କେଜ୍‌ରିଓ୍ବାଲଙ୍କୁ ତାଚ୍ଛଲ୍ୟ, ହାରିବାକୁ ନେଇ ଶୁଭେଚ୍ଛା ଜଣାଇଲେ…

ନୂଆଦିଲ୍ଲୀ,୧୦।୨: ତିହାର ଜେଲରେ ବନ୍ଦୀ ଥିବା ମହାଠକ ସୁକେଶ ଚନ୍ଦ୍ରଶେଖର ପୁଣି ଥରେ ଚିଠି ଲେଖିବା ଆରମ୍ଭ କରିଛନ୍ତି। ଦିଲ୍ଲୀ ନିର୍ବାଚନର ଫଳାଫଳ ଘୋଷଣା ହେବା ପରେ ସେ ଆମ ଆଦମୀ ପାର୍ଟି (ଆପ୍‌) ସଂଯୋଜକ ତଥା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍‌ରିୱାଲଙ୍କୁ ଆଉ ଏକ ଚିଠି ଲେଖିଛନ୍ତି। ଯେଉଁଥିରେ ସେ କେଜ୍‌ରିିୱାଲଙ୍କୁ ତାଚ୍ଛଲ୍ୟ କରିଛନ୍ତି ଏବଂ ଦିଲ୍ଲୀରେ ଆପ୍‌ର ପରାଜୟ ପାଇଁ ଅଭିନନ୍ଦନ ଜଣାଇଛନ୍ତି। ତୁମ ସହିତ ତୁମର ସମସ୍ତ ଅହଂକାର ମଧ୍ୟ ଶୌଚାଳୟରେ ପ୍ରବାହିତ ହୋଇଯାଇଛି ବୋଲି ସୁକେଶ ବ୍ୟଙ୍ଗାତ୍ମକ ଭାବରେ ଲେଖିଛନ୍ତି।

ସୁକେଶ ଲେଖିଛନ୍ତି, ସର୍ବପ୍ରଥମେ ମୁଁ ମନୀଷ ସିସୋଡିଆ ଏବଂ ସତ୍ୟେନ୍ଦ୍ର ଜୈନଙ୍କୁ ଆସନ ହାରିବା ପାଇଁ ଅଭିନନ୍ଦନ ଜଣାଉଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେ ତୁମର ଦୁର୍ନୀତିଗ୍ରସ୍ତ ଦଳ AAP କ୍ଷମତାରୁ ବାଦ୍‌ ପଡ଼ିଛି। ମୁଁ ପୂର୍ବରୁ ଚେତାବନୀ ଦେଇସାରିଛି ଯେ କେଜ୍‌ରିୱାଲ ତାଙ୍କ ଆସନ ହରାଇବେ ଏବଂ ଦଳ କ୍ଷମତାରୁ ବାହାର ହୋଇଯିବ। ଯଦି ମୋର ପୂର୍ବ ଚିଠିଗୁଡ଼ିକ ସୁରକ୍ଷିତ ଅଛି, ତେବେ ଦୟାକରି ସେଗୁଡ଼ିକୁ ପଢ଼। ମୁଁ ଆପଣଙ୍କୁ ୩, ୬ ଏବଂ ୮ ମାସ ପୂର୍ବରୁ ଚ୍ୟାଲେଞ୍ଜ କରିଥିଲି ଯେ ଆପଣ ନିର୍ବାଚନରେ ହାରିଯିବେ। ଆଜି ତାହା ହିଁ ହୋଇଛି।

ସୁକେଶ ଚନ୍ଦ୍ରଶେଖର ବ୍ୟଙ୍ଗାତ୍ମକ ଭାବରେ ଲେଖିଛନ୍ତି ଯେ ତୁମର ସମସ୍ତ ଅହଂକାର ତୁମ ସହିତ ଶୌଚାଳୟରେ ବୋହିଯାଇଛି। ଦିଲ୍ଲୀର ଲୋକମାନେ ତୁମକୁ ଏବଂ ତୁମର ବିଶ୍ୱର ସବୁଠାରୁ ଦୁର୍ନୀତିଗ୍ରସ୍ତ ଦଳକୁ ପ୍ରକୃତରେ ଗୋଇଠା ମାରି ଦେଇଛନ୍ତି। ଏଣୁ କେଜରିୱାଲଙ୍କୁ ରାଜନୀତିରୁ ସନ୍ୟାସ ନେବା ଉଚିତ। ପରବର୍ତ୍ତୀ ସମୟରେ ପଞ୍ଜାବରୁ ମଧ୍ୟ ଏପିପି ସଫା ହୋଇଯିବ ବୋଲି ସେ କହିଛନ୍ତି।

ସୂଚନାଯୋଗ୍ୟ, ସୁକେଶ ଚନ୍ଦ୍ରଶେଖର ମନି ଲଣ୍ଡରିଂ ଏବଂ ଠକେଇର ଅନେକ ମାମଲାରେ ଦୋଷୀ ସାବ୍ୟସ୍ତ ହୋଇ ତିହାର ଜେଲରେ ବନ୍ଦୀ ଅଛନ୍ତି। ଏହା ପୂର୍ବରୁ ମଧ୍ୟ ସେ କେଜ୍‌ରିୱାଲ ଏବଂ ଆପ୍‌ ନେତାଙ୍କ ବିରୋଧରେ ଅନେକ ଚିଠି ଲେଖିଛନ୍ତି।
ମହାଠକ ସୁକେଶ ଚନ୍ଦ୍ରଶେଖର ମଧ୍ୟ ଫେବୃଆରୀ ୨୦୨୪ ମାସରେ ଅରବିନ୍ଦ କେଜ୍‌ରିୱାଲଙ୍କୁ ଏକ ଚିଠି ଲେଖିଥିଲେ। ଏହି ଚିଠିରେ ସେ ମୁଖ୍ୟମନ୍ତ୍ରୀ କେଜ୍‌ରିୱାଲଙ୍କୁ ତାଙ୍କ ପରିବାରକୁ ଧମକ ଦେଉଥିବା ଅଭିଯୋଗ କରିଥିଲେ। ସେହି ସମୟରେ, ସୁକେଶ ଅଭିଯୋଗ କରିଥିଲେ ଯେ ଗତ କିଛି ଦିନ ଧରି ଏକ ମୋବାଇଲ ନମ୍ବରରୁ ଲଗାତାର ଫୋନ କଲ ମାଧ୍ୟମରେ ତାଙ୍କ ପରିବାରକୁ ଧମକ ଦିଆଯାଉଥିଲା। ଯେଉଁଥିରେ ସେ କେଜ୍‌ରିୱାଲଙ୍କୁ ଧମକ ଦେଇଥିଲେ ଯେ ସେ ଖୁବ ଶୀଘ୍ର ତାଙ୍କୁ ସିବିଆଇ ସାମ୍ନାରେ ପର୍ଦ୍ଦାଫାଶ କରିବେ।

The post କେଜ୍‌ରିଓ୍ବାଲଙ୍କୁ ତାଚ୍ଛଲ୍ୟ, ହାରିବାକୁ ନେଇ ଶୁଭେଚ୍ଛା ଜଣାଇଲେ… appeared first on Dharitri Odia News.