ତିହାର ଜେଲରେ ପହଞ୍ଚିଲେ କେଜ୍ରିଓ୍ଵାଲ, ଯିବା ପୂର୍ବରୁ କହିଲେ… ଆପଣ ଖୁସିରେ ରହିଲେ ମୁଁ ଖୁସିରେ ରହିବି

ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପର ସଂଯୋଜକ ଅରବିନ୍ଦ କେଜ୍ରିଓ୍ଵାଲ ତିହାର ଜେଲରେ ସରେଣ୍ଡର କରିଛନ୍ତି । ସୁପ୍ରିମ କୋର୍ଟ ତାଙ୍କୁ ଜୁନ୍‌ ୨ ତାରିଖ ଯାଏଁ ଅନ୍ତରୀଣ ଜାମିନ ଦେଇଥିଲେ । ତେବେ ସରେଣ୍ଡର କରିବା ପୂର୍ବରୁ ମୁଖ୍ୟମନ୍ତ୍ରୀ କେଜ୍ରିଓ୍ଵାଲ ରାଜଘାଟ ଏବଂ କନ୍ନୋଟ ପ୍ଲେସ ସ୍ଥିତ ହନୁମାନ ମନ୍ଦିରକୁ ଯାଇଥିଲେ ।

କେଜ୍ରିଓ୍ଵାଲ ତିହାର ଜେଲରେ ନଂ ୧ ପହଞ୍ଚିସାରିଲେଣି । ତିହାର ଜେଲ ଯିବା ପୂର୍ବରୁ କେଜ୍ରିଓ୍ଵାଲଙ୍କ ମେଡିକାଲ ଚେକ୍‌ ଅପ୍‌ କରାଯାଇଥିଲା । ମେଡିକାଲ ଚେକଅପରେ ସୁଗାଲ ଲେବଲ, ବିପି ଏବଂ ଓଜନ ମପାଯାଇଥିଲା । ଘରୁ ବାହାରିବା ବେଳେ ବାପା ମା’ଙ୍କ ଆର୍ଶୀବାଦ ନେଇଥିଲେ କେଜ୍ରିଓ୍ଵାଲ ।

ଏହାପୂର୍ବରୁ କେଜ୍ରିଓ୍ଵାଲ X ରେ ପୋଷ୍ଟ କରିଥିଲେ କି, ମାନନୀୟ ସୁପ୍ରିମକୋର୍ଟଙ୍କ ଆଦେଶରେ ୨୧ ଦିନ ପାଇଁ ନିର୍ବାଚନ ପ୍ରଚାର କରିବାକୁ ଆସିଥିଲି । ଏଥିପାଇଁ ମୁଁ ସୁପ୍ରିମକୋର୍ଟଙ୍କୁ କୃତଜ୍ଞତା ଜଣାଉଛି । ଆଜି ତିହାର ଜେଲ ଯାଇ ସରେଣ୍ଡର କରିବି । ଅପରାହ୍ନ ୩ଟାରେ ପ୍ରଥମେ ରାଜଘାଟ ଯାଇ ମହାତ୍ମା ଗାନ୍ଧିଙ୍କୁ ଶ୍ରଦ୍ଧାଞ୍ଜଳି ଦେବି । ଏହାପରେ ହନୁମାନଙ୍କ ଆର୍ଶୀବାଦ ନେଇ ପାର୍ଟି ଅଫିସ ଯିବି । ସମସ୍ତ କାର୍ଯ୍ୟକର୍ତ୍ତା ଏବଂ ପାର୍ଟି ନେତାଙ୍କ ସହିତ ଦେଖା ହେବା ପରେ ତିହାର ଚାଲିଯିବି । ଆପଣ ନିଜର ଧ୍ୟାନ ରଖିବେ । ଜେଲରେ ତୁମମାନଙ୍କୁ ନେଇ ମୁଁ ଚିନ୍ତାରେ ରହିବି । ତୁମେମାନେ ଖୁସିରେ ରହିଲେ ଆପଣଙ୍କ କେଜ୍ରିଓ୍ଵାଲ ଖୁସି ରହିବ.. ଜୟ ହିନ୍ଦ୍‌ ।

କୋର୍ଟ ଗତ ମେ’ ୧୦ରେ ଅରବିନ୍ଦ କେଜ୍ରିଓ୍ଵାଲଙ୍କୁ ନିର୍ବାଚନ ପ୍ରଚାର ପାଇଁ ୨୧ ଦିନର ମଧ୍ୟବର୍ତ୍ତୀକାଳୀନ ଜାମିନରେ ମୁକ୍ତ କରିଥିଲେ । ତେବେ ଏହାପୂର୍ବରୁ କେଜ୍ରିୱାଲ ତାଙ୍କ ସ୍ୱାସ୍ଥ୍ୟ ଖରାପ ଏବଂ ମେଡିକାଲ ଟେଷ୍ଟକୁ ଦର୍ଶାଇ ମଧ୍ୟବର୍ତ୍ତୀକାଳୀନ ଜାମିନକୁ ଆହୁରି ୭ ଦିନ ବଢ଼ାଇବାକୁ ଅନୁରୋଧ କରିଥିଲେ । ଏହି ଆବେଦନ ଉପରେ କୋର୍ଟରେ ଶୁଣାଣି ହୋଇଥିଲା । କେଜ୍ରିୱାଲଙ୍କ ମଧ୍ୟବର୍ତ୍ତୀକାଳୀନ ଜାମିନ ବଢ଼ାଇବାକୁ ଇଡି ବିରୋଧ କରିଥିଲା ।
ସୂଚନାଯୋଗ୍ୟ, ଦିଲ୍ଲୀ ମଦ ନୀତି ଦୁର୍ନୀତି ସହ ଜଡିତ ଅର୍ଥ ହେରଫେର ମାମଲାରେ ଗିରଫ ହୋଇଛନ୍ତି ଅରବିନ୍ଦ କେଜ୍ରିୱାଲ । ମାର୍ଚ୍ଚ ୨୧ରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ତାଙ୍କୁ ଗିରଫ କରିଥିଲା । ଏହାପରେ ସେ ତିହାର ଜେଲରେ ଥିଲେ । ଲୋକସଭା ନିର୍ବାଚନ ଚାଲିଥିବାରୁ କେଜ୍ରିୱାଲ ତାଙ୍କ ଅନ୍ତରୀଣ ଜାମିନ ପାଇଁ ସୁପ୍ରିମକୋର୍ଟରେ ଆବେଦନ କରିଥିଲେ ଏବଂ ଅଦାଲତ ତାଙ୍କୁ ମେ’ ୧୦ରୁ ଜୁନ ୨ ପର୍ଯ୍ୟନ୍ତ ଜାମିନ ଦେଇଥିଲେ ।

The post ତିହାର ଜେଲରେ ପହଞ୍ଚିଲେ କେଜ୍ରିଓ୍ଵାଲ, ଯିବା ପୂର୍ବରୁ କହିଲେ… ଆପଣ ଖୁସିରେ ରହିଲେ ମୁଁ ଖୁସିରେ ରହିବି appeared first on KNews Odisha.