ନିର୍ମାଣ ନସରୁଣୁ  ଉଠି ଯାଉଛି ପିଚୁ, ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ ନିମ୍ନମାନର ରାସ୍ତା କାମ

ଉପାନ୍ତ ଅଞ୍ଚଳର ଲୋକଙ୍କ ଗମନାଗମନ ସୁବିଧା ପାଇଁ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ ଉତ୍ତମ ଓ ସ୍ଥାୟୀ ରାସ୍ତା ନିର୍ମାଣ କରାଯାଉଛି । ଏଥିପାଇଁ କୋଟି କୋଟି ଟଙ୍କା ଖର୍ଚ୍ଚ ହେଉଛି । କିନ୍ତୁ ନିମ୍ନମାନର କାମ ପାଇଁ ଦିନ କେଇଟାରେ ରାସ୍ତା ଶୋଚନୀୟ ହୋଇପଡିଛି ।

ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକର ବଡ଼ଗମଡା ଗାଁ ଠାରୁ ବରକାନି ଗାଁ ପର୍ଯ୍ୟନ୍ତ  ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ  ନିର୍ମିତ ହୋଇଛି ରାସ୍ତା । ରାସ୍ତା କାମ ପୂର୍ବରୁ ସରିଥିବା ବେଳେ ମାଲପଡ଼ା- ଜୁରାବନ୍ଧ ଗାଁର ରାସ୍ତାର ନାଳରେ ତିଆରି ହୋଇଛି ପୋଲ । ପୋଲର ଉଭୟ ପାର୍ଶ୍ବ ରାସ୍ତାରେ ଏବେ ପିଚୁ କାମ କରାଯାଇଛି । ଅତି ତରବରିଆ ଭାବେ ରାତାରାତି ପିଚୁ କାମ କରାଯାଇଥିବାରୁ କାମ ନ ସରୁଣୁ ରାସ୍ତାରୁ ପିଚୁ ଉଠିଯାଉଛି । ପୋଲର ଉଭୟ ପାର୍ଶ୍ବରେ ଆବଶ୍ୟକ ଅନୁଯାୟୀ ଗାର୍ଡୱାଲ ନିର୍ମାଣ କରାଯାଇ ନାହିଁ । ପଥର ପିଚିଂ ମଧ୍ୟ ଠିକ ଭାବେ କରାଯାଇନଥିବା ଅଭିଯୋଗ କରିଛନ୍ତି ଗ୍ରାମବାସୀ । ନିମ୍ନ ମାନର କାମ ଯୋଗୁଁ ଏହି ରାସ୍ତା ଶୋଚନୀୟ ହୋଇପଡିଛି । ରାସ୍ତା ପାର୍ଶ୍ବରେ ପଥର ପିଚିଂ ହୋଇନଥିବାରୁ ବଡ଼ ବଡ଼ ଗାତ ଦେଖାଦେଲାଣି । ଏହି ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ ସାମିଲ କରିବା ସହ ଏହି ନାଳରେ ପୋଲ ନିର୍ମାଣ ପାଇଁ ବର୍ଷ  ବର୍ଷ ଧରି ଦାବି ହୋଇଆସୁଥିଲା । ପୋଲ ନିର୍ମାଣ ହେଲେ ଲୋକଙ୍କୁ ଗମନାଗମନର ସୁବିଧା ହେବ ବୋଲି ଲୋକେ ଆଶା ବାନ୍ଧିଥିଲେ । ରାସ୍ତା ଅବସ୍ଥା ଏବେ ଲୋକଙ୍କୁ ଚିନ୍ତାରେ ପକାଇଛି । ତରବରିଆ ଭାବରେ ନିର୍ମାଣ କରାଯିବା ଯୋଗୁଁ ଏଭଳି ସମସ୍ୟା ହେଉଥିବା ଅଭିଯୋଗ ହେଉଛି ।

ରାସ୍ତା କାମ ନିମ୍ନମାନର ହୋଇଥିବା ନେଇ ସ୍ଥାନୀୟ ବାସିନ୍ଦା ଗ୍ରାମ୍ୟ ଉନ୍ନୟନ ବିଭାଗର ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ପ୍ରକାର ପଦକ୍ଷେପ ନିଆଯାଇନଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ଏ ଦିଗରେ ପ୍ରଶାସନ ଉଚିତ ପଦକ୍ଷେପ ନନେଲେ ଆନ୍ଦୋଳନ କରାଯିବ ବୋଲି ସ୍ଥାନୀୟ ଲୋକେ କହିଛନ୍ତି ।  ଶୀଘ୍ର ରାସ୍ତା ମରାମତି ସହ ଗାର୍ଡୱାଲ ନିର୍ମାଣ ଏବଂ ପଥର ପିଚିଂ କରିବା ପାଇଁ ଦାବି ହୋଇଛି । ସେପଟେ ଏ ଦିଗରେ ଆବଶ୍ୟକ ପଦକ୍ଷେପ ନିଆଯିବ ବୋଲି ପ୍ରତିଶୃତି ଦେଇଛନ୍ତି ବଲାଙ୍ଗୀର ଜିଲ୍ଲାପାଳ ଗୌରବ ଶିବାଜୀ ଇସଲୱାର । ନିର୍ମାଣ ନସରୁଣୁ ରାସ୍ତା ଉପରୁ ଉଠି ଯାଉଛି ପିଚୁ । ତେବେ ଏ ଦିଗରେ ଗ୍ରାମ୍ୟ ଉନ୍ନୟନ ବିଭାଗ କଣ ପଦକ୍ଷେପ ନେଉଛି ତାହା ଦେଖିବାକୁ ବାକି ରହିଲା ।

The post ନିର୍ମାଣ ନସରୁଣୁ  ଉଠି ଯାଉଛି ପିଚୁ, ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ ନିମ୍ନମାନର ରାସ୍ତା କାମ appeared first on KNews Odisha.