ପ୍ରତାପ ଷଡ଼ଙ୍ଗୀଙ୍କୁ ଠେଲିଦେବା ପରେ ଦେଖିବାକୁ ଗଲେ ରାହୁଲ, ଆଉ ତା’ ପରେ…

ନୂଆଦିଲ୍ଲୀ,୧୯ା୧୨: ସଂସଦ ଭବନ ପରିସରରେ ହୋଇଥିବା ଉତ୍ତେଜନାକୁ ନେଇ ଦେଶରେ ରାଜନୀତି ତୀବ୍ର ହୋଇଛି। ଭାରତୀୟ ଜନତା ପାର୍ଟି ଅଭିଯୋଗ କରିଛି ଯେ, ବିରୋଧୀ ଦଳର ନେତା ରାହୁଲ ଗାନ୍ଧୀ ତାଙ୍କର ଦୁଇ ଏମ୍‌ପି ପ୍ରତାପ ଷଡ଼ଙ୍ଗୀ ଏବଂ ମୁକେଶ ରାଜପୁତଙ୍କୁ ଠେଲି ଦେଇଛନ୍ତି। ଉଭୟ ଏମ୍‌ପିଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ଏହି ସମୟରେ ରାହୁଲ ପାଲଟା ଅଭିଯୋଗ କରିଛନ୍ତି ଯେ, ଭାଜପା ଏମ୍‌ପିମାନେ ତାଙ୍କୁ ମକର ଦ୍ୱାରରେ ଅଟକାଇ ତାଙ୍କୁ ଧକ୍କା-ମୁଥ ମାରିଥିଲେ।

ସୋସିଆଲ ମିଡିଆରେ ଏକ ଭିଡିଓ ସାମ୍ନାକୁ ଆସିଛି। ଯେଉଁଥିରେ ରାହୁଲ ଯେଉଁ ସ୍ଥାନରେ ପ୍ରତାପ ଷଡ଼ଙ୍ଗୀ ବସିଥିଲେ ସେହି ସ୍ଥାନକୁ ଯାଉଥିବାର ନଜର ଆସିଛନ୍ତି। ଯେତେବେଳେ ଭାଜପା ଏମ୍‌ପି ଷଡ଼ଙ୍ଗୀଙ୍କୁ ଡାକ୍ତରଖାନା ନିଆଯାଉଥିଲା। ସେତେବେଳେ କଂଗ୍ରେସ ନେତା ରାହୁଲ ସେହି ସ୍ଥାନ ଦେଇ ଯାଉଥିଲେ। ପ୍ରତାପଙ୍କୁ ଦେଖି ରାହୁଲ କିଛି ସମୟ ଅଟକି ଗଲେ, ସେତେବେଳେ ନିଶିକାନ୍ତ ଦୁବେଙ୍କ ସମେତ ସେଠାରେ ଉପସ୍ଥିତ ଥିବା ସମସ୍ତ ଭାଜପା ଏମ୍‌ପି ତାଙ୍କୁ ଟାର୍ଗେଟ କରିବା ଆରମ୍ଭ କରିଥିଲେ। ଭିଡିଓରେ ନିଶିକାନ୍ତ ଦୁବେ କଂଗ୍ରେସ ନେତା ରାହୁଲଙ୍କୁ କହୁଛନ୍ତି, ତୁମେ ଗୁଣ୍ଡାଗର୍ଦ୍ଦି କରୁଛ। ତୁମେ ବୃଦ୍ଧଙ୍କୁ ତଳକୁ ଠେଲି ଦେଲ।

ପ୍ରତାପ ଷଡ଼ଙ୍ଗୀ ଅଭିଯୋଗ କରିଛନ୍ତି ଯେ, ରାହୁଲ ତାଙ୍କ ଉପରେ ପଡ଼ିଥିବା ଜଣେ ଏମ୍‌ପିଙ୍କୁ ଠେଲି ଦେଇଛନ୍ତି। ଷଡ଼ଙ୍ଗୀଙ୍କୁ ରାମ ମନୋହର ଲୋହିଆ ଡାକ୍ତରଖାନାରେ ଭର୍ତ୍ତି କରାଯାଇଛି। ଏହା ଉପରେ ରାହୁଲ କହିଛନ୍ତି, କ୍ୟାମେରାରେ ସବୁକିଛି କଏଦ ହୋଇଛି। ଏଥିସହ ସେ ଭାଜପା ଏମ୍‌ପିମାନଙ୍କୁ ଧମକ ଦେଉଥିବା ଅଭିଯୋଗ କରିଛନ୍ତି।

କଂଗ୍ରେସ ଏକ ଭିଡିଓ ଜାରି କରି ଦାବି କରିଛି ଯେ, ଭାଜପା ସଦସ୍ୟମାନେ ରାଜ୍ୟ ସଭାରେ ବିରୋଧୀ ଦଳର ନେତା ମଲ୍ଲିକାର୍ଜୁନ ଖାର୍ଗେ ଏବଂ ଓ୍ବାୟନାଡ ଏମ୍‌ପି ପ୍ରିୟଙ୍କା ଗାନ୍ଧୀଙ୍କ ସମେତ ସଂସଦ ଭବନ ପରିସରରେ ବହୁ ମହିଳା ଏମ୍‌ପିଙ୍କୁ ଧକ୍କା ମୁଥ ମାରିଛନ୍ତି।

The post ପ୍ରତାପ ଷଡ଼ଙ୍ଗୀଙ୍କୁ ଠେଲିଦେବା ପରେ ଦେଖିବାକୁ ଗଲେ ରାହୁଲ, ଆଉ ତା’ ପରେ… appeared first on Dharitri Odia News.