ପୋଲିସ ଷ୍ଟେସନରେ ବଦଳା ଯାଇଛି ପ୍ରମାଣ, ଫେକ୍ ରେକର୍ଡ ତିଆରି କରାଯାଇଛି...କୋଲକାତା ମାମଲାରେ CBIର ବଡ଼ ଦାବି

ନୂଆଦିଲ୍ଲୀ: କୋଲକାତାରେ ଟ୍ରେନି ଡାକ୍ତରଙ୍କୁ ଦୁଷ୍କର୍ମ ଏବଂ ହତ୍ୟା ମାମଲାରେ ସିବିଆଇ ଚାଞ୍ଚଲ୍ୟକର ଦାବି କରିଛି । ସିବିଆଇ ବୁଧବାର ଦାବି କରିଛି ଯେ ପୋଲିସ ଷ୍ଟେସନରେ ପ୍ରମାଣ ବଦଳା ଯାଇଥିଲା । ଏହା ପୂର୍ବରୁ ବି ମହିଳା ଡାକ୍ତରଙ୍କ ହତ୍ୟା ମାମଲାରେ ପୋଲିସ ବିରୋଧରେ ପ୍ରମାଣ ନଷ୍ଟ ଅଭିଯୋଗ ଆସିଥିଲା । ଏଥିପାଇଁ ସିବିଆଇ ଟାଲା ଥାନାର ତତ୍କାଳୀନ ଓଆଇସି ଅଭିଜିତ୍ ମଣ୍ଡଳଙ୍କୁ ଗିରଫ କରିଥିଲା ।

ଏଥର ସେହି ଟାଲା ଥାନା ବିରୋଧରେ ଏକ ସଙ୍ଗୀନ ଅଭିଯୋଗ ଆସିଛି । ଅଭିଯୋଗ ଯେ ଥାନା ଭିତରେ ପ୍ରମାଣ ବଦଳା ଯାଇଛି ଏବଂ ମିଛ ରେକର୍ଡ ପ୍ରସ୍ତୁତ କରାଯାଇଛି । କେନ୍ଦ୍ରୀୟ ତଦନ୍ତ ଏଜେନ୍ସି ବୁଧବାର ସ୍ୱତନ୍ତ୍ର ସିବିଆଇ କୋର୍ଟରେ ଏହାର ଖୁଲାସା କରିଛି ।

ଉଲ୍ଲେଖଯୋଗ୍ୟ ଯେ ଅଗଷ୍ଟ ୯ରେ ଆରଜି କର ମେଡିକାଲ କଲେଜ ଏବଂ ହସ୍ପିଟାଲରେ ଟ୍ରେନି ଡାକ୍ତରଙ୍କ ମୃତ ଦେହ ମିଳିଥିଲା । ଶବ ବ୍ୟବଚ୍ଛେଦ ପରେ ମହିଳା ଡାକ୍ତରଙ୍କ ସହ ଶାରୀରିକ ଶୋଷଣ ହୋଇଥିବା ଜଣାପଡ଼ିଥିଲା । ମାମଲାର ଅଭିଯୁକ୍ତ ଭାବେ ସଞ୍ଜୟ ରୟକୁ ପ୍ରଥମେ ଗିରଫ କରାଯାଇଥିଲା । ଏହାପରେ ମାମଲାରେ ଷଡ଼ଯନ୍ତ୍ର ରଚିବା ଅଭିଯୋଗରେ କଲେଜର ପୂର୍ବତନ ପ୍ରିନ୍ସିପାଲ ସନ୍ଦୀପ ଘୋଷ ଏବଂ ଟାଲା ଥାନାର ପୂର୍ବତନ ଓଆଇସି ଅଭିଜିତ୍ ମଣ୍ଡଳକୁ ମଧ୍ୟ ଗିରଫ କରିଥିଲା ।

କେନ୍ଦ୍ରୀୟ ତଦନ୍ତ ଏଜେନ୍ସି ଦାବି କରିଛି ଯେ ଟାଲା ପୋଲିସ ଷ୍ଟେସନ ଭିତରେ ଫେକ୍ ରେକର୍ଡ ତିଆରି କରାଯାଇଥିଲା । ସିବିଆଇ ଦ୍ୱାରା ଦିଆଯାଇଥିବା ଦସ୍ତାବିଜର ପଏଣ୍ଟ ୪ରେ ଲେଖିଛି, ‘ଫଲ୍ସ ରେକର୍ଡ କ୍ରିଏଟେଡ୍ ବା ଅଲ୍ଟରଡ୍’ ଅର୍ଥାତ୍ ଭୁଲ ରେକର୍ଡ କରାଯାଇଛି ବା ତିଆରି କରାଯାଇଛି । ସିବିଆଇ ଦାବି କରିଛି ଯେ ଆରଜି କର ମାମଲାରେ ପାରିପାଶ୍ୱିକ ସାକ୍ଷ୍ୟ ଏବଂ ଅଭିଯୁକ୍ତଙ୍କୁ ପଚରାଉଚରା ଆଧାରରେ ଏହି ସୂଚନା ସାମନାକୁ ଆସିଛି । ଟାଲା ଥାନାର ଭୂମିକା ଉପରେ ଆରମ୍ଭରୁ ହିଁ ପ୍ରଶ୍ନ ଉଠୁଛି । ସଠିକ୍ ସମୟରେ ଏଫ୍‌ଆଇଆର୍ ରୁଜୁ କରାଯାଇନଥିଲା ? ପୋଲିସ ତରବରିଆ ଭାବେ ଶବର ଅନ୍ତିମ ସଂସ୍କାର କାହିଁକି କଲା ? ଏପରି ଅନେକ ପ୍ରଶ୍ନ ଉଠୁଛି । ବୁଧବାର କୋର୍ଟରେ ନିଜ ଆଡ଼ୁ ଯୁକ୍ତି ରଖି ପୂର୍ବତନ ଓଆଇସି ଅଭିଜିତ୍ ମଣ୍ଡଳ ଦାବି କରିଥିଲେ ଯେ ଘଟଣା ଦିନ ସେ ନିଜ କାମ ଠିକ୍ ଭାବେ କରିଥିଲେ ।