ଦୀପାବଳି ଉପହାରରେ କାର ଦେଲା ଏହି କମ୍ପାନି, କର୍ମଚାରୀଙ୍କ ମଧ୍ୟରେ ଖେଳିଗଲା ଖୁସିର ଲହର

ନୂଆଦିଲ୍ଲୀ: ହରିୟାଣାର ପଞ୍ଚକୂଲାରେ ଏକ ଫାର୍ମା କମ୍ପାନି ଦୀପାବଳି ପାଇଁ ନିଜ କର୍ମଚାରୀଙ୍କୁ ଲଗଜରୀ କାର ଉପହାର ଦେଇଛି । ଏହାପରେ କର୍ମଚାରୀଙ୍କ ମଧ୍ୟରେ ଖୁସିର ଲହର ଖେଳି ଯାଇଛି । ଲାଇଭ୍ ହିନ୍ଦୁସ୍ତାନର ରିପୋର୍ଟ ଅନୁସାରେ କମ୍ପାନି ମାଲିକ କହିଛନ୍ତି ଯେ ଭଲ ପ୍ରଦର୍ଶନ କରିଥିବା ୧୫ କର୍ମଚାରୀଙ୍କୁ ଦୀପାବଳି ଉପହାର ବାବଦକୁ ଟାଟା ପଞ୍ଚ ଏବଂ ଗ୍ରାଣ୍ଡ ଭିଟାରା ପରି କାର ଦେଇଛନ୍ତି । ଗତ ବର୍ଷ ବି ଭଲ ପ୍ରଦର୍ଶନ କରିଥିବା ୧୨ କର୍ମଚାରୀଙ୍କୁ ଦୀପାବଳିରେ କାର ଉପହାର ଦେଇଥିଲେ ।

ପଞ୍ଚକୂଲା ସ୍ଥିତ ମିଟ୍ସ ହେଲ୍ଥକେୟାର ପ୍ରାଇଭେଟ୍ ଲିମିଟେଡ୍ ଔଷଧ କମ୍ପାନି ମାଲିକ ଏମକେ ଭାଟିଆ କହିଛନ୍ତି ଯେ ୧୫ ଜଣ କର୍ମଚାରୀଙ୍କୁ ଦୀପାବଳି ଗିଫ୍ଟରେ କାର୍ ଦେଇଛନ୍ତି । ଭାଟିଆ କହିଛନ୍ତି ଯେ ବର୍ଷ ତମାମ କଠିନ ପରିଶ୍ରମ କରିଥିବା ୧୫ ଜଣ କର୍ମଚାରୀଙ୍କୁ ଚୟନ କରିଥିଲେ । ଏହାପରେ ସେମାନଙ୍କୁ ଗାଡ଼ି ଦିଆଯାଇଛି । ୧୫ କର୍ମଚାରୀଙ୍କ ମଧ୍ୟରୁ ୧୩ ଜଣଙ୍କୁ ଟାଟା ପଞ୍ଚ କାର ଏବଂ ଦୁଇ ବରିଷ୍ଠ କର୍ମଚାରୀଙ୍କୁ ଗ୍ରାଣ୍ଡ ଭିଟାରା ଦିଆଯାଇଛି ।

ଭାଟିଆ କହିଛନ୍ତି ଯେ ସେ ନିଜ କର୍ମଚାରୀଙ୍କୁ ନିଜର ସୁପରଷ୍ଟାର ବୋଲି ଭାବନ୍ତି । ମିଟ୍ସ ହେଲ୍ଥକେୟାରର ସଫଳତା ପାଇଁ କର୍ମଚାରୀଙ୍କ ସମର୍ପଣ ଏବଂ ଯୋଗଦାନ ଗୁରୁତ୍ୱପୂର୍ଣ୍ଣ । ଦିଲ୍ଲୀରେ ଏକ ଛୋଟ କାର୍ଯ୍ୟାଳୟ ଅଛି ଏବଂ ୨୦୧୫ରେ ଚଣ୍ଡିଗଡ଼ରେ ଛୋଟ ଅଫିସ୍ କିଣିଛି । ନିଜ କର୍ମଚାରୀଙ୍କ ପରିଶ୍ରମ ବଳରେ ଆଜି କମ୍ପାନି ଏହି ସ୍ଥାନରେ ପହଞ୍ଚିଛି ବୋଲି ସେ କହିଛନ୍ତି ।