୧୫ ବର୍ଷରୁ ପଡୋଶୀଙ୍କ ବିଲ୍ ଦେଇ ଆସୁଥିଲେ ବ୍ୟକ୍ତି, ଯାଞ୍ଚରେ ହେଲା ଆଶ୍ଚର୍ଯ୍ୟକର ଖୁଲାସା

ନୂଆଦିଲ୍ଲୀ ୨୨।୦୯: ଆମେରିକା ଭାକାଭିଲେ ସହରରେ ରହୁଥିବା କେନ୍‌ ୱିଲସନ୍‌ଙ୍କ  ସହିତ ଏକ ଅଜବ ଘଟଣା ଘଟିଛି । ସେ ବିଗତ ୧୫ ବର୍ଷ  ହେଲା ତାଙ୍କ ପଡ଼ୋଶୀଙ୍କର ବିଦ୍ୟୁତ୍‌ ବିଲ୍‌ ଦେଇଆସୁଥିବା  ଜଣାପଡି଼ଛି । ପାସିଫିକ୍‌ ଗ୍ୟାସ୍‌  ଆଣ୍ଡ ଇଲେକ୍ଟ୍ରିକ୍‌ କଂପାନିର  ଗ୍ରାହକ କେନ୍‌ ୱିଲସନ୍‌  କିଛି ମାସ ତଳେ ଦେଖିଲେ ଯେ ତାଙ୍କର ବିଦ୍ୟୁତ୍‌ ବିଲ୍‌  କ୍ରମାଗତ ଭାବେ ବଢ଼ିଚାଲିଛି । 

ନିଜ ଘରେ ସେ ଏକୁଟିଆ  ରହୁଥିଲେ । ତେଣୁ ବିଜୁଳି  ବ୍ୟବହାର କମାଇବାକୁ  ଆପ୍ରାଣ ଉଦ୍ୟମ କଲେ । କିନ୍ତୁ କିଛି ସୁଫଳ ମିଳିଲା ନାହିଁ ।  ଏହାପରେ ସେ ନିଜର ବିଜୁଳି ବ୍ୟବହାରକୁ ଟ୍ରାକ୍‌ କରିବା  ଲାଗି ଏକ ଯନ୍ତ୍ର କିଣିଲେ । ସେଥିରୁ ତାଙ୍କର ପାୱାର ବ୍ରେକର  ଅଫ୍‌ ଥିବାସତ୍ତେ୍ୱ ମିଟର ଚାଲୁଥିବା ଦେଖିବାକୁ ମିଳିଲା। ୱିଲସନ୍‌ ଭାବିଲେ ବୋଧହୁଏ ମିଟରରେ କିଛି ତ୍ରୁଟି ରହିଛି ।  ନହେଲେ କେହି ତାଙ୍କର ବିଜୁଳିକୁ ଚୋରି କରୁଛି । କିଛି  ଉପାୟ ନ ପାଇ ୱିଲସନ୍‌ ପାସିଫିକ୍‌ ଗ୍ୟାସ୍‌ ଆଣ୍ଡ ଇଲେକ୍ଟ୍ରିକ୍‌  କଂପାନି ସହ ଯୋଗଯୋଗ  କଲେ । 

କଂପାନି ନିଜର ଜଣେ  ଅଧିକାରୀଙ୍କୁ ସେଠାକୁ ତଦନ୍ତ  ଲାଗି ପଠାଇଲା । ୱିଲସନ୍‌  ତାଙ୍କ ପଡ଼ୋଶୀଙ୍କ ବିଜୁଳି  ବିଲ୍‌କୁ ବିଗତ ୧୫ ବର୍ଷ  ହେଲା ପଇଠ କରିଆସୁଥିବା  ଅଧିକାରୀ ଜଣକ କହିଲେ ।  ଏହାଶୁଣି ୱିଲସନ୍‌ଙ୍କ  ପାଦ ତଳୁ ଯେପରି ମାଟି  ଖସିଗଲା । ସୌଭାଗ୍ୟକୁ ତାଙ୍କୁ  ଆଶ୍ୱସ୍ତି ପ୍ରଦାନ କରି ବିଦ୍ୟୁତ୍‌ ବିତରଣ କରୁଥିବା କଂପାନି  ନିଜର ଭୁଲ୍‌ ସ୍ୱୀକାର କଲା । କଂପାନି ଗ୍ରାହକଙ୍କୁ ହୋଇଥିବା  ଏହି ଅସୁବିଧାକୁ ସୁଧାରିବା ଲାଗି ପ୍ରତିବଦ୍ଧ ବୋଲି ଦର୍ଶାଇଲା ।   ଏଥିସହିତ ତାଙ୍କୁ କ୍ଷମା ମଧ୍ୟ ମାଗିଲା । ଏହାପରେ ତାଙ୍କର  ମିଟରକୁ ମଧ୍ୟ କଂପାନି ଠିକ୍‌ କରିଦେଇଛି ।