ମେଣ୍ଟ ସସ୍‌ପେନ୍ସ: ମନମୋହନଙ୍କ ୟୁ-ଟର୍ଣ୍ଣ, ଦେବୀ ଉଠେଇଲେନି କଥା

ଭୁବନେଶ୍ୱର: ମେଣ୍ଟ ନାଟକରେ ଏଯାଏଁ ଜବନୀକା ପଡ଼ିଲାନି । ମାସେରୁ ଅଧିକ ଦିନ ହେବ ରାଜ୍ୟରେ ବିଜେପି-ବିଜେଡି ମେଣ୍ଟ ନେଇ ଜାରି ରହିଥିବା ଚର୍ଚ୍ଚାରେ କେବେ ପୂର୍ଣ୍ଣଚ୍ଛେଦ ପଡ଼ିବ ତାହା ବି ଆହୁରି ଅନିଶ୍ଚିତ ହୋଇଛି । ବିଶେଷକରି ନିର୍ବାଚନ ଘୋଷଣାକୁ ମାତ୍ର କିଛି ଦିନ ଥିବା ଆଶା ବେଳେ ଗୁରୁବାର (ମାର୍ଚ୍ଚ ୧୪) ମେଣ୍ଟ ଚର୍ଚ୍ଚା ଏକ ନାଟକୀୟ ଢଙ୍ଗରେ ଆହୁରି ସସପେନ୍ସ ସୃଷ୍ଟି କରିଛି । ବିଶେଷ କରି ରାଜ୍ୟ ବିଜେପି ସଭାପତିଙ୍କ ଭିନ୍ନ ଭିନ୍ନ ବୟାନ ସାଙ୍ଗକୁ ବିଜେଡିର ବହୁ ପ୍ରତୀକ୍ଷିତ ବୈଠକ ପରେ ଉପସଭାପତି ଦେବୀ ପ୍ରସାଦ ମିଶ୍ରଙ୍କ ମପାଚୁପା କଥା ମେଣ୍ଟ ଆଶଂକାରେ ଅନେକ ପ୍ରଶ୍ନବାଚୀ ଲଗାଇ ଦେଇଛି ।

ତିନି ଦିନ ରହଣୀ ପରେ ଦିଲ୍ଲୀରୁ ଫେରିଥିବା ବିଜେପି ରାଜ୍ୟ ସଭାପତି ମନମୋହନ ସାମଲ ଗୁରୁବାର ସକାଳେ ପ୍ରଥମେ କହିଲେ ବିଜେପି ଏକାକୀ ସରକାର ଗଢିବ । ଏକ୍ସ ପୋଷ୍ଟରେ ଲେଖିଲେ, ଦଳ ଏକାକୀ ଲଢିବ ଏବଂ ସରକାର ଗଢିବ । ପ୍ରଧାନମନ୍ତ୍ରୀ ମୋଦୀଙ୍କ ପ୍ରଶଂସା ସହ ଓଡ଼ିଆ ଅସ୍ମିତାର ଦ୍ୱାହି ଦେଇ ଜନସମର୍ଥନର ଦାବି ବି ରେଖିଲେ । ତାଙ୍କ କଥାକୁ ଭୁବନେଶ୍ୱର ସାଂସଦ ବି ଦୋହରାଇଲେ । କିନ୍ତୁ ଏମିକି କହିବାର କିଛି ଘଣ୍ଟା ପରେ ମେଣ୍ଟକୁ ଅସ୍ୱୀକାର କରୁଥିବା ମନମୋହନ କହିଲେ ଦଳର କେନ୍ଦ୍ରୀୟ ନେତୃତ୍ୱ ଯାହା ନିର୍ଦ୍ଦେଶ ଦେବ ତାହା ରାଜ୍ୟ ଶାଖା ମାନିବ । ଅର୍ଥାତ୍ କେଉଁଠି ନାଁ କେଉଁଠି ମନମୋହନଙ୍କ ଉପରେ ଚାପ ଥିବା ଆଶଂକା କଲେ ରାଜନୀତିକ ପର୍ଯ୍ୟବେକ୍ଷକ । ମନମୋହନ ପୂରା ୟୁ-ଟର୍ଣ୍ଣ ନେଲେ । ଏକାକୀ ଲଢିବୁ ସରକାର ଗଢିବୁ କହୁଥିବା ମନମୋହନ ନିଜ ଏକ୍ସ ପୋଷ୍ଟ ବି ଡିଲିଟ୍ କରିଦେଲେ । ଫଳରେ ମନମୋହନ ଚାପରେ କଥା ବଦଳାଇଥିବା ଚର୍ଚ୍ଚା ସାଙ୍ଗକୁ ପୁଣି ମେଣ୍ଟ ଚର୍ଚ୍ଚା ଉଠିଲା ।

ଏପଟେ ଅପରାହ୍ମରେ ନବୀନ ନିବାସରେ ବୈଠକ ପାଇଁ ଏକାଠି ହେଲେ ଦଳର ବରିଷ୍ଠ ନେତାଏ । ଦଳ ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଠାରୁ ଡାକରା ପାଇ ମନ୍ତ୍ରୀ ମଣ୍ଡଳର ସଦସ୍ୟଙ୍କ ସହ ବହୁ ବରିଷ୍ଠ ନେତା ଏବଂ ଜିଲ୍ଲା ସଂଗଠନର ଦାୟିତ୍ୱରେ ଥିବା ନେତାଏ ବି ଏକାଠି ହେଲେ । ଦୁଇ ଡଜନରୁ ଅଧିକ ନେତା ନବୀନ ନିବାସ ପହଞ୍ଚି ବୈଠକରେ ସାମିଲ ହୋଇଥିଲେ । ପ୍ରାୟ ୨ ଘଣ୍ଟା ବୈଠକ ଚାଲିଲା । କିନ୍ତୁ ବୈଠକ ଶେଷରେ ବରିଷ୍ଠ ନେତାଏ ବାହାରକୁ ଆସିଲେ । ଦଳର ଉପସଭାପତି ଦେବୀ ମିଶ୍ର ଗଣମାଧ୍ୟମକୁ କହିଲେ, ଦଳ ସୁପ୍ରିମୋଙ୍କ ସହ ନେତାମାନେ ସାଂଗଠନିକ ପ୍ରସଙ୍ଗ ସହ ନିର୍ବାଚନ ରଣନୀତି ନେଇ ଆଲୋଚନା କରିଛନ୍ତି । ନେତାଏ ସେମାନଙ୍କ ରିପୋର୍ଟ ଦେଇଛନ୍ତି । ନିର୍ବାଚନ ଓ ଦଳର ସଂଗଠନ ତଥା ଅନ୍ୟାନ୍ୟ ବିଷୟରେ ସବିଶେଷ ଆଲୋଚନା ହୋଇଛି । ସଭାପତି ଜିଲ୍ଲା ସଂଗଠନର ନେତାଙ୍କ ସହ ସମସ୍ତଙ୍କ କଥା ଶୁଣିଛନ୍ତି ଏବଂ ପରାମର୍ଶ ଦେଇଛନ୍ତି । ଏତିକି କହିବା ବେଳେ ସେ ମେଣ୍ଟ ବିଷୟରେ କିଛି ବି କହି ନାହାନ୍ତି । ପୁଣି ଥରେ ବିଜେଡି ମେଣ୍ଟ ନେଇ ନିରବ ରହିଛି । ମେଣ୍ଟ ପ୍ରସଙ୍ଗରେ ଦଳର ଆଭିମୁଖ୍ୟ ଜାଣିବାକୁ ଚାହୁଁଥିବା ଗଣମାଧ୍ୟମ ନିରାଶ ହୋଇଛି । ସମର୍ଥନ କିମ୍ୱା ଅସ୍ୱୀକାର ତ' ପର କଥା ମେଣ୍ଟର ନାଁ ବି ନେଇ ନାହାନ୍ତି ଦେବୀ ମିଶ୍ର ।

ଦୁଇ ଦଳର ଏପରି ବୟାନ ଏବଂ ନିରବତା ନେଇ ରାଜନୀତିକ ପର୍ଯ୍ୟବେକ୍ଷକମାନେ ଏବେ ତର୍ଜମା ଆରମ୍ଭ କରିଛନ୍ତି । ମନମୋହନଙ୍କ ବୟାନବାଜିକୁ ନାଟକ ସହ ତୁଳନା କରାଯାଉଥିବା ବେଳେ ମେଣ୍ଟ ସମ୍ପର୍କରେ ନିରବତା ବିଜେଡିର ସୁଚିନ୍ତିତ ରଣନୀତିର ସଂକେତ ଦେଉଛି । ମନମୋହନଙ୍କ ୟୁ-ଟର୍ଣ୍ଣ ମେଣ୍ଟ ସମ୍ଭାବନାରେ ଫୁଲଷ୍ଟପ୍ ପଡ଼ିନଥିବା ଦର୍ଶାଉଛି । ଏପଟେ ସାଂଗଠନିକ ଆଲୋଚନା ଏବଂ ଜିଲ୍ଲାୱାରି ରିପୋର୍ଟ କହି ମେଣ୍ଟ ପ୍ରତି ଦଳ ଆଗ୍ରହୀ ନଥିବା ବିଜେଡି ସୂଚେଇବାକୁ ଚେଷ୍ଟା କରୁଛି । ସଂଖ୍ୟା ଅଧିକ ଥିବାରୁ ଦଳ ଜନତାଙ୍କ ବଳରେ ବଳିଆନ ବୋଲି ପ୍ରମାଣ କରିବାକୁ ଚେଷ୍ଟା କରୁଛି ବିଜୁ ଜନତା ଦଳ । ମନମୋହନ ବିଜେପିର ସରକାରର ହେବ କହୁଥିବା ବେଳେ, ନିରବ ରହି ବିଜେଡି ଦେଖାଇବାକୁ ଚାହୁଁଛି ଯେ ଷଷ୍ଠ ଥର କ୍ଷମତାକୁ ଆସିବା ନେଇ ଦଳ ଦୃଢ ଆଶାବାଦୀ । ମେଣ୍ଟ ପ୍ରସଙ୍ଗରେ ନିରବ ରହି ବିଜେଡି ଏହା ମଧ୍ୟ ଦେଖାଇବାକୁ ଚେଷ୍ଟା କରୁଛି ଯେ ମେଣ୍ଟ ହେଉ ବା ନହେଉ ସେଥିରେ ଦଳ ପାଇଁ କୌଣସି ଫରକ ନାହିଁ । ଏପରିକି ମେଣ୍ଟ ଖବର ଗଣମାଧ୍ୟମର ମନ ଗଢା ଖବର ବୋଲି ମଧ୍ୟ ପ୍ରମାଣିତ କରାଯାଇପାରେ । ଯାହା ବି ହେଉ ରାଜ୍ୟସଭା ନିର୍ବାଚନ, ପ୍ରଧାନମନ୍ତ୍ରୀଙ୍କ ଗସ୍ତ କାର୍ଯ୍ୟକ୍ରମ, ବିଜେପି ସହ କୌଣସି ବି ଦଳ ପ୍ରାର୍ଥୀ ଘୋଷଣା ନହେବା ଇତ୍ୟାଦି ଘଟଣାରୁ ମେଣ୍ଟ ସମ୍ଭାବନା ଏବେ ବି ଜୀବିତ ଥିବା ଚର୍ଚ୍ଚା ହେଉଛି । ତଥାପି ଅପେକ୍ଷା । ହୁଏତ ଆଗାମୀ ୨୪ ଘଣ୍ଟା ବା ଶନିବାର ସୁଦ୍ଧା ମେଣ୍ଟ ପ୍ରଶ୍ନର ଚୂଡ଼ାନ୍ତ ଉତ୍ତରଟି ମିଳିଯାଇପାରେ ।