୩୦୦ କାର, ସୁନାର ଖଣ୍ଡା ଏବଂ ୪୭ ଲକ୍ଷ କୋଟି ଟଙ୍କା...ମାଲେସିଆ ରାଜଗାଦିରେ ନୂଆ ସୁଲତାନ

ନୂଆଦିଲ୍ଲୀ: ମାଲେସିଆର ନୂଆ ଅରବପତି (ବିଲେନିୟର) ସମ୍ରାଟ ସୁଲତାନ ଇବ୍ରାହିମ୍ ଇସ୍କନ୍ଦର ଶନିବାର ପରମ୍ପରା ଅନୁସାରେ ତୋପ ସଲାମୀ ସହ ରାଜଗାଜିରେ ବସିଛନ୍ତି । ସେ ପାଞ୍ଚ ବର୍ଷର କାର୍ଯ୍ୟକାଳ ସମୟରେ ନିରପେକ୍ଷ ରୂପେ ଶାସନ କରିବା ପାଇଁ ସଂକଳ୍ପ ନେଇଛନ୍ତି । ସୁଲତାନ ଇବ୍ରାହିମ୍ (୬୫) ଜାନୁଆରୀ ୩୧ରେ ଶପଥ ନେଇଥିଲେ । ତେବେ ଏକ ଭବ୍ୟ ସମାରୋହରେ ଜୁଲାଇ ୨୦ରେ ସୁଲତାନ ଇବ୍ରାହିମ ଇସ୍କନ୍ଦରଙ୍କ ଔପଚାରିକ ଭାବେ ମାଲେସିଆର ୧୭ତମ ସମ୍ରାଟ ଭାବେ ରାଜ୍ୟାଭିଷେକ ହୋଇଛି ।

କଳା ଏବଂ ସୁନେଲି ରଙ୍ଗର ପାରମ୍ପାରିକ ପୋଷାକ ଏବଂ ଟୋପି ପିନ୍ଧିଥିବା ସୁଲତାନ ଇବ୍ରାହିମ ଏବଂ ରାଣୀ ରଜା ଜରିଥ ସୋଫିଆଙ୍କୁ ସିଂହାସନରେ ବସିବା ପୂର୍ବରୁ ସୈନ୍ୟ ସଲାମୀ ଦିଆଯାଇଥିଲା । ପରମ୍ପରା ଅନୁସାରେ ନୀତି ଆରମ୍ଭରେ ସୁଲତାନଙ୍କୁ କୁରାନର ଏକ କପି ଉପହାରରେ ଦିଆଯାଇଥିଲା, ଯାହାକୁ ସେ ଚୁମ୍ୱନ କରିଥିଲେ । ନୂଆ ସମ୍ରାଟଙ୍କୁ ଶକ୍ତିର ପ୍ରତୀକ ରୂପେ ସୁନାର ଖଣ୍ଡା ଦିଆଯାଇଛି । ପ୍ରଧାନମନ୍ତ୍ରୀ ଅନୱର ଇବ୍ରାହିମ୍ ନିଜ ସରକାରର ନିଷ୍ଠାର ସଂକଳ୍ପ ବ୍ୟକ୍ତ କରି କହିଛନ୍ତି ଯେ ରାଜ ପରିବାର ରାଷ୍ଟ୍ରର ଶକ୍ତିର ଏକ ସ୍ତମ୍ଭ ଅଟେ । ଏହାପରେ ପୁଣି ଥରେ ସେ ସୁଲତାନ ଇବ୍ରାହିମଙ୍କୁ ମାଲେସିଆ ନୂଆ ସମ୍ରାଟ ଘୋଷଣା କରିଥିଲେ । 

ସୁଲତାନ ଇବ୍ରାହିମ ଇସ୍କନ୍ଦର ଏକ ଅଦ୍ୱିତୀୟ ପରିବର୍ତ୍ତନଶୀଳ ରାଜ ପରମ୍ପରା ପ୍ରଣାଳୀରେ କାମ କରିବେ । ୯ ଜାତୀୟ ରାଜ୍ୟର ଶାସକ ଦେଶର ପରବର୍ତ୍ତନଶୀଳ ରାଜତନ୍ତ୍ର ଅଧିନରେ ପାଞ୍ଚ ବର୍ଷ ପାଇଁ ମାଲେସିଆର ରାଜା ହେବେ । ଏହି ପ୍ରଣାଳୀ ୧୯୫୭ରେ ବ୍ରିଟେନରୁ ସ୍ୱାଧୀନତା ପାଇବା ପରଠୁ ଅଛି । ମାଲେସିଆରେ ୧୩ଟି ରାଜ୍ୟ ରହିଛି, କିନ୍ତୁ କେବଳ ୯ଟିରେ ରାଜ ପରିବାର ରହିଛି । କିଛି ରାଜ୍ୟରେ ପରମ୍ପରା ବହୁ ଶତାବ୍ଦୀ ପୁରୁଣା ମଳୟ ସାମ୍ରାଜ୍ୟ ସହ ଜଡିତ ।

ମାସେଲିଆରେ ପ୍ରଶାସନିକ ଶକ୍ତି ପ୍ରଧାନମନ୍ତ୍ରୀ ଏବଂ ସାଂସଦଙ୍କ ପାଖରେ ରହିଛି । ସମ୍ରାଟ୍ କେବଳ ସରକାର ଏବଂ ସଶସ୍ତ୍ର ବଳର ନାମମାତ୍ର ପ୍ରମୁଖ ହୋଇଥାନ୍ତି । ତାଙ୍କୁ ଇସଲାମ୍ ଏବଂ ମଳୟ ପରମ୍ପରାର ସଂରକ୍ଷକ ବୋଲି କୁହାଯାଏ । 

ସିଙ୍ଗାପୁର ସୀମାକୁ ଲାଗିଥିବା ଦକ୍ଷିଣ ଜୋହୋର ରାଜ୍ୟର ସୁଲତାନ ଇବ୍ରାହିମ ଦେଶର ସବୁଠୁ ଧନୀ ବ୍ୟକ୍ତିଙ୍କ ମଧ୍ୟରୁ ଜଣେ । ବ୍ଲୁମବର୍ଗର ରିପୋର୍ଟ ଅନୁସାରେ ତାଙ୍କ ସମ୍ପତ୍ତି ୫.୭ ବିଲିୟନ ଡଲାର ରହିଛି । ଭାରତୀୟ ମୁଦ୍ରାରେ ଏହା ପ୍ରାୟ ୪୭ ଲକ୍ଷ କୋଟି ଟଙ୍କା । ତେବେ ଅନେକ ଦାବି କରିଛନ୍ତି ଯେ ସୁଲତାନ ଇବ୍ରାହିମଙ୍କ ସମ୍ପତ୍ତି ଏହାଠାରୁ ବହୁ ଅଧିକ । ତାଙ୍କ ପାଖରେ ୩୦୦ରୁ ଅଧିକ ବିଳାଶପୂର୍ଣ୍ଣ କାର ରହିଛି । ପ୍ରାଇଭେଟ୍ ଜେଟ୍ ସହ ତାଙ୍କ ପରିବାର ପାଖରେ ନିଜର ଏକ ସେନା ମଧ୍ୟ ରହିଛି ।