ମୃତ୍ୟୁକୁ ମାତ୍‌ ଦେଲେ ଦମ୍ପତି, ଭୂସ୍ଖଳନର କରାଳ ପ୍ରଭାବରୁ ଅଳ୍ପକେ ବର୍ତ୍ତିଲେ

ମୁମ୍ଵାଇ ୨୮।୦୫: ଦକ୍ଷିଣ ପ୍ରଶାନ୍ତ  ମହାସାଗରୀୟ ଦେଶ  ପାପୁଆ ନ୍ୟୁଗିନିର ଏଙ୍ଗା ପ୍ରଦେଶରେ  ଶୁକ୍ରବାର ଭୂସ୍ଖଳନ ପରେ ଫସିଥିବା ଲୋକଙ୍କୁ ଉଦ୍ଧାର  ଲାଗି ଅବିରତ  ଉଦ୍ୟମ ଚାଲିଛି ।  ଇତିମଧ୍ୟରେ  ସେଠାକାର  କାଓଲୋକାମ୍‌ ଗାଁର ଏକ ଦମ୍ପତି ମୃତ୍ୟୁକୁ ମାତ୍‌ ଦେଇଥିବା ଜଣାପଡ଼ିଛି । ସେମାନେ ହେଲେ ଜନ୍‌ସନ୍‌  ଓ ଜ୍ୟାକଲିନ୍‌ ୟାନ୍ଦାମ । ସୌଭାଗ୍ୟକୁ ସେମାନଙ୍କର ଘର ଭୂସ୍ଖଳନର କରାଳ  ପ୍ରଭାବରୁ ଅଳ୍ପକେ ବର୍ତ୍ତି ଯାଇଥିଲା । କିନ୍ତୁ ଘର ଚାରିପଟେ ବଡ଼ ପଥରଖଣ୍ଡ ଗଦା ହୋଇଯାଇଥିଲ। ତା’ ମଧ୍ୟରେ ସେମାନେ ଫସି ରହିଥିଲେ । 

ଏହି ଘଟଣା ପରେ  ଦମ୍ପତି ଉଦ୍ଧାରକାରୀମାନଙ୍କୁ ଧନ୍ୟବାଦ ଜଣାଇବା ସହିତ ଏହାକୁ ଏକ ଚମତ୍କାର  ଭାବେ ବର୍ଣ୍ଣନା କରିଛନ୍ତି । ଏକ ସ୍ଥାନୀୟ ପୋର୍ଟାଲକୁ ଜ୍ୟାକଲିନ୍‌ କହିଛନ୍ତି, ସେହି  ମୂହୁର୍ତ୍ତରେ ଆମର ଜୀବନରକ୍ଷା କରିବା ଯୋଗୁ ଆମେ ଈଶ୍ୱରଙ୍କୁ ଧନ୍ୟବାଦ  ଦେଉଛୁ । ମୃତ୍ୟୁ ସୁନିଶ୍ଚିତ ବୋଲି ଆମେ ଧରିନେଇଥିଲୁ । ଭାଗ୍ୟକୁ ଆଦରି  ଏକାଠି ମରିବାକୁ ପ୍ରସ୍ତୁତ ହୋଇଯାଇଥିଲୁ । କିନ୍ତୁ ବଡ଼ ବଡ଼ ପଥରଖଣ୍ଡ ଆମ  ଉପରେ ପଡି଼ନଥିଲା । କେବଳ ଘର ଚାରିପାଖରେ ଗଦା ହୋଇଯାଇଥିଲା ।  ପ୍ରାୟ ୮ ଘଣ୍ଟା ଧରି ସେଭଳି ଅବସ୍ଥାରେ ଫସି ରହିବା ପରେ ଆମକୁ ଉଦ୍ଧାର  କରାଯାଇଥିଲା ।

ଭୂସ୍ଖଳନ ସମୟରେ ଦମ୍ପତିଙ୍କର ୩ ସନ୍ତାନ କାଓଲୋକାମ୍‌ ଗାଁରେ  ନଥିବାରୁ ସେମାନେ ମଧ୍ୟ ବର୍ତ୍ତିଯାଇଛନ୍ତି । ଏହି ଦମ୍ପତିଙ୍କୁ ଉଦ୍ଧାର କରାଯିବା  ସମୟରେ ଘଟଣାସ୍ଥଳରେ ଉପସ୍ଥିତ ଥିବା ଜଣେ ବ୍ୟକ୍ତି କହିଛନ୍ତି, ଜ୍ୟାକଲିନ୍‌ଙ୍କ  ଘର ଚାରିପଟେ ବିରାଟ ପଥରଖଣ୍ଡ ସବୁ ଜମା ହୋଇଯାଇଥିଲା । ତେଣୁ ଗୋଡ଼ି  ଓ ମାଟିର ଅତିରିକ୍ତ ଧ୍ୱଂସାବଶେଷ ଆଉ ସେମାନଙ୍କ ଘର ଉପରେ ପଡ଼ିଲା ନାହିଁ ।  ଯଦି ସେମାନଙ୍କୁ ଠିକ୍‌ ସମୟରେ ଉଦ୍ଧାର କରାଯାଇନଥାନ୍ତା ତା’ହେଲେ ସେମାନେ  ନିଶ୍ଚିତ ଭାବେ କ୍ଷୁଧା ଓ ତୃଷ୍ଣା ଯୋଗୁ ମରିଯାଇଥାନ୍ତେ ।