ୟଙ୍କୁ ଜବାବତଲବ କରାଯାଇଛି । ଭାରତୀୟ ଚ୍ୟାନେଲଗୁଡ଼ିକରେ ଉତ୍ତେଜନାପୂର୍ଣ୍ଣ ଖବର ପ୍ରସାରଣ କରାଯାଉଛି । ବାଂଲାଦେଶୀ ସଂସ୍କୃତିକୁ ବିରୋଧ କରୁଥିବା ସାମଗ୍ରୀର ଅନିୟନ୍ତ୍ରିତ ପ୍ରସାରଣରେ ଯୁବପିଢି ବର୍ବାଦ ହେଉଛନ୍ତି । ଜଷ୍ଟିସ୍ ଫତିମା ନଜୀର ଏବଂ ଜଷ୍ଟିସ୍ ସିକନ୍ଦର ମହମୂଦୁର ରଜୀଙ୍କ ଖଣ୍ଡପୀଠ ଯାଚିକା ଉପରେ ଶୁଣାଣି କରିପାରନ୍ତି ।

ଉଲ୍ଲେଖଯୋଗ୍ୟ ଅଗଷ୍ଟ ୫ରେ ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କୁ ପଦରୁ ହଟାଯିବା ପରଠୁ ଭାରତ-ବାଂଲାଦେଶ ମଧ୍ୟରେ ସମ୍ପର୍କ ଲଗାତାର ଖରାପ ହେବାରେ ଲାଗିଛି । ବାଂଲାଦେଶରେ ହିନ୍ଦୁ ଏବଂ ସଂଖ୍ୟାଲଘୁଙ୍କ ଉପରେ ଅତ୍ୟାଚାର ଜାରି ରହିଛି । ଅକ୍ଟୋବର ୨୫ରେ ଇସ୍କନର ପୂର୍ବତନ ପୂଜାରୀ ଚିନ୍ମୟ କୃଷ୍ଣ ଦାସଙ୍କୁ ଦେଶଦ୍ରୋହ ମାମଲାରେ ଗିରଫ କରାଯାଇଥିଲା । ଡିସେମ୍ୱର ୩ ମଙ୍ଗଳବାର ଚିନ୍ମୟ କୃଷ୍ଣ ହାସଙ୍କ ମାମଲା ଲଢୁଥିବା ଆଇନଜୀବୀଙ୍କ ଉପରେ ମରଣାନ୍ତକ ଆକ୍ରମଣ ହୋଇଛି । ବର୍ତ୍ତମାନ ସେ ହସ୍ପିଟାଲରେ ଭର୍ତ୍ତି ଥିବା ବେଳେ ଭୟରେ ଅନ୍ୟ କୌଣସି ଓକିଲ ଚିନ୍ମୟ କୃଷ୍ଣ ଦାସଙ୍କ ମାମଲା ଲଢିବାକୁ ରାଜି ହେଉନାହାନ୍ତି ।