ଭାରତରେ କମୁଛି ପ୍ରଜନନ ହାର; ଚିନ୍ତା ବଢାଇଲା ଜାତିସଂଘ ରିପୋର୍ଟ

କନକ ବ୍ୟୁରୋ : ଦୃତ ଜନସଂଖ୍ୟା ବୃଦ୍ଧି ଯୋଗୁ ପରିଚିତ ଭାରତରେ ବର୍ଷକୁ ବର୍ଷ ପ୍ରଜନନ ହାର କମିବାରେ ଲାଗିଛି । ନିକଟରେ ପ୍ରକାଶିତ ଜାତିସଂଘର ରପୋର୍ଟ ୨୦୨୪ ଅନୁସାରେ ଆମ ଦେଶରେ ପ୍ରଜନନ ହାର ମହିଳାଙ୍କ ପିଛା ଦୁଇ ପିଲାକୁ କମିଯାଇଛି । ଯାହା ୧୯୫୦ରେ ୬.୨ ଅର୍ଥାତ୍ ମହିଳାଙ୍କ ପିଛା ୬ରୁ ଅଧିକ ସନ୍ତାନ ଥିଲା । କେବଳ ଭାରତରେ ନୁହେଁ ସାରା ବିଶ୍ୱରେ ଏବେ ଫର୍ଟିଲିଟି ହାର କମୁଥିବା ଦେଖିବାକୁ ମିଳୁଛି । ଯାହା ବିଶ୍ୱ ପାଇଁ ଚିନ୍ତାର କାରଣ ପାଲଟିଛି ।

କାହିଁକି କମୁଛି ପ୍ରଜନନ ହାର ?

• ଦୃତ ସହରୀକରଣ ଏବଂ ଆଧୁନିକ ଜୀବନଶୈଳୀ
• ଶିକ୍ଷା, ବୃତ୍ତି, ସ୍ବାସ୍ଥ୍ୟସେବାରେ ବିକାଶ
• ଛୋଟ ପରିବାର ପସନ୍ଦ କରୁଛନ୍ତି ସହରୀ ମହିଳା
• ବିବାହରେ ବିଳମ୍ବ, ଦୈନଦିନ ଖର୍ଚ୍ଚ ବୃଦ୍ଧି
• ଚାକିରି ପାଇବା ଉପରେ ଅଧିକ ଗୁରୁତ୍ବ
• ଅଧିକ ପିଲା ଆର୍ଥିକ ଚ୍ୟାଲେଞ୍ଜ ସୃଷ୍ଟି କରୁଛି
• ପରିବାର ପ୍ଲାନିଂ ଏବଂ ସଚେତନତା

ଆମେରିକା, ଋଷ, ଦକ୍ଷିଣ କୋରିଆ ଭଳି ବିକଶିତ ଦେଶମାନେ ଏବେ ପ୍ରଜନନ ହାର ବୃଦ୍ଧି କରିବା ଉପରେ ଗୁରୁତ୍ୱ ଦେଉଛନ୍ତି । ଭାରତ ମଧ୍ୟରେ ଏଥିରେ ସାମିଲ ହୋଇଛି । ଆରଏସଏସ ମୁଖ୍ୟ ମୋହନ ଭଗୱନ୍ତ ମହିଳାଙ୍କୁ ଅତି କମରେ ତିନିଟି ପିଲା ଜନ୍ମ କରିବାକୁ ଆହ୍ୱାନ କରିଛନ୍ତି । ଯାହାକୁ ନେଇ ବିବାଦ ଆରମ୍ଭ ହୋଇଛି । କଂଗ୍ରେସ, ସମାଜବାଦୀ ପାର୍ଟି ସମେତ ବିରୋଧୀ ବିରୋଧ କରିଛନ୍ତି । ମୁସଲିମ ନେତା ତଥା ଏଆଇଏମଆଏମ ମୁଖ୍ୟ ଅସଦଉଦ୍ଦୀନ ଓୱେସୀ ମୋହନଙ୍କୁ ଟାର୍ଗେଟ କରିଛନ୍ତି । ଓୱେସୀ କହିଛନ୍ତି ଗୋଟିଏ ପଟେ ତୁମେ କହୁଛ ମୁସଲିମଙ୍କର ଅଧିକ ପିଲା ଅଛନ୍ତି ଏବଂ ଅନ୍ୟପଟେ ଅଧିକ ପିଲାଜନ୍ମ କରିବାକୁ କହୁଛ । ଯାହର ଜବାବ ଦେଇଛନ୍ତି କେନ୍ଦ୍ରମନ୍ତ୍ରୀ ଗିରିରାଜ ସିଂ ।

ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଏଡୁ ଏବଂ ତାମିଲନାଡୁ ମୁଖ୍ୟମନ୍ତ୍ରୀ ଷ୍ଟାଲିନଙ୍କ ପରେ ମୋହନ ଭାଗବତ ଅଧିକ ପିଲା ଜନ୍ମ କରିବାକୁ ଅପିଲ କରିଛନ୍ତି । କାରଣ ଯଦି ପ୍ରଜନନ ହାର ବୃଦ୍ଧି ନହୁଏ ୨୦୫୦ ବେଳକୁ ଭାରତରେ ବୟସ୍କ ନାଗରିକଙ୍କ ସଂଖ୍ୟା ଅଧିକ ହୋଇଯିବ । ଯାହା ସ୍ୱାସ୍ଥ୍ୟସେବା ଉପରେ ମଧ୍ୟ ପ୍ରଭାବ ପକାଇବ । ଏହାଦ୍ୱାରା ବିଶେଷକରି ଗ୍ରାମାଞ୍ଚଳର ଲୋକେ ଅଧିକ ପ୍ରଭାବିତ ହେବେ ।