ଆଉ ଦିନକ ପରେ ସମଲେଇ ପ୍ରକଳ୍ପର  ହେବ ଲୋକାର୍ପଣ, ମନ୍ଦିରର ନୂଆ ରୂପ ଦେଖି ତୃପ୍ତ ହେଉଛନ୍ତି ଭକ୍ତ

ସମ୍ବଲପୁର: ବିଶ୍ବ ଦେଖିବ ଆସ୍ଥା ଓ ବିଶ୍ବାସର ପୀଠ ସମଲେଇ ମନ୍ଦିରର ରୂପାନ୍ତରିତ ରୂପ । ଆଉ ଦିନକ ପରେ ଅର୍ଥାତ୍ ଜାନୁଆରୀ ୨୭ ତାରିଖରେ ସମଲେଇ ପ୍ରକଳ୍ପର ଲୋକାର୍ପଣ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହା ପୂର୍ବରୁ ମନ୍ଦିରର ନୂଆ ରୂପ ଦେଖି ତୃପ୍ତ ହେଉଛନ୍ତି ଭକ୍ତ । ମା’ଙ୍କୁ ଦର୍ଶନ କରି ସମସ୍ତେ ଭବ୍ୟ ଓ ଦିବ୍ୟ ଅନୁଭୂତି ପାଉଥିବା ବେଳେ ଲୋକାର୍ପଣ ଉତ୍ସବ ପାଇଁ ଚାଲିଛି ଜୋରଦାର ପ୍ରସ୍ତୁତି । ଆଜି ଏହି ପ୍ରସ୍ତୁତିର ସମୀକ୍ଷା କରିଛନ୍ତି ବିଜେଡି ସାଂସଦ ମାନସ ମଙ୍ଗରାଜ।

Also read- ନକଲି ସିମ୍ କାର୍ଡ ରାକେଟ୍‌ର ୪ ସଦସ୍ୟ ଗିରଫ, ବାହାର ରାଜ୍ୟର ସାଇବର ଠକଙ୍କୁ କରୁଥିଲେ ବିକ୍ରି

ନୂଆ ରୂପରେ ଝଲସୁଛି ମା’ ସମଲେଇଙ୍କ ପୀଠ । ମନ୍ଦିରର ରୂପାନ୍ତରିତ ରୂପ ଦେଖି ତୃପ୍ତ ହେଉଛନ୍ତି ଭକ୍ତ । ଆସନ୍ତା ୨୭ତାରିଖରେ ସମଲେଇ ପ୍ରକଳ୍ପର ଲୋକାର୍ପଣ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହା ପୂର୍ବରୁ ସବୁଠି ସୃଷ୍ଟି ହୋଇଛି ଆଧ୍ୟାତ୍ମିକ ପରିବେଶ । ମା’ଙ୍କ ଦର୍ଶନ କରି ଭବ୍ୟ ଓ ଦିବ୍ୟ ଅନୁଭୂତି ପାଉଛନ୍ତି ଶ୍ରଦ୍ଧାଳୁ । ପ୍ରକଳ୍ପ ଲୋକାର୍ପଣ ପାଇଁ ଚାଲିଛି ଜୋରଦାର୍ ପ୍ରସ୍ତୁତି । ଆଜି ଏହି ପ୍ରସ୍ତୁତିର ସମୀକ୍ଷା କରିଛନ୍ତି ବିଜେଡି ସାଂସଦ ମାନସ ମଙ୍ଗରାଜ । କହିଛନ୍ତି, ମୁଖ୍ୟମନ୍ତ୍ରୀଙ୍କ ଦ୍ବାରା ପ୍ରକଳ୍ପ ଲୋକାର୍ପଣ ପରେ ଆସନ୍ତା ୩୦ ତାରିଖରୁ ପ୍ରତିଦିନ ଓଡ଼ିଶାର ୪ଟି ନିର୍ବାଚନ ମଣ୍ଡଳୀର ୮ହଜାର ଲୋକ ମା’ ସମଲେଶ୍ବରୀଙ୍କ ଦର୍ଶନ ପାଇଁ ଆସିବେ । ଏନେଇ ରାଜ୍ୟ ସରକାରଙ୍କ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି ।

ଆସନ୍ତାକାଲି ମା’ ସମଲେଇଙ୍କ ପୀଠରେ କଳସ ଯାତ୍ରା ଓ ଅଧିବାସ ଆରମ୍ଭ ହେବାକୁ ଥିବା ବେଳେ ୨୭ରେ ମନ୍ଦିର ୪ ଦ୍ବାରରେ ହୋମଯଜ୍ଞ ପାଇଁ ଆୟୋଜନ କରାଯାଇଛି । ସମ୍ବଲପୁର ମାରଓ୍ବାଡ଼ିପଡ଼ା ଘାଟରୁ ୧୧ଶହ ମହିଳାମାନେ କଳସ ଧରି ମା’ ସମଲେଇଙ୍କ ପୀଠରେ ପହଞ୍ଚିବେ । ୨୭ରେ ପଶ୍ଚିମ ଓଡ଼ିଶାର ୩୦ଜଣ ବିଦ୍ବାନ ପଣ୍ଡିତଙ୍କ ଦ୍ବାରା ଯଜ୍ଞ କାର୍ଯ୍ୟ ଆରମ୍ଭ ହେବ । ୩୧ ତାରିଖରେ ଏହି ଯଜ୍ଞର ପୂର୍ଣ୍ଣାହୁତି ହେବ । ୨୭ରେ ଲୋକାର୍ପଣ ଉତ୍ସବ ପାଇଁ ଶ୍ରଦ୍ଧାଳୁମାନେ ସିନ୍ଦୂର ଓ ଚୁନରି ଅର୍ପଣ କରିପାରିବେ । ପ୍ରଥମେ ନିଜ ଗାଁର ଗ୍ରାମଦେବୀଙ୍କୁ ଅର୍ପଣ କରିବା ପରେ ସମଲେଶ୍ବରୀଙ୍କୁ ଅର୍ପଣ କରିବେ । ପ୍ରକଳ୍ପରେ ଶେଷ ସ୍ପର୍ଶ ଦେଉଛନ୍ତି ଶିଳ୍ପୀ । ମନ୍ଦିରର ମୁଖଶାଳାର ପ୍ରତିଟି କାରିଗରୀରେ ସଂସ୍କୃତିର ଛାପ ଦେଖିବାକୁ ମିଳୁଛି । ସବୁଜ ବଳ, ସୁବ୍ୟବସ୍ଥିତ ମାର୍ଗ, ସୁସଜ୍ଜିତ ନବରୂପ । ରୂପାନ୍ତରଣର ଐତିହାସିକ କୀର୍ତ୍ତିର ଆକର୍ଷଣ ଭିତରେ ଶ୍ରଦ୍ଧାଳୁଙ୍କ ମନକୁ ବିଭୋର କରୁଛି ମନ୍ଦିରର ୪ ଦ୍ବାର ଆଉ ଓ୍ବାଚ୍ ଟାଓ୍ବାର ।

ସମଲେଇ ପ୍ରକଳ୍ପ ପାଇଁ  ମୁଖ୍ୟମନ୍ତ୍ରୀଙ୍କ ପରିକଳ୍ପନାକୁ ବାସ୍ତବ ରୂପ ଦେବାକୁ ଦିନରାତି ପରିଶ୍ରମ କରିଛନ୍ତି  5T ଅଧ୍ୟକ୍ଷ ଭି.କେ.ପାଣ୍ଡିଆନ୍ । ବାରମ୍ବାର ସମ୍ବଲପୁର ଗସ୍ତ କରି ସମଲେଇ ପ୍ରକଳ୍ପ କାର୍ଯ୍ୟକୁ ସମୀକ୍ଷା କରିବା ସହ ତାଙ୍କ ନିର୍ଦ୍ଦେଶରେ ନିର୍ଦ୍ଧିଷ୍ଟ ସମୟ ସୀମା ମଧ୍ୟରେ ଶେଷ ହୋଇଛି ସମଲେଇ ପ୍ରକଳ୍ପ । ଆସନ୍ତା ୨୭ ତାରିଖରେ ସମଲେଇ ପ୍ରକଳ୍ପର ଲୋକାର୍ପଣ ଦିବସ ଅବସରରେ  ସ୍କୁଲ, କଲେଜ ଛୁଟି ଘୋଷଣା କରିଛନ୍ତି ସରକାର ।

The post ଆଉ ଦିନକ ପରେ ସମଲେଇ ପ୍ରକଳ୍ପର  ହେବ ଲୋକାର୍ପଣ, ମନ୍ଦିରର ନୂଆ ରୂପ ଦେଖି ତୃପ୍ତ ହେଉଛନ୍ତି ଭକ୍ତ appeared first on Prameya News7.