ଆମେରିକାର ଅସ୍ତ୍ରବିରତି ଘୋଷଣାର ପଡ଼ିଲାନି ପ୍ରଭାବ ! ଥାଇଲ୍ୟାଣ୍ଡ ଉପରେ ବୋମା ବର୍ଷା କଲା କାମ୍ବୋଡିଆ

ନୂଆଦିଲ୍ଲୀ: କାମ୍ବୋଡିଆ ଏବଂ ଥାଇଲ୍ୟାଣ୍ଡ ମଧ୍ୟରେ ୪ ଦିନିଆ ଯୁଦ୍ଧରେ ଅସ୍ତ୍ରବିରତି ଘୋଷଣା କରିଥିଲେ ଆମେରିକା ରାଷ୍ଟ୍ରପତି ଟ୍ରମ୍ପ । ଲାଗୁଥିଲା ଯେ ରବିବାର ସୂର୍ଯୋଦୟ ଉଭୟ ଦେଶରେ ଶାନ୍ତି ଆଣିବ। କିନ୍ତୁ ଏବେବି ଦୁଇ ଦେଶ ମଧ୍ୟରେ ଗୁଳି ବିନିମୟ ଜାରି ରହିଛି।

ଥାଇ ଏବଂ କାମ୍ବୋଡିଆ ଅଧିକାରୀଙ୍କ ଅନୁଯାୟୀ, ଗୁରୁବାର ପରଠାରୁ ଅତି କମରେ ୩୨ ଜଣଙ୍କର ମୃତ୍ୟୁ ହୋଇଛି ଏବଂ ଅତି କମରେ ୨ ଲକ୍ଷ ଲୋକ ବାସଚ୍ୟୁତ ହୋଇଛନ୍ତି। ଯୁଦ୍ଧ ବନ୍ଦ କରିବାକୁ ଜାତିସଂଘ, ଆମେରିକା ଏବଂ ଚୀନ୍ ଆହ୍ୱାନ ସତ୍ତ୍ୱେ ଏହି ସଂଘର୍ଷ ଜାରି ରହିଛି। ସୀମାରେ ସମ୍ପ୍ରତି ସଂଘର୍ଷ ଆରମ୍ଭ କରିବା ପାଇଁ ଉଭୟ ଦେଶ ପରସ୍ପରକୁ ଦୋଷ ଦେଇଛନ୍ତି ଏବଂ ଉଭୟ ଚାଲିଥିବା ଯୁଦ୍ଧ ପାଇଁ ପରସ୍ପରକୁ ଦାୟୀ କରୁଛନ୍ତି।

ଟ୍ରମ୍ପ୍‌ଙ୍କ ଘୋଷଣାର କିଛି ଘଣ୍ଟା ପରେ, ଥାଇ ସରକାର ରବିବାର କହିଥିଲେ ଯେ ସାମରିକ ଅଭିଯାନ ବନ୍ଦ କରିବାକୁ 'ପ୍ରସ୍ତୁତ ନୁହଁନ୍ତି' କାମ୍ବୋଡିଆ। କାମ୍ବୋଡିଆ ଏହାର ସୁରିନ୍ ପ୍ରଦେଶ, ସୀମାନ୍ତ ଅଞ୍ଚଳ ଉପରେ ପ୍ରବଳ ଗୁଳିବର୍ଷା ଜାରି ରଖିବାର ଅଭିଯୋଗ ଆଣିଥିଲେ।

ଥାଇଲାଣ୍ଡର ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତିରେ କହିଛି, "ଯେପର୍ଯ୍ୟନ୍ତ କାମ୍ବୋଡିଆ ବାରମ୍ବାର ମାନବିକ ଅଧିକାର ଏବଂ ମାନବିକ ଆଇନର ମୌଳିକ ନୀତି ଉଲ୍ଲଂଘନ କରୁଛି, ସେପର୍ଯ୍ୟନ୍ତ ଶତ୍ରୁତା ଶେଷ ହୋଇପାରିବ ନାହିଁ।" କାମ୍ବୋଡିଆର ପ୍ରତିରକ୍ଷା ମନ୍ତ୍ରଣାଳୟର ଜଣେ ମୁଖପାତ୍ର ଗଣମାଧ୍ୟମକୁ କହିଛନ୍ତି ଯେ ଥାଇଲ୍ୟାଣ୍ଡ କାମ୍ବୋଡିଆର ଅନେକ ସ୍ଥାନରେ ଡ୍ରୋନ୍, ଟ୍ୟାଙ୍କ, କ୍ଲଷ୍ଟର ଏବଂ ବୋମା ମାଡ଼ କରିଛି। ଯୁଦ୍ଧବିରତି ପରେ ମଧ୍ୟ ଯୁଦ୍ଧ ଜାରି ରହିବା ବିଶ୍ୱର ଅନ୍ୟ ଏକ ମୋର୍ଚ୍ଚାରେ ଏକ ଭୟଙ୍କର ଯୁଦ୍ଧର କାରଣ ହୋଇପାରେ। ଯାହା ଯୋଗୁଁ ମାନବିକ ସଙ୍କଟ ଆହୁରି ଗଭୀର ହୋଇପାରେ।

କମ୍ବୋଡିଆର ଲେଫ୍ଟନାଣ୍ଟ ଜେନେରାଲ ମାଲି ସୋଚେତା କହିଛନ୍ତି ଯେ କାମ୍ବୋଡିଆର ଉତ୍ତର ପ୍ରଦେଶରେ ଅବସ୍ଥିତ ୟୁନେସ୍କୋ ବିଶ୍ୱ ଐତିହ୍ୟ ସ୍ଥଳ ପ୍ରାଚୀନ ପ୍ରିହ ଭିହର୍ ମନ୍ଦିର ନିକଟରେ କିଛି ବୋମା ମାଡ଼ କରାଯାଇଛି। ଏହି ମନ୍ଦିର ପରିସର ପୂର୍ବରୁ ଦୁଇ ଦେଶ ମଧ୍ୟରେ ସଂଘର୍ଷର କେନ୍ଦ୍ର ହୋଇଆସିଛି। କାମ୍ବୋଡିଆ ଥାଇଲ୍ୟାଣ୍ଡର 'ଇଚ୍ଛାକୃତ ଏବଂ ପୂର୍ବ ଯୋଜନାବଦ୍ଧ ଆକ୍ରମଣ'କୁ ଦୃଢ଼ ନିନ୍ଦା କରିଛି।