ନିର୍ଘାତ ତାତିରେ ଛଟପଟ, ଆହୁରି ଦୁଇଦିନ ଆକାଶରୁ ବର୍ଷିବ ନିଆଁ ଝୁଲ
ଭୁବନେଶ୍ୱର,୦୫/୦୪: ନିର୍ଘାତ ଖରା । ଆକାଶରୁ ବର୍ଷୁଛି ନିଆଁ ଝୁଲ । ଆହୁରି ଦୁଇଦିନ ପୋଡ଼ିବ, ଜାଳିବ ଏ ନିର୍ଦ୍ଦୟୀ ତାତି ଲହରି । ପାରଦ ୪୩ ଡିଗ୍ରୀ ଛୁଇଁଯିବ । ଉପକୂଳ ବି ୪୦ ଡିଗ୍ରୀରେ ସିଝିବ । ଚଳିତ ବର୍ଷ ପ୍ରଥମ ଥର ପାଇଁ ରାଜ୍ୟରେ ତାପମାତ୍ରା ୪୨ ଡିଗ୍ରୀ ସେଲସିୟସ୍ ଛୁଇଁଛି । ୧୧ ସହରରେ ପାରଦ ୪୦ ଟପିଛି । ଆଉ ୧୦ ସହରରେ ତାପମାତ୍ରା ୩୮ରୁ ୪୦ ଡିଗ୍ରୀ ଭିତରେ ଥିଲା ଗୁରୁବାର । ଗରମକୁ ଭୀଷଣ ଗୁଳୁଗୁଳି ଜାରି ରହିଛି । ଚିନ୍ତାର ବିଷୟ ହେଲା, ଏ ସାଂଘାତିକ ତାତି ଲହରି ଭିତରେ ବାଜି ଲାଗିଛି କୋମଳମତି ସ୍କୁଲ ପିଲା ଓ ଶ୍ରମିକଙ୍କ ଜୀବନ । ଧୁ ଧୁ ଖରାରେ ଯେତେବେଳେ ତାପମାତ୍ରା ୩୫-୩୭ ଡିଗ୍ରୀ ରହୁଛି, ସେତିକିବେଳେ ସ୍କୁଲରୁ ଘରକୁ ଫେରୁଛନ୍ତି ପିଲାମାନେ । କିଏ ଅଭିଭାବକଙ୍କ ସହ ଗାଡ଼ିରେ ଆସୁଛି, ଆଉ କିଏ ଚାଲିଚାଲି ଓ ପୁଣି କିଏ ସାଇକେଲ ଚଲାଇ । ଭୀଷଣ ଖରାକୁ ଭୟାନକ ଗୁଳୁଗୁଳି ମୁଣ୍ଡ ଝାଇଁଝାଇଁ ହୋଇ ପଡ଼ୁଛି । ତଥାପି ଗଣଶିକ୍ଷା ବିଭାଗ ବେପରୁଆ ହୋଇ ବସିଛି । ସେହିପରି ନିର୍ଘାତ୍ ଖରାରେ ରାସ୍ତାଘାଟ ଓ ବିଭିନ୍ନ କୋଠାବାଡ଼ିରେ ଶ୍ରମିକ ଜାରି ରଖିଛନ୍ତି ନିର୍ମାଣ କାର୍ଯ୍ୟ । ଶ୍ରମ ବିଭାଗ ଚୁପ୍ । କୁଆଡ଼େ ଗଲା ସ୍ୱତନ୍ତ୍ର ରିଲିଫ କମିଶନରଙ୍କ କଟକଣା ଓ ଗାଇଡ୍ଲାଇନ୍ । ଦିନ ୧୧ଟାରୁ ୩ଟା ପର୍ଯ୍ୟନ୍ତ କାମ ବନ୍ଦ ରଖିବା କଟକଣା କ’ଣ ନିର୍ବାଚନୀ ବର୍ଷ ପାଇଁ ଛାଡ଼ କି? ଖରାରେ ଶ୍ରମିକଙ୍କ ଜୀବନକୁ ବାଜି ଲଗାଇବା ପାଇଁ ଅନୁ
ଭୁବନେଶ୍ୱର,୦୫/୦୪: ନିର୍ଘାତ ଖରା । ଆକାଶରୁ ବର୍ଷୁଛି ନିଆଁ ଝୁଲ । ଆହୁରି ଦୁଇଦିନ ପୋଡ଼ିବ, ଜାଳିବ ଏ ନିର୍ଦ୍ଦୟୀ ତାତି ଲହରି । ପାରଦ ୪୩ ଡିଗ୍ରୀ ଛୁଇଁଯିବ । ଉପକୂଳ ବି ୪୦ ଡିଗ୍ରୀରେ ସିଝିବ । ଚଳିତ ବର୍ଷ ପ୍ରଥମ ଥର ପାଇଁ ରାଜ୍ୟରେ ତାପମାତ୍ରା ୪୨ ଡିଗ୍ରୀ ସେଲସିୟସ୍ ଛୁଇଁଛି ।
୧୧ ସହରରେ ପାରଦ ୪୦ ଟପିଛି । ଆଉ ୧୦ ସହରରେ ତାପମାତ୍ରା ୩୮ରୁ ୪୦ ଡିଗ୍ରୀ ଭିତରେ ଥିଲା ଗୁରୁବାର । ଗରମକୁ ଭୀଷଣ ଗୁଳୁଗୁଳି ଜାରି ରହିଛି । ଚିନ୍ତାର ବିଷୟ ହେଲା, ଏ ସାଂଘାତିକ ତାତି ଲହରି ଭିତରେ ବାଜି ଲାଗିଛି କୋମଳମତି ସ୍କୁଲ ପିଲା ଓ ଶ୍ରମିକଙ୍କ ଜୀବନ ।
ଧୁ ଧୁ ଖରାରେ ଯେତେବେଳେ ତାପମାତ୍ରା ୩୫-୩୭ ଡିଗ୍ରୀ ରହୁଛି, ସେତିକିବେଳେ ସ୍କୁଲରୁ ଘରକୁ ଫେରୁଛନ୍ତି ପିଲାମାନେ । କିଏ ଅଭିଭାବକଙ୍କ ସହ ଗାଡ଼ିରେ ଆସୁଛି, ଆଉ କିଏ ଚାଲିଚାଲି ଓ ପୁଣି କିଏ ସାଇକେଲ ଚଲାଇ । ଭୀଷଣ ଖରାକୁ ଭୟାନକ ଗୁଳୁଗୁଳି ମୁଣ୍ଡ ଝାଇଁଝାଇଁ ହୋଇ ପଡ଼ୁଛି । ତଥାପି ଗଣଶିକ୍ଷା ବିଭାଗ ବେପରୁଆ ହୋଇ ବସିଛି ।
ସେହିପରି ନିର୍ଘାତ୍ ଖରାରେ ରାସ୍ତାଘାଟ ଓ ବିଭିନ୍ନ କୋଠାବାଡ଼ିରେ ଶ୍ରମିକ ଜାରି ରଖିଛନ୍ତି ନିର୍ମାଣ କାର୍ଯ୍ୟ । ଶ୍ରମ ବିଭାଗ ଚୁପ୍ । କୁଆଡ଼େ ଗଲା ସ୍ୱତନ୍ତ୍ର ରିଲିଫ କମିଶନରଙ୍କ କଟକଣା ଓ ଗାଇଡ୍ଲାଇନ୍ । ଦିନ ୧୧ଟାରୁ ୩ଟା ପର୍ଯ୍ୟନ୍ତ କାମ ବନ୍ଦ ରଖିବା କଟକଣା କ’ଣ ନିର୍ବାଚନୀ ବର୍ଷ ପାଇଁ ଛାଡ଼ କି? ଖରାରେ ଶ୍ରମିକଙ୍କ ଜୀବନକୁ ବାଜି ଲଗାଇବା ପାଇଁ ଅନୁମତି ଦେଇଛି କିଏ? ନା କୌଣସି ସତର୍କତା ପଦକ୍ଷେପ ନିଆଯାଉଛି ନା ସଚେତନତା ।
ଅଂଶୁଘାତ ମୃତ୍ୟୁ ପାଇଁ ଯେମିତି ଆମନ୍ତ୍ରଣ କରିବାକୁ ସବୁ କଟକଣାକୁ ଛାଡ଼ କରାଯାଇଛି । ତେବେ ପାଣିପାଗ ବିଭାଗ ସ୍ପଷ୍ଟ କହିଛି-ଦିନ ୧୧ଟାରୁ ୩ଟା ପର୍ଯ୍ୟନ୍ତ ସତର୍କ ରହିବାକୁ ହେବ । ବୟସ୍କ, ଗର୍ଭବତୀ, ନବଜାତ ଶିଶୁ, ରୋଗାକ୍ରାନ୍ତ ଲୋକଙ୍କ ପାଇଁ ବିଶେଷ ଧ୍ୟାନ ଦେବାକୁ ହେବ । ପଦାକୁ ଯିବାବେଳେ ସତର୍କତା ପଦକ୍ଷେପ ନିଅନ୍ତୁ ।
ପର୍ଯ୍ୟାପ୍ତ ପାଣି ପିଇବାକୁ ପରାମର୍ଶ ଦିଆଯାଇଛି । ଆସନ୍ତା ଦୁଇଦିନ ଦିନ ୧୧ଟାରୁ ଅପରାହ୍ନ ୩ଟା ଭିତରେ ପଦାକୁ ବାହାରିଲେ ଗୋଡ଼ାଇବ ତାତି ଲହରି । କେତେକ ସ୍ଥାନରେ ଦିନ ତାପମାତ୍ରା ୨-୩ ଡିଗ୍ରୀ ସେଲସିୟସ୍ ବଢ଼ିଯାଇପାରେ । ଅନେକ ସ୍ଥାନରେ ପାରଦ ୪୦ ଡିଗ୍ରୀ ଛୁଇଁବ । ସ୍ଥାନେ ସ୍ଥାନେ ୪୩ ଡିଗ୍ରୀ ହୋଇପାରେ । କିଛି ଜାଗାରେ ଦିନ ତାପମାତ୍ରା ସ୍ୱାଭାବିକଠାରୁ ୩ରୁ ୫ ଡିଗ୍ରୀ ଅଧିକ ରହିପାରେ । ରାତିରେ ବି ଗରମରୁ ନିସ୍ତାର ଆଶା କମ୍ ।
ସତର୍କ କରାଯାଇଛି, ଆଭ୍ୟନ୍ତରୀଣ ଏବଂ ଦକ୍ଷିଣ ଓଡ଼ିଶାର କିଛି ସ୍ଥାନରେ ଆସନ୍ତା ଦୁଇଦିନ (୫ ଓ ୬ ତାରିଖ) ତାତି ଲହରି ଜାରି ରହିବ । ବଲାଙ୍ଗୀର, କେନ୍ଦୁଝର, ନୟାଗଡ଼, ବୌଦ୍ଧ, ମାଲକାନଗିରି ଓ ଅନୁଗୁଳ ଜିଲ୍ଲା ପାଇଁ ତାତି ଲହରି ପ୍ରକୋପ ଆଶଙ୍କା ନେଇ ସତର୍କ ସୂଚନା (ୟେଲୋ) ଜାରି କରାଯାଇଛି । ରାତିରେ ବି ନିସ୍ତାର ମିଳିବନି ଗରମରୁ । ରାତି ତାପମାତ୍ରା ଅଧିକ ରହିବା ନେଇ ବଲାଙ୍ଗୀର, କନ୍ଧମାଳ, ଭଦ୍ରକ ଓ ବୌଦ୍ଧ ଜିଲ୍ଲାରେ ସତର୍କ ସୂଚନା ଜାରି ହୋଇଛି ।
ପୂର୍ବାନୁମାନ କହୁଛି, ଶୁକ୍ରବାର ୫ ତାରିଖ ବୌଦ୍ଧ, ବଲାଙ୍ଗୀର, ମାଲକାନଗିରି ଓ ଅନୁଗୁଳରେ ତାପମାତ୍ରା ୪୩ ଡିଗ୍ରୀ ଛୁଇଁପାରେ । ଉପକୂଳ ଓଡ଼ିଶାର ଅନେକ ସ୍ଥାନରେ ପାରଦ ୩୯ ଡିଗ୍ରୀ ପାଖାପାଖି ରହିବା ସମ୍ଭାବନା ଅଛି । ୬ ତାରିଖରେ ବି ପଶ୍ଚିମରେ ପାରଦ ୪୨-୪୩ ଡିଗ୍ରୀ ରହିବ ଅନେକ ସ୍ଥାନରେ ।
ଶନିବାର କଟକ, ଭୁବନେଶ୍ୱର, ଖୋର୍ଦ୍ଧା, ଜଗତସିଂହପୁର, କେନ୍ଦ୍ରାପଡ଼ା, ଭଦ୍ରକରେ ତାପମାତ୍ରା ବଢ଼ି ୪୦ ଡିଗ୍ରୀ ପହଞ୍ଚିପାରେ । ଅର୍ଥାତ୍ ସାରା ଓଡ଼ିଶା ଜଳିବ ନିଆଁ ବର୍ଷାରେ । ଉପକୂଳରେ ଗରମକୁ ଗୁଳୁଗୁଳି ଛଟପଟ କରିବା ଆଶଙ୍କା ରହିଛି । ପାଣିପାଗ ବିଭାଗ ଆଶ୍ୱସ୍ତି ଦେଖାଇଛି, ଦୁଇଦିନର ନିର୍ଘାତ୍ ଖରା ଓ ତାତି ଲହରି ପରେ ଗରମ କମିବ । ୬ ତାରିଖ ରାତିରୁ ପାଗ ବଦଳିପାରେ । କାଳବୈଶାଖୀ ବର୍ଷା ସମ୍ଭାବନା ଥିବାରୁ ୭ରୁ ତାତି ଖସିବ । ପାରଦ ୨ରୁ ୪ ଡିଗ୍ରୀ ପର୍ଯ୍ୟନ୍ତ କମିପାରେ ।
ଗୁରୁବାର ବୌଦ୍ଧ ଓ ମାଲକାନଗିରି ସହର ୪୨ ଡିଗ୍ରୀ ସେଲସିୟସ୍ ତାପମାତ୍ରାରେ ସିଝିଲା । ୧୧ ସହରରେ ପାରଦ ୪୦ ଡିଗ୍ରୀ ଉପରେ ଥିଲା । ଉପକୂଳ ଓଡ଼ିଶା ବି ଗରମ ଓ ଗୁଳଗୁଳିରେ ଝାଳନାଳ ହେଲା । ଅନୁଗୁଳ ୪୧.୭, ଝାରସୁଗୁଡ଼ା ୪୧.୬, ସୁନ୍ଦରଗଡ଼ ୪୦.୧, ତାଳଚେର ୪୦, ଭବାନୀପାଟଣା ୪୧, ବଲାଙ୍ଗୀର ୪୧.୭, ଟିଟିଲାଗଡ଼ ୪୧, ନୂଆପଡ଼ା ୪୦.୪, ରାଉରକେଲା ୪୦.୨ ଡିଗ୍ରୀ ସେଲସିୟସ୍ରେ ସିଝିଥିଲା ।
