କେଜ୍ରିଓ୍ବାଲଙ୍କ ଗିରଫ ପ୍ରତିବାଦରେ ‘ଇଣ୍ଡିଆ’ର ମହାରାଲି, ରାମଲୀଳା ମୈଦାନରେ ଗର୍ଜିବେ ବିରୋଧୀ

ନୂଆଦିଲ୍ଲୀ: ଦିଲ୍ଲୀ ଅବକାରୀ ନୀତି ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ମୁଖ୍ୟମନ୍ତ୍ରୀ କେଜ୍ରିଓ୍ବାଲଙ୍କୁ ଗିରଫ କରିଛି । ଏହାର ପ୍ରତିବାଦ ‘ଇଣ୍ଡି’ ମେଣ୍ଟର ରବିବାର ମହାରାଲି । ରାମଲୀଲା ମୈଦାନରେ ବଡ଼ ଧରଣର ବିକ୍ଷୋଭ କରାଯିବ । ଏଥିରେ ଇଣ୍ଡିଆ ବ୍ଲକର ସମସ୍ତ ବରିଷ୍ଠ ନେତା ସାମିଲ୍ ହେବେ । ଇଡିକୁ ଅସ୍ତ୍ର କରିଥିବା ବିଜେପି ବିରୋଧରେ ଗର୍ଜନ କରିବେ ବିରୋଧୀ ନେତା । ଏହି ମହାରାଲି ରବିବାର ସକାଳ ସାଢ଼େ ୯ଟାରୁ ଅପରାହ୍ଣ ୨ଟା ପର୍ଯ୍ୟନ୍ତ ଚାଲିବ ମହାରାଲି । ଏନେଇ ନିର୍ବାଚନ କମିଶନ ଓ ଦିଲ୍ଲୀ ପୋଲିସ ପକ୍ଷରୁ ଅନୁମତି ମିଳିଛି । 

ମହାରାଲିରେ ‘ଇଣ୍ଡି’ ମେଣ୍ଟର ପ୍ରାୟ ସମସ୍ତ ରାଜନୈତିକ ଦଳ ନେତା ସାମିଲ ହେବେ । କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ସହ ରାହୁଲ ଗାନ୍ଧୀ, ଶରଦ ପାୱାର, ଉଦ୍ଧବ ଠାକରେ, ଅଖିଳେଶ ଯାଦବ, ଫାରୁକ ଅବଦୁଲ୍ଲା, ଚମ୍ପାଇ ସୋରେନ ପ୍ରମୁଖ ସାମିଲ ହେବେ । ରାଲିକୁ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ପତ୍ନୀ କଳ୍ପନା ସୋରେନ ଓ ଅରବିନ୍ଦ କେଜ୍ରିୱାଲଙ୍କ ସ୍ତ୍ରୀ ସୁନିତା କେଜ୍ରିୱାଲ ସମ୍ବୋଧନ କରିବାର ସମ୍ଭାବନା ରହିଛି ।

ମହାରାଲି ପାଇଁ ରାମଲୀଲା ମୈଦାନ ନିରୀକ୍ଷଣ ଦାୟିତ୍ବରେ ଥିବା ଆପ୍ ବରିଷ୍ଠ ନେତା ଗୋପାଲ ରାୟଙ୍କ କହିବା ଅନୁଯାୟୀ, ଏହି ପ୍ରତିବାଦ ରାଲିରେ କଂଗ୍ରେସ ପୂର୍ବତନ ଅଧ୍ୟକ୍ଷ ସୋନିଆ ଗନ୍ଧି ସାମିଲ୍ ହେବେ । ସେପଟେ ରାଲି ପୂର୍ବରୁ କଂଗ୍ରେସ କହିଛି, ଭାରତର ରାଷ୍ଟ୍ରୀୟ ବିକାଶ ସଂଗଠନ ବା ‘ଇଣ୍ଡି’ ମେଣ୍ଟର ରାଲି ଲୋକ କଲ୍ୟାଣ ମାର୍ଗ ପର୍ଯ୍ୟନ୍ତ ଯିବ ଏବଂ ସେଠାରେ ବିଜେପି ସରକାରର ସମୟ ଶେଷ ଆସିଗଲାଣି ବୋଲି କଡ଼ା ସନ୍ଦେଶ ଦିଆଯିବ । ଦିଲ୍ଲୀ ମଦ ନୀତି ମାମଲାରେ ଇଡି ଆମ୍ ଆଦମୀ ପାର୍ଟିର ଜଣକ ପରେ ଜଣେ ନେତାଙ୍କୁ ଗିରଫ କରିଛି । ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଗିରଫ ପରେ ଚିହିଁଙ୍କି ଉଠିଛନ୍ତି ବିରୋଧୀ । ଏହାର ପ୍ରତିବାଦରେ ଇଣ୍ଡିଆ ବ୍ଲକ୍ ମହାରାଲି ଡାକରା ଦେଇଛି ।